اخي المحترم .. من خلال قراءتي لمشكلتك .. ومن خلال دراستي .. اللي هي علم نفس ... اتوقع انه زوجتك تعاني من مشكله نفسية سببتها لها طفولتها .. مابنقول مرض نفسي ولكنها مشكله تحتاج للتفهم والصبر والعلاج ..
اللي شافته في صغرها سبب شرخ في شخصيتها .. خصوصا انه السنوات الست الاولى هي اهم السنوات في تكوين شخصية الطفل .. فعلى هالشي هي صار لها عقده وخوف من تكرار اللي حصل لامها فيك .. لعلاج المشكله لازم توجد الاسباب وتحلها .. اقعد معاها جلسة مصارحه .. حسسها بالامان والحب والهدوء .. خلها تتكلم وتعبر عن كل اللي بخاطرها .. لاتعاملها على اساس انها مريضه او معقدة نفسيا .. عاملها على انها زوجتك حبيبتك ام عيالك وتبي تساعدها وتوقف معاها ... بين لها انك مو مثل ابوها وانك راح تكون السند لها في هالدنيا .. اي مرة تحس بالضيق او بأي شي خلها تصارحك على طول وانت خلي صدرك رحب لها في اي وقت .. لاتخلي خوفها ينعكس على تصرفاتها اذا ماعبرت او صرحت باللي تحسه واذا هي ماقدرت تعبر لك .. اشتر لها دفتر حلو تكتب فيه كل اللي تبي تقوله لك وماتقدر .. واذا كانت حابه انها تعطيك اياه تقراه مافي مشكله واذا مابغت فانك تحترم قرارها .. صدقني مو العلاج انك تسوي لها اللي تبيه بدون ماتفهم شنو السبب العلاج انك تعرف ليش هي تبي هالشي بما معناه انك تفهمها .. في المصارحه كل طرف يحدد ايجابيات وسلبيات الطرف الثاني وشنو يتمنى منه .. علشان تقدرون تصلحون من السلبيات وتطورون من الايجابيات .. لاتلومها وتبين انه هي السبب في كل شي .. لما تكلمها بين لها انكم مو قاعدين للوم والعتاب وانما لاصلاح ماتضرر وتعديل العيوب من الطرفين ...
مع احترامي الشديد لبعض الاعضاء وانما انا مااتفق مع اللي يقول اتركها بيت اهلها وادبها شنو احنا وين عايشين هذي مو حل ابدا .. البنت تعاني وماتنلام واللي يصير غصبا عليها وهو زوجها ملزوم فيها اذا هو ماوقف معاها من يوقف ؟؟؟ لايصير هو والزمن عليها .. البنت عاشت في ظروف صعبه حزت في نفسها واثرت عليها ومحتاجه انها تتخلص من العقد والتراكمات اللي داخلها بالتنفيس عنها .. واعتقد انك قبل لاتاخذها كنت عارف بظروفها فبالتالي لازم تكون قدها وتتحمل نتيجه اختيارك بقناعه وحب وتفهم.. على فكرة ترى حالات التشنج والاغماء رد فعل من اللاشعور نتيجه التراكمات النفسية لجذب الانتباه او الهروب مااقدر احكم بالضبط عدل بدون دراسة للحالة .. بس فعلا البنت محتاجه لاختصاصي في الارشاد النفسي مو طبيب نفسي ..
عموما اخي القلب الحيران اتمنى لك التوفيق في حياتك والله يسعدك ويهدي زوجتك لك ان شاء الله ..
اختكم في الله
روح حالمة
التعديل الأخير تم بواسطة روح حالمة ; 07-08-2007 الساعة 06:00 AM