السلام عليكم ورحمة الله

لا أدري من أين أبدأ الكلام و لكن نفسيتي تعبانة جداً جداً و الدنيا ضايقة فيني وما أدري شنو الحل فقلت ما لي غيركم أستشيره في حل مشكلتي

مشكلتي هي أهل زوجي

أكيد بتتوقعون هواش و صراخ لا السالفة مو جذي و يا ليتها جذي مشكلتي إن أم زوجي عاملة نفسها ملاك منزل من السماء و إنها تنظلم و لا عمرها تظلم و القط ياكل عشاها و أول ما بدأت حياتي معاهم إنطلت علي هاذي الخدعة فحطيتها فوق راسي و عاملتها أحسن معاملة و خدمتها بعيوني خدمات حتى بنتها ما تسويها لها و لكن في النهاية انصدمت صدمة العمر لما اكتشفتها على حقيقتها و هذا الشي صار لما حملت بطفلي و تعبت جداً و بدأت حاجتي لها شفتها تتنكر لي و تناست كل شي سويته على شانها مع إني غريبة و ما عندي أحد حواليني حزتها اكتشفت إنها أنانية و تحب مصلحتها و مصلحة عيالها


من ذاك اليوم نفسيتي تدمرت و تميت على طول أصيح و أتندم على الأيام الي عملت نفسي لها خدامة و ظل الندم ياكل فيني و الأدهى و الأمر لما ولدت و طفلي أول حفيد لها ورتني الويل و نجوم الليل في عز الظهر و بدأت تفرض أرائها علي و تتدخل في حياتي سوي جذي و لاتسوين هذا و لا تروحين هذا المكان حتى بيت أهلي ما تبيني أروح و تتدخل فيني متى أنام و متى أصحى تخيلوا حتى لو نمت في فترة نوم ولدي تقول هذا خطير ما تدرين شيصير!! تخيلوا يعني أم ما بتحس في طفلها؟؟ و غيرها الآلاف من المواقف يعني باختصلر تبي تعاملني مثل أيام زمان إن هذا الولد ولدها و أنا مجرد مربية لازم أنفذ أوامرها وإلا ما يظل أحد إلا تتكلم علي عنده و حتى أخواتها بدوا يتدخلون في حياتي


طبعاً أنا كل يوم نفسيتي تدمر أكثر و أكثر و كل ما أقعد معاها تقهرني أكثر و أكثر تخيلوا لما أرضع ولدي قدامها دايماً تقول لي كأن إنتي فيج حليب، إنتي ما فيج حليب، الطفل ضعفان، يصيح لأنج ما فيج حليب شتتوقعون نفسيتي تكون؟؟هذا غير إنها تبي تأكل ولدي أي شي على كيفها حتى آيسكريم تخيلوا و هو عمره كم شهر فقط!!


أخيراً قررت إني ما أقعد معاها فظليت في مكاني و ولدي أبوه ياخذه لهم على طول لأن الطفل ماله ذنب لازم يشوف أهله و مع ذلك ما سلمت منهم يشوشون زوجي و ليش زوجتك ما تقعد معانا و ليش وليشوزوجي أحسه بين نارين عارف إن أهله غلطانين بس مو حاب إن الوضع يتم على هذا الحال ودايماً يقول لي رجعي علاقتك معاهم جالسيهم ،، بس هذا الشي مو بيدي نفستي تعبانة وما تتحمل أي كلمة ثانية



أكيد طولت عليكم وسامحوني بس أبي أفضفض و أنتظر منكم ردود تريح بالي أنا النوم خلاص ما أعرف طعمه دايماً أتحسر و أتندم على الأيام الي طافت و أفكر في الي جاي و أتخيل مشاكل أكثر ، ما عدت أحس بالأمان و الإستقرار في هذا البيت حتى أحس إن الجدران بتنطبق علي ، و أنا مقتنعة في القرار الي أخذته إني ما أجالسهم بس ما أحب زوجي يزعل مني



ساعدوني أرجوكم وسامحوني على الإطالة