اخوي بو حمد

ما ادري انا يمكن صغيره وايد على هالكلام وما عندي تجارب زوجية بس اعتبرني اختك الصغير ة واسمع مني يمكن يطلع شي يفيدك

اولاً : العشرة ما تهون واعتقد انك تحب زوجتك على الرغم من اهمالها لك

ثانياً : عندك ضمان انك اذا تزوجت الثانية راح تعيش سعيد ، هذا شي بيد الله سبحانه ، ما تضمن الزوجه اليديده شلون راح تعاملك ، يمكن تعاملك عدل فتره وبعدين تقلب (انا اقول يمكن)

ثالثاً : شي طبيعي كونك صارحت زوجتك الاولي وزوجتك المنتظره تدري انك متزوج ، لازم عليك تعدل بينهم وصدقني العدل صعب ، لان الزوجه اليديده راح تكون يديده ولازم لها اسلوب تعامل يختلف عن الاولي ، وهذا راح يشعل نار الغيره في قلب زوجتك القديمه ويمكن توصل واكيد راح توصل حق عوار راس انت في غنى عنه ، ويمكن بعد تندم انك خطيت هالخطوه

رابعاً : لازم شوي تلتمس العذر حق زوجتك لا تنسى ان اللي تتزوج قبل سنه مو مثل اللي تتزوج قبل يوم ويختلف عن عشره 11 سنه بعد ، انا وياك انها مقصره بس لازم يكون في سبب واختلال بسيط في الميزان وان شاء الله ينحل بالتفاهم

خامساً : انت تبيها تسافر وياك بسبب الفضول والكلام اللي قلته ورغباتك الجسدية ، انزين انت ما فكرت ان في عندك يهال وان انتو مو بروحكم ، وين تبيها تخليهم ، وعلى حسب كلامك انت تسافر وايد ، اليهال مسؤولية وراح تتحاسبون عليهم . من راح يكون عندهم (الخدامه ، اهل الزوج ، اهل الزوجه) بارك الله فيهم بس اسمح لي ما راح يقدرون يقومون بدوركم واكيد من الصعب انكم تاخذونهم وياكم كل سفره ، فيعطيها العافيه الزوجة اللي قايمه بدور الابو والام في غيابك

سادساً : انت تقول صارحت زوجتك وتضايقت وتعاندك تعتقد من شنو من كرهها ، لا اكيد من حبها لك وخوفها عليك وعلى بيتها ، ما وضحت في النقطه الثامنة من كلامك عن بقية الموضوع يعني اذا كنت قعدت وياها بعد ما صعقتها بالخبر وقلت لها على اللي بخاطرك ، وما فيها شي اذا استخدمت وياها اسلوب الشده شوية بس عشان تحس ، وعلى فكره جايز اهي تكون حاسه انها مقصره ولكن بسبب روتين الحياه اليومية الملل تحس انها ما تقدر تتغير وتبي احد يساعدها ، فمد لها ايدك بشتى الطرق المباشرة وغير المباشرة

ادري طولت عليك وايد بس نصيحه اخيره :

تذكر ان عندك أزهار تملأ حياتك بعطر من فرح وبهجه وانت تشوفهم يكبرون جدامك بصورة سليمه ، احنا ندري ونشوف ونعرف انه زواج الثانية ياثر على الاولاد وايد

انا ما اقط اللوم كله عليك وما اطلب منك تضحي مع انه المفروض عشان اليهال ، بس حاول وان شاء الله زوجتك راح تتفهم الوضع وتساعدك وتتغير

ملاحظة صغيره بس : لا تحس بالذنب اذا فكرت تعدل عن قرارك عن الثانية خاصة بعد ما دروا اهلها ، هذي قسمه ونصيب وما اعتقد ان لا سمح الله صار بينكم شي يوجب الزواج

ياريت تطمنا عنك .................................. ناطرين نشوف النتيجة