الله يجزاكم خير جميعاً ، والله ما قصرتوا
ردودكم أحيت الأمل بقلبي وأسعدتني الله يسعدكم دنيا وآخرة ..
أنا خايفة أتعلق بقشة ، أخاف أصدق إن ما صار لي شيء وأنصدم
أنا دايماً بحياتي أتوقع اسوء الاحتمالات علشان أي صدمة تصير أكون متماسكة
أفرضوا معي أنه صار شيء وهذا اللي معذبني
وش أقول للزوج ، وش راح يفهم
خاصة إن أختي مع أخوة والحمد لله حياتهم مستقرة
أكيد هو عارف الناس اللي خاطب منهم ، الحمد لله أنا عشت بوسط محافظ
صدق أبوي شخص عادي وأخواني واحد بس منهم اللي ملتزم
والبقية عاديين
لكن الحمد لله أمي امرأة صالحة ربتني أنا وخواتي على الدين والأخلاق
أمي متوفية من كم سنة ، كنت واقتها مراهقة وتعرفون تفكير المراهق دايم سلبي
لذلك ما فكرت إني أقول لأحد
أنا أتوقع إن أحد من خواتي يمكن تعرف وش صار لي
بس يمكن نست وأو تناست مدري والله ماعندي فكرة
فكرت إني أكسر حاجز الخوف وأقول لأختي الكبيرة لأني أرتاح لها مثل أمي وأكيد بتحفظ سري
ومرات أخاف عليها يكفيها هم عيالها أجي احملها همي
أفكر مرات إني أرفض الزواج بس باقي عندي خوات أكبر مني وأصغر
وأخاف إذا تزوجت وصار شيء ينظلمون بسبتي !
وخاصة إن الرجال ماعليه صالح مافي سبب أرفضه علشانه ؟؟
وأخاف من العقوبة إذا رفضته ؟! لأنه أكيد راح يتأثر ويفكر وش فيه عيب ؟
وصعب أقول إن العيب مني ؟؟
واللي أقترح إني أقول للزوج
كيف أقوله ؟؟
مابيني وبينه أي معرفة ؟؟
شلون أتصل عليه وهو بس كلام ؟؟ وش راح يقول عني ؟؟
وإذا ملك مشكلة أخاف يطلقني وتصير فضيحة ؟
والله أني استخرت كثير ودعيت أحس إني موافقة على الزواج
حتى خواتي يناقشوني بالتجهيز وأنا أرد عليهم عادي صح بقرارة نفسي أحس بالألم والهم
بس شيء يدفعني إن استمر
استخرت كذا مرة بهالرجال وأحسه مناسب وإني بقدر أعيش معه
فيه مشكلة ثانية ما ذكرتها لكم ، إنه أصغر مني بسنتين وهم عارفين بهالشي
بس ماعندهم مانع لأنهم يقولون أهم شيء البنت صالحة ومناسبة ومايهم العمر
أحس كلامي مو مرتب بس والله إني تعبت من هالهم
أحس إني على هامش الحياة ماني قادرة أتخطى هالألم اللي يعصر قلبي كل لحظة
*******
بالنسبة لكلام الأستاذ خالد
صحيح أنا قرأت كثير إن بنات صار لهم مثلي وأشد وتزوجوا وبعضهم أزواجهم ما يدرون ومشت حياتهم وعندهم عيال
أنا فكرت إني اوافق واذا تزوجته قبل لايصير أي شيء أقوله
إن فهمني فهمني وإن مافهمني يسوي اللي يشوفه مناسب
بس أخاف أصير ظالمة وخبيت عليه شيء من حقه يعرفه قبل ، وأخاف إنه غير متفاهم وتصير مصيبتي أكبر !
بس الله يعلم إني مالي أي ذنب وأنا مظلومة من قبله بأهمال أهلي وخاصة أبوي الله يسامحهم كلهم
والله إني أدعي إني اموت ولا أحد يتكلم بعرضي أو يتهمني بشي
لأن الله يعلم إني عفيفة لكني أبتليت والحمد لله على كل حال
آه .. الله يعين ويكشف الغمة عاجلا يارب .
__________________
اللهم يا فارج الهم ، ويا كاشف الغم ، فرج همي ويسر أمري
وأشرح صدري .
اللهم استرني بسترك .
لا إله إلا انت سبحانك إني كنت من الظالمين .
أمنوا على دعائي ، لا تنسوني من صالح دعائكم .