هل بعد هذا كله انا الغلطان و شاذ عن بقية الشباب ؟
السلام عليكم يا عائلتي يا اهلي و اخواني وكل شيء
والله اشتقت للمنتدى و اهله الطيبين واللي وقفوا معي بكل شيء
ابتحدث معكم بموضوع
كنت بجدة اتمشى قبل يومين مع اصحابي ومع مديري بالعمل...تمشينا و تسلينا وفي آخر الليل كنا على البحر نتكلم وفجأة جابوا سيرة و موضوع البنات و الترقيم و الكلام هذا كله و يتفاخرون انه كل واحد عنده و و هذا سوا و و و الخ
و بعدها قالوا صح صح نسينا خوينا هذا(يقصدوني)
قالوا هذا طلق مرتين قبل الدخلة و خطب كذا مرة ولا تزوج مسكين انت فين عايش
قلت لهم هذا النصيب هذا اللي اراده الله سبحانه
قالوا لي يا شيخ خليك من الزواج انت طول عمرك ما راح تتزوج والله ما راح تتزوج طول عمرك ما دام لا تتعرف ولا تواعد بنات و و والخ شوف احنا سوينا و سوينا و عايشين حياتنا الا انت مو عارفين انت فين عايش
انت شاذ اي والله انت شاذ شوف الشباب هالايام ينبسطوا و عايشين صح مو مثلك
المشلكة هم اعز اصحابي ومعاهم رئيسي بالعمل مثلهم
قالوا لي الاسبوع الجاي نبي نطلعك و نساوي لك حفلة بالشاليه ومعنا اللي بالي بالك و شراب و وناسة
والله نخليها تجلس جنبك ونشوف ردة فعلك و و والخ
و يضحكون علي وهذا مسكين ما عنده بنات ولا قادر يتعرف على وحدة و و و الخ
انا سكت ما رديت عليهم ضغطي 1000 كنت ممكن ارتكب فيهم جريمة لكن ما اقدر رئيسي بالعمل معهم
ياللأسف بعد هذا كله و يتوجه لي كلام مثل السكاكين
يعني بعد هذا كله انا شاذ عن بقية الشباب
المثل يقول كما تدين تدان ولا اقرب من الاشياء هذي لأني خايف على اختي هذي خطوط حمراء ما اقرب منها اخاف اللي اسويه يصير في اهلي
كل ما اشوف واحد من الشباب......تكلم مين؟ يقولي ما دريت هذي خويتي الجديدة و و و
وكل شويه يسألوني ايش صار معك لقيت وحده تمشي حالك معاها؟
وطفشوني يقولون لي اللي مثلك اقل شيء معاه عشرين رقم لأن شكلك يساعد ولآن شكلك مو سعودي كأنك اللي يمثلون بدعاية العطور والمشكلة انا من قبيلة و الكل مو مصدق
والله طفشت يئست احس اني مو انسان مثل غيري احس اني مو آدمي... الزواج ولا قدرت عليه ولا تم
ايش الحل؟
ايش الحل؟
تعرفت على مطاوعه قالوا لي اول شيء اترك حاجة عزيزة عليك قلت لهم ما اقدر قاموا تركوني
والله الدنيا ما فيها خير ولا هي بخير
هل بعد هذا كله انا الغلطان و شاذ عن بقية الشباب؟؟؟