والله شوفي حبيبتي انا بتكلم عن نفسي وانتي قيسيها على حياتج
انا عندي ولدين الله يحفظهم لي يارب... ولادة ابني الاول كانت بالنسبه لي متعبه كوني كنت بكر وولاده البكر تطول ليما يطلع البيبي لكن ولله الحمد ماصار يومين ثلاث الا وتلاقيني رديت طبيعيه وكأن شي لم يكن.. ما اقصد بهذا اني خلاص حالي حال اي مره غير والده ،، بالعكس التعب تلاقينه في الرضاعه.. آآآآآآآآآه من الم الرضاعه واحتقان الصدر بالحليب ما تصدقين متى ما ينش البيبي من نومه عشان يرضع ويخف ثقل الصدر.. حتى لو رضع يبقى الصدر ممزوووووووور حليب ويباله كذا رضعه على ما يخف( تخيلي كل صدر يباله رضعتين ثلاث عشان يخف ومايمدي يخف صدر الا وحتقن الثاني) بس هذا الكلام يكون للبيبي الصغير لانه يشبع بسرعه والحليب ماشاء الله وايد بالنسبه له... هذي المشكله بتعانين منها في الاربعين وبيبدا يخف كل ما كبر البيبي لكن لها حل.. انج تاخذين بندول او بروفين او تعملين مساج للصدر عشان يخف وينزل الحليب وفي بعضهم يشفطون الحليب ويكبوه وبعضهم يعطو البيبي الحليب الي شفطوه لكني ما انصحك تعطي البيبي حليب مشفوط، لانه ممكن يستحلا المرضحه ويكره صدرج وتدخلين معاه في مشاكل ثانيه
وشوفي سبحان الله الحكمه من كون المرأه في جهاد اثناء الحمل والولاده والرضاعه.. كل شي بأجره ولله الحمد.. اهم شي المرأه ماتتذمر وتتفوه بكلام يروح عليها الاجر
ونسيت اقولج اهم شي.. في الاربعين لما ينمزر صدرج بالحليب لا تنسين ابدا تحطين كريمات على صدرج عشان ما تطلع عليه تشققات وخطوط.. واحسن شي كريم زبده الكاكاو واذا ماعندج استخدمي الفازلين...
وبالنسبه لولادتي الثانيه.. الحمد لله بفضل من الله ولدت بسهوله كبيره ولله الحمد... ما اقصد انه مافي الم.. لكن الحمد لله الالم فتره بسيطه وقصيره وراااااااااااح يعني مو مثل ولاده البكر وهذا شي معروف..
لكن بعد الولاده بساعات حسيت وكأني تدحرجت من فوق جبل .. من زود الالم الي حسيته في جسمي وعظامي وصدري الي امتلا حليب والاحتقان الي ياني.. يتني حمى كنت ارتجف من البرد ونحن في عز الصيف... والحمد لله انقضت الايام وخذت شهر ليما استعدت عافيتي وكنت في امس الحاجه لاحد بقربي يساعدني ويناولني البيبي ويسبحه وينظفه ويجهز لي لقمتي ويسليني ويونسني.. النفاس مو حلو ترا لكن كل وحده تقدر تدفع عن نفسها الضيج والكدر بذكر الله وخزي الشيطان..
وما انسى اذكرج،، اهم شي سويته اني طلبت مره تمسحني لمده 3 ايام بعد اسبوع من الولاده.. كانت تمسح بطني وينزل الوسخ سبحان الله من الرحم وكأن شي ويندفع لبرا وبتشوفين وسخ غريب عجيب ينزل منج.. واذا كنتي تعانين من الم في الظهر.. مساج الرحم بيرحج واااااااااااايد.. حتى مساج اليد والرجل والمفاصل بزيت الزيتون عجيب والله بتحسين انج ولدتي من جديد.. وعليج بمطاره ماء دافئ حطيه على بطنج على طول وشوي على ظهرج وخصرج ومتى ما برد الماء ردي فوريه على طول .. خلي المطاره عندج طول الوقت.. وبالنسبه للبطن عشان ماينتفخ.. حاولي تكونين على طول من بعد الولاده على طول على طول لامه رجليج يعني صاكتنهم عشان مايدخل هوا لرحمج.. ما انصحج بالحزام الا بعد الاربعين لحد علمي انه يسبب الام وايد اذا استخدم لمره توها والده...
هذي تجربتي اتمنى اكون عطيتج الي تبينه من نصايح والله يهون عليج وييسر امرج