تتكلم العربية الفصحى فيما بيننا .. فما الحل؟؟
السلام عليكم
مساء الخير اخواني واخواتي الاعضاء
مرحبا بكم جميعا
لا أعلم هي مشكلة وشي مذموم او شي محمود وجيد ؟!!
السالفة ومافيها اختي الصغيرة عمرها 10 سنين
تتحدث اللغة العربية الفصحى في البيت بيننا
صح تتكلم بطلاقة لكن الشي يسبب الاحراج لان من يسمعها يتسبب بالضحك احيانا ادا كان احد جالس بينا غريب
وهالشي تكرر وايد
يعني مثلا:
يسألونها شنو غذاكم اليوم ؟
طعامنا اليوم شهي انه سمك
يعني بالعادة بتقول اليوم غذانا سمج احنا بالبحرين نقول سمج هي تقول سمك
انا تناديني اختي العزيزة او آنستي الحلوة تقهرررررررررررني
لما تبي تشوف قناة معينة تقول لي
اختي ضعي لي قناة سبيس تون احب مشاهدتها او اريد مشاهد المسلسل اسرعي اسرعي اختي
وهالسالفة كلها بسبة سبين تون صارت تتكلم عربية فصحى
مثلا تقول لامي: امي ناولني المعطف الجو بارد خارجا في الصباح
متأثرة بشكل بسبيس تون
وماشاء الله عليها متفوقة جدا ومن الاوائل بس الظاهر بتسبب لها بعقده وتتاخر دراسيا لاني ادرسها انا وانا جافة بالتدريس لابعد الحدود واصارخ عليها وايد معا انها ماتعب ابدا وبسرعه تحفظ ماشاء الله عليها وتستوعب بسرعه وحاظفة القرآن قراءة وحافظة سور كثيرة عن ظهر قلب والكمبيوتر يمكن اربع او 5 برامج تعرف لهم بما فيهم المسنجر كل يوم انصدم انها تعلمت شي بروحهابس انا الله يهديني مادري شلون معاها
المهم
بدأت تتكلم فصحى من اخر سنة روضة بشكل قليل
وبعدين من صف الثاني ابتدائي صارت دايما تتكلم فصحى امي تصرخ عليها تقول لها اتكلمي عدل
تقول لامي: لما امي الصراخ حسنا حسنا
احنا صراحة مانقدر نقعد نضحك وامي تطقها تقوم تصيح
تقهر من جد
تحب اللغة العربية والقواعد النحوية عندها اسهل شي في الحياة حتى كتاباتها تكتب اشياء اكبر من سنها احيانا اجذبها اقول مو انتي
تقول لي حسنا اختي اكتب لك امامك دون الكتاب
وتكتب شي يشبه القصة القصيرة او الخواطر مادري شلون تحب التفاصيل في كتابة القصص القصيرة ولكن مازال اسلوبها ركيك لانها لسى طفلة
مع العلم انا اكتب خواطر بس عمرها ماجافت الي اكتبه مع انهم على الكمبيوتر مخزنين هي تكتب من مخها مادري شلون
عندها خاطرة
كاتبه هي فوقها كلمات مبعثرة
بدايتها : انا اجمل منكم لاني اراكم حتى لو غاب القمر
وبعد اسطر تكتب شي غريب عجيب بس يتصل بالسطر الاول
وبالنهاية طلع انه لبنات مجموعتها بالمدرسة الظاهر كانت متزاعله معاهم
غريب عجيب امرها شنو اسوي معاها ؟
لانه الصراحة احيانا تسبب باحراج عليها اخاف تتعقد يعني احيانا تتكلم فصحى ويكون في البيت او بين الجماعة احد غريب يقومون يضحكون عليها وهي تتحسس واحيانا تبجي !!؟؟
الإشراف : تعديل لفظ المشيئة !
__________________
يا جابر كل كسيـــر..!
التعديل الأخير تم بواسطة غـاليــة ; 10-10-2007 الساعة 05:29 AM