صراحتي في ردة فعلي اصبحت مشكلة
السلام عليكم
اخواني اخواتي ارجوكم وبدون مجاملة او مثالية تكونون صريحين معاي
قبل مااقول الموضوع انا الحمدالله جميع علاقاتي الاجتماعية ممتازة وأسلوبي مهذب مع الغير يارب لك الحمد
وأتغاضى عن الخطأ أحيانا وأحيانا ماأتحمل..
اليوم كنت مجتمعة مع مجموعة من النساء.. جالسة وجنبي أختي وزوجة اخوي على يميني ...يساري قريبة لي..
المهم ولد أخوي عمره 4 سنوات ملفت للنظر الله يحفظه مؤدب واسلوبه راقي في التعامل ماكأنه طفل ابد
يستأذن قبل مايسوي أي شي.. يشكر لما أحد يخدمه.. ويحب يخدم.. حساس جدا..
يفهم بسرعة..يراقب الأطفال بتصرفاتهم ويصححها لهم...لكن فيه عيب
انه نعووووووم مرة وبزيادة
طول الجمعة وقريبتي بس تناظره وتضحك وتتريق..
مر قال عمتي ابغى شوكلاته قلت تعال..... وهو يدخل بين الحريم يناظرهم مستحي وكل شوي يوقف
يقول ممكن؟(يقصد ابغى طريق أمشي )قالت قريبتي ياحليل المايعين يبغون يمرون <<<<
سوييت نفسي ماسمعتها واعطيته شوكلاته ...قالت له: يله يا..... ( كلمة تقال للشاب المايع { وتعتبر
سبه } ) باي<< تقوله وهي تضحك مسوية انها تمزح
من وين جايبين ولد اخوك هذا ليه ماطلع على ابوه اتذكره خشن ورجال
قلت هذا طبعه بسم الله عليه
المهم مر مرة ثانية وهو يدخل بين الحريم
قالت بعد لابسة قبعة لا انت لازم يغيرونك لاسم بنت
طنشناااااااااااااااها وانا واختي وزوجة اخوي صرنا كذا
قالت لي زوجة اخوي بصوت واطي ودي اصب الشاهي على وجهها
<<< عصبت مسكينة
واللي قهرني ان ولد اخوي يناظرها من بعيد حاس فيها !! لدرجة قال لأمه بالسيارة اللي لابسة اسود ماحبها موحلوة تصورو!!
بعد ربع ساعة... قالت اقول ......قلت نعم؟
قالت بضحكة خفيفة: الحمار ولد اخوك وينه فيه؟
قلت انا (وانا اضحك مثلها ) تلاقينه مع الحمير عيالك!!
أختي وزوجة أخوي ضحكو بصوت عالي وبقوة ..وقريبتي انكتمت...
وأمي اعطتني نظرات عرفت اني بتهزأ في البيت!!
ووقت العشا قالت لي زوجة اخوي الله يخليك لنا ياعمتنا تاج على روسنا
ان شاءالله يجي اليوم اللي احط عيالك فوق راسي <<<< صرت كذا انا
واول ماركبت السيارة امي بس تأنبني على اللي صار؟
ياجماعة انا مابغى اغلط عليها.. واحترمها واقدرها بس زودتها تستقوي علينا يوم شافتنا ساكتين؟
وش تحسبنا مالنا لسان ولاخايفين منها ولا شو بالضبط؟
سكتنا بما فيه الكفاية وماتأدبت خلاص لازم تجيها علقة ساخنة عشان المرة الثانية تعدل لسانها
امي زعلانة مني قلت لها بروح احط الموضوع اللي صار بمنتدى وبقرا عليك رأيهم
طلبتكم بعيدا عن المثالية انا صح ولالا؟
ادري بتقولون فيه اساليب افضل ليه ماسويتيها؟ انا ماقدر لأني لو بسوي اي حركة بتقول انا كنت امزح
شفيك زعلتي! لذلك جبت كلمتي كنها مزحة مثل كلمتها
وعلى فكرة بعد مرور نصف ساعة سولفت معاها عادي جدا