جويرية ...

صدقيني الدنيا فيها اشياء وايد تقدرين اتسوينها غير الزواج ...

ياختي انا متزوجة مع وقف التنفيذ.. يعني معلقه .. وبعد فترة باذن الله بتطلق.. لما كنت حامل في بنتي كنت اعاني من مشاكل اتشيب الراس.. وكنت اتمنى لو اني ما تزوجت من الاساس.. وبنفس الوقت ماكنت ابي الطلاق.. كل ماتخيل اني بكون مطلقه انهار.. كم وكم بللت وسادتي وترستها دموع..
لكن الحين بعد الولادة ..وبعد التقرب الى الله والتفكير المنطفي.. حسيت ان اخر شي ابيه الحين هو الاستمراريه في هالزواج .. وبعد الطلاق .. مابي اتزوج الحين .. مع ان صدقيني المطلقه اصعب عليها اتعيش بدون زواج من العانس.. وانا مطلقه وطفلة صغيرة باحضاني ..
لكني فكرت وفكرت .. عندي وايد اشياء اقدر اسويها .. وانجزها .. في امور كثيرة ممكن تلهي النفس عن الزواج ..
انا الحين مطلقه تقريباً لكني سعيدة جداً لاني اعرف عدل شو الي ابيه من الحياة ..
الدنيا جذي يوم لك وعشرة عليك .. ادري انك تقعدين في الليل واتفكرين وتتخيلين الحياة مع زوج يشاركك الحياة .. ودك اتنامين في الليل وزوجك يمك .. مالومك .. والله ماتنلامين .. بس بعد فكري بالاشياء الي تحلمين فيها وماحصلك اتسوينها .. انا قبل كنت افكر بالزواج حريه اكبر.. وكنت اتذمر من حياتي في بيت اهلي.. لاني ابي اسوي واسوي واسوي... لحد ماتزوجت .. واكتشفت ان زوجي يبيني اغطي وجهي يوم اطلع .. يتحكم في امور بسيطة .. اعاني قبل مافتح معاه موضوع لانه حساس وبسرعة يزعل.. مو دايما رضا الزوج سهل والعيشة معه سهله .. نفس ماتتخيلين الزواج حلو .. تخيلي بعض الامور الي ممكن اتواجهينها والي بتنحرمين منها .. وسويها وانتي في بيت اهلك ..
انا مادري انتي كم عمرك .. ولا ادري لو عندك مشاكل في بيت اهلك اتخليك يمكن اتفكرين في الزواج بكثرة .. بس صدقيني بالصلاة والاستغفار.. والتفكير بالعقل والمنطق.. بتعرفين ان في الدنيا انتي تختارين السعادة او التعاسة ..
وكل مايضيق خاطرك .. قولي هذا الي مكتوب لي.. واذا ربي كتب لي الزواج بيصير..
اعرف وحدة كانت تتحلم بالزواج .. وتتضايق يوم اتشوف صديقاتها وحدة ورا الثانية يتزوجون .. كانت عادية مافيها جمال زايد .. اتزوجت وهي في الاربعين .. وخذت واحد كبرها في العمر.. ارمل.. وربي مارزقه بعيال.. بنى البيت عشان يعيش فيه ويا زوجته .. لكن ربي كان خذا امانته واتوفت زوجته الله يرحمها.. واتزوج هذي المراة والحين ماشاء الله .. عندهم ولدين اعتقد .. وعايشة معززة مكرمة في فيلا ملك لهم .. ومرتاحة ماديا ونفسيا .. والكل يحسدها ..
صبرت وايد .. والصبر مفتاح الفرج ..

الله يعينك ويفرح همومنا كلنا..

وربي يرزقك الزوج الصالح والذرية الصالحة ..

اسفة على الاطاله .. يمكن كلامي متلخبط...

بس اتمنى فهمتي كلامي..

دمتي بود

أم وداد

__________________
ربنا هب لنا من أزواجنا و ذرياتنا قرة أعين واجعلنا للمتقين إماما

أرجوكم ادعو لي ..بإن ربي يجمع بيني وبين زوجي على خير

إلى زوجي ..إلى مقلتي.. إلى فؤادي...إلى بسمتي... إلى دمعتي... إلى حياتي وروحي... إلى عشيقي، حبيبي، فارسي، أميري، إلى القلب والكيان... والحب والهيام...

الـعزيـــــــــــــــز بو وداد..

أحبــــــــــــك ...