عزيزتي غلا
الله يصبرج على اللي انتي فيه و يصلح بينج و بين زوجج .. اسمحيلي اقولج رايي و فكري فيه شوي

انا عارفه انج مظلومة في الوضع هذا من اوله لاخره و انج صبرتي وايد و كنتي تترين ان ريلج يقدر صبرج هذا و يحطج على راسه بس اللي حصلتيه العكس

لكن مع هذا اقول .. انتي فكرتي في حالة ريلج؟؟ فكرتي شو احساسه هو؟؟ يوم يحس انه مو قادر يؤدي واجبه معاج و لا يعطيج حقوقج؟؟ حطي نفسج مكانه ريال لا قادر عالعيال و لا قادر على الصرف شو باقي من رجولته؟؟ شو تتريين منه انه يقول؟؟ حطي نفسج مكانه شوي و اتخيلي هو كيف شايف نفسه و مدى احساسه النقص و الضعف قامج

انتي تقولين انج صابره و ما تطلبين منه شي .. الله يجزيج الخير و يكملج بعقلج ... بس في نفس الوقت هذا مو شي مريح لريلج لانه عارف واجباته و عارف احتياجاتج و احتياجات البيت حتى لو ما طلبتيها

يا حبيبتي و الله ما في اقسى على الريال من ان زوجته او عياله يطلبون منه شي و ما يقدر يجيبه .. البعض يتظاهر بالعصبية او بالبخل او يفتعلون مشكلة مع الزوجة عشان ما يجيبون شي بس في الحقيقة الريال يكون منكسر بس ما يبغي يبين ضعفه

ريلج لو ما يباج ما في اسهل من انه يطلقج و ما بيتريا رايج او موافقتج في لحظه بيطلق . لكنه باقي عليج بس ما بيده شي .. و انتي لازم تكونيله عون .. اصبري عليه .. اتخيلي احساسه يوم يقولج بطلقج و اتزوجي واحد ثاني يعطيج حقوقج .. اكيد هالكلام جرحج بس اتخيي احساسه هو اكيد هو ما قال هالكلام الا لانه حاسس بالنقص و انه مو قادر يعطيج اللي تبغينه و هذا يكسر اي انسان

خلج صابرة و الله بيعوضج على صبرج خير ان شاء الله .. بس لا تكونين انتي و الزمن على ريلج .. كونيله الصدر الحنون اللي يرمي عليه كل همومه .. لو ما كلمج انتي كلميه لا تتناقشون في شي خاصة الحين و الوضع بينكم متازم .. ترى الرياييل ما ييبهم الزعل اساليني انا .. تعاليله بالطيب و بالدلع و لا تحسسينه بنقصه و الاهم لا تحسسينه انج تضحين .. حسسيه انه بالنسبة لج الدنيا و ما فيها و ان وجوده اهم من اي شي ثاني اهم من المال و العيال و هذا الصدق .. شو فايدة ان يكون عندج عيال و طلباتج المادية متوفرة بس انتي و ريلج متفارقين او كارهين بعض؟؟

فكري حبيبتي بهدوء و اتحملي و ارضي باللي الله كتبه لج و ان شاء الله ربج بيعوضج عن صبرج بكل خير

تحياتي