السلام عليكم ورحمة اللـــه وبركاته
بعد تردد حبيت اقول اللي في نفسي
حتى اذا مالقيت منكم اجــــابه يمكن انـــا ارتاح لاني قلت اللــــي عندي
انـــا متزوجه منذ ست سنين ولله الحمد راضيه بما قسمه الله لي
واحاول قد مااقدر اني مااخلي المشاكل تتغلب علينا
طبيعتي حساسه مره ولا احب اسبب مشاكل واتمنى ان زوجي يكون سعيد في حياته معاي
ماراح اطول واقلكم اللي عندي
بس في شغله بسيطه بوضحها عشان تكونون في الصوره
ان زوجي اتعود انه مايوديني هو بنفسه عند صديقاتي او اهلي الا في النادر
دايم اللي يوديني اخوي
واذا رحت عند اهلي يخليني يومين وبعدين يجي ياخذني
واذا رحت اي مكان تاني سواء مع اهلي او اهله خلاص يعتمد عليهم انهم هم اللي يرجعوني
حتى لو كان على بيت اهلي يعني مو مهم اني ارجع البيت
على انه يقدر يجي ياخذني بس يكسل مررره
المهم اليوم اللي صار اني رحت لاخته المشوار صحيح انه بعيد عن بيتنا على اننا في نفس المنطقه
المهم دقيت عليه وقلت يالله تعال قال الوالد مو موجود ؟قلت لا__ قال اجل مين اللي بيرجع اهلي؟؟ قلت ماادري_ قال طيب الحين اجي
مسافة الطريق اخته حطت العشا_ دق علي قال يالله انزلي _ قلت طيب اطلع انت سلم على امك واتعشى معانا_ قال يالله بسرعه
تخيلو بالله قومني انا واولادي من على السفره
ولاطلع سلم على امه ولا اخته ولا احد
اخته مرره زعلت وامه كمان
وانا من جد انحرجت قدامهم طلعت وانا والله دموعي على خدي
كان نفسي ساعتها اقله لاترجعني البيت وديني على بيت اهلي
بس انا ماني حابه اسبب لاهلي مشكله ماودي اجيب لهم وجع الراس
على انه مو اول مره يسوي هاذي الحركه
انا اسفه لو طولت عليكم
بس اللي في نفسي ولو شي بسيط طلع
اذا انا غلطانه ياليت احد يقول لي او اعرف بس كيف اتصرف لاني اسكت في مثل هذي المواقف بس وابكي



تحيــــــــــــــاتي