منتدى عالم الأسرة والمجتمع - عرض مشاركة واحدة

11-09-2007, 12:10 AM

remany

عضو مميز و مثالي

تاريخ التسجيل: Dec 2003

المشاركات: 870

سواقك سعودي تزوجيه

طبعا بعد كل اجازه ومع بداية كل دوام
اسمع نفس الاسئله مع بعض علامات التعجب
ماتزوجتي؟؟
فيه اخبار حلوه؟؟
ها عسى صار شئ؟
وتتفاوت ردة فعلي بين الابتسام والرد "لو فيه شئ ببشركم"
نفس الاسئله و نفس الاجابات

ومنهن من يذبحها الفضول فتسترق نظرات الى يدي اليمنى يمكن تلمح شئ من هنا ولاهناك
الى هنا كل شئ عادي
لكن اللي مو عادي اللي صار معي اليوم
باختصار اعتبره اكثر موقف محرج ووقح وبايخ مريت فيه بحياتي
وحده معاي بالدوام شغلها الشاغل انا وقضية زواجي
ريماني غريبه ماتزوجتي؟؟ اكيد تتشرطين؟ فيه بنات بعائلتكم كبروا وماتزوجو؟
انتي ماعليك قاصر ليش ماتتزوجين فيه بنات اقل منك وتزوجوا؟؟
اسئله تدل على قلة الذوق وسعة الوجه

المهم
اكتشفت هي ان سواقي الخاص سعودي ومادريت ثاني يوم الا هي عندي بالمكتب
هي :ريماني سواقكم سعودي؟؟
انا : ايه
هي :ملتزم؟؟
انا : ايه ماشاء الله عليه
هي : طيب هو كبير ولاصغير
انا بكل براءه :ممممم يعني يعتبر شاب
هي: تزوجيه طيب
انا بكل عفويه : الله لايقوله

هي: ليش عادي مافيها شئ (كنها تقول وتتشرطين وشايفه عمرك بعد)
انا : لاتعليق
هي: اجل اقعدي انتظري صاحب الحسب والنسب
من جد انصدمت من كلامها خاصه انها كانت جاده وهي تعرض علي اتزوج السواق
واللي صدمني اكثر اني 27 يعني مو كبيره مره لدرجة ان الناس يعرضون علي هالعرض
واللي صدمني اكثر واكثر ان الكل الحمدلله يمدح فيني وفي مواصفاتي
والى الحين يجوني خطاب بس اهلي لهم شروط معينه
انا من شدة الصدمه والله انربط لساني وماقدرت ارد
فيه ناس الى هذه الدرجه من الوقاحه؟؟ المصيبه ان علاقتي معها رسميه
ماادري انا قاعده على راسها ولاعند اهلي؟
لما رجعت البيت ندمت لاني مارديت عليها وخليتها تثمن كلامها
انا والله مااقلل من قيمة السواق كانسان لكن ماارضى على نفسي اني افكر مجرد تفكير
اني اخذ واحد يشتغل عندنا والله لايحدني يارب على هالشئ وكل ناس ولهم مواخيذهم
الى اليوم مو عارفه شلون اتصرف مع هالانسانه؟؟؟؟ وكيف اتعامل معها؟
صدق من قال اللي استحوا ماتو وشبعو موت

__________________

ياااااااارب فرجا عاجلا من عندك
اللهم اغنني بحلالك عن حرامك ومن فضلك عمن سواك
وارزقني زوجا صالحا قرة عين لي