والله اني مستغربة من الأعضاء اللي يقولون إنك ما ظلمتها ، يعني أكثر من هالظلم ما فيه بعد

والله اني حاسة بزوجتك السابقة فوق ما تتخيل لاني من وقت قريب كنت في نفس موقفها بالضبط بس الفرق اني كنت مخطوبة بس مو متزوجة، والفرق بينك وبين خطيبي السابق انه شافني قبل الملكة وسوينا مقابلتين قبل الموافقة وهو اللي أصر انه يبغاني وقال انه حبني من أول نظرة وهذا الشي إلي خلاني اوافق مع إاني كنت مترددة بحكم إنشغالي بدراستي . وبعد الخطوبة بفترة قصيرة كلشي فيه تغير وقال انه مو مرتاح مع اني كنت حاسة بنفس احساسه بالضبط وما كنت احس اني احبه نهائيا بس ما كنت أبين له هالشي نهائيا لأن أدري انه الزواج مو لعبة والحب ما ينخلق بين يوم و ليلة وأول الشهور لازم تكون فيها مشاكل بحكم إنه احنا عايشين ببيئات مختلفة , والله إني سويت كلشي علشان أرضيه وهو عاملني أسوأ معاملة علشان اطلب الطلاق لحد ما وصلت لمرحلة اني لو استمريت أكثر معاه بخسر كرامتي وعزة نفسي وطلبت الطلاق.

أنا اسفة اني قاعدة أقولك قصتي بس علشان اوضحلك أني شلون حاسة بزوجتك وحاسة بعذاب أنه الوحدة تتطلق بدون أي ذنب بس لأنه زوجها مو حاس أنه مرتاح.

إيه ظلمتها وظلمتها وظلمتها تدري ليش؟

لأنك اخترت سعادتك على حساب تعاستها

انت تدري يعني شنو طلاق بالنسبة للمرأة؟

انت تدري يعني شنو البنت اتظل طول حياتها تحلم بالرجال الي يحميها ويحبها ويحافظ عليها وفجأة كل هذا يروح في لحظة؟

انت تدري أي قد كلمة ما أحبك تذبح وهي طالعة من فم زوجها اللي المفروض يكون اكثر واحد يحبها؟

انت تدري شنو يعني الوحدة يصير اليها فرح والناس تهنيها ويصير اليها بيت وحياة مستقلة بعدين ترجع بيت اهلها مرة ثانية ولازم تبدأ هالمشوار كله مرة ثانية

والله ما استغرب لو زوجتك السابقة اتعقدت من الزواج للأبد لأنه ما فيه اصعب من أنه الوحدة تعيش ويا واحد اتحس انه ما يحس تجاهها بشي وبس يبغي الفكة منها.

وثاني شي استغرب من الاعضاء اللي قالوا انها تستاهل اللي صار فيها لانها استعانت بالسحر، هو بنفسه قال لكم انه شاف آيات مكتوبة يعني مو أسماء شياطين ولا جن , يعني هذا حجاب عادي من القرآن .حرام الوحدة تستعين بالقرآن اذا حست كلشي مقفل في وجهها . مو المفروض الانسان لما يواجه إبتلاء يستعين بالله علشان يشيل عنه هالإبتلاء؟ يعني المسكينة ما غلطت بالمرة.

إعذرني اذا كنت قاسية معاك بس صدقني الله يمهل ولا يهمل واللي سويته بالمسكينة زوجتك بيرجع عليك أضعاف مضاعفة حتى لو عقب سنين . واذا صار هالشي في بنتك لو وحدة من خواتك بعدين بتحس بفظاعة الشي اللي سويته .


بس ما أقدر أسوي شي غير اني أدعي لنفسي ولكل اللي اتطلقوا ظلم بأنه الله يعوضنا بالانسان اللي يعضونا عن الظلم اللي عشنا فيه.