السلام عليكم و رحمة الله و بركاته

اختي انا عملت في روضه سنه.. شفت مثل بنتك و أعظم..

الأطفال في هذا السن يخافون من الانفصال عن الوالدين..

و يفكرون أفكار خياليه.. خلال عملي في الروضه يمر علي هالنوع من الأطفال

و طفلتك ذكرتني بطفله كانت عندي كنت استقبل صباحي بصراخها و نهاية الدوام ترجع تصرخ

لأنها تخاف ينسونها.. و ما كانت تشارك في أي نشاط..

تجلس و عينها على شنطتها.. و قبل نهاية الدوام تفتح باب الفصل و تركض لباب الشارع وهي تبكي و مرعوبه..

حاولت اتكلم معها في البدايه كانت ترفض.. بعدين عرفت انها تخاف ان امها تنساها..

و صار بينا نقاش انتهى بأني وعدتها اني اترك جوالي قدامها على الطاوله و إذا تأخرت امها اخليها تتصل فيها..

و سمعتها صوت امها و اقتنعت البنت و اندمجت اكثر مع صاحباتها و ماشاء الله فيها ذكاء مو طبيعي..

بنتك مشكلتها ارتباطها فيك.. أول شي انصحك تدخليها تمهيدي مو ابتدائي عشان عندهم نشاطات و العاب

و هدايا اكثر و بتحببها في المدرسه.. ثاني شي داومي مع بنتك و انتظريها في الساحه فتره طويله

حتى لو استمر الوضع شهر (لا تيأسي ابداً) .. عشان ترتاح نفسيتها و تاخذ على الجو..

اضغطي عليها و لا تتهاوني و تخليها تغيب لأنها بتصير هي تضغط عليك..

بنتك الحين في عمر تفهم و تستوعب.. قولي لها انتي صرتي كبيره لازم تدخلي مدرسه لازم تتعلمي تقرأي و تكتبي..

و اوعديها كل يوم اربعاء إذا كملت اسبوع ما بكت بيكون لها هديه.. ( و أوفي بالوعد)..

شجعيها من اليوم بالكلام قدام ابوها و الأهل انها جهزت اغراض المدرسه و اشترت مريول و اقلام حلوه..

و بعد بدايه دوام المدارس امدحيها في الاجتماعات قدام الأهل (انها تروح المدرسه كل يوم و صارت تعرف تكتب أ ) مثلاً


صدقيني التعب بيكون في البدايه بعدين بترتاحي..

الله يكون في عونك و يحفظ لك اولادك..