المشاركة الأصلية كتبت بواسطة ابو فراس النمري

اختي غلا ..
تبين نصيحتي وانا اخوك ..

طنشيه ولا تكلميه مثل ماقالك ...

طبعاً قومي بحقوقه كاملة من اكل وشرب ولبس و....الخ.

لكن طنشيه ولاتكلميه..

صدقيني ان الهجر سلاح يستخدمه الرجال والنساء سواءً ..

زوجك الآن في رآيي (ناشز) ...ولامؤاخذة

وباين انه انسان عنيد وراسه يابس ..
لكن انا متأكد انه يحبك ومايقدر يفرط فيكي ابد ..بدليل 13 سنة ماشاء الله لاقوة الا بالله..

هذا اللي بينكم احتقان بسبب ضغوط العيد وعدم الانجاب ..

ونصيحة اخوية ..
اذا ربي يسر امرك مع زوجك إن شاء الله لاتسكتين على نفسك بالعلاج ..

بلا مستشفيات حكومية بلا كلام فاضي ..

والله 13 سنة كثير يابنت الحلال وتستاهل منكم انكم تهتموا بذا الموضوع اكثر ..

الله يرزقكم الذرية الصالحة يااختي ..

نعود لخطة الصمت ..

شوفي يااختي ..

والله الصمت افضل من حواركم مع بعض حالياً ..
انا اشوف في حواركم الكثير من الاستفزاز لبعضكم ..

انتي تقولين كلمه تستفزه وهو يرد عليكي او بالعكس ..

وصدقيني كله كلام زعل وانا اخوكي ..

انتي بس اسمعي كلامي في هذي النقطة بالذات يا غلا واسكتي بالمرة ...

ادخلي مثلا عليه وانتي محضرة براد شاهي وحطيه قدامه ..
رح يقولك ايش هذا ..
قوليله (شاهي ) ..

رح يقول ادري انه شاهي ..انا ماطلبته ..

قوليله ابشر ..اللي تبيه ..

وقومي بهدوء بدون زعل وشيلي الشاهي من امامه وروحي المطبخ ولا ترجعين له ..

صدقيني رح يقدر يفكر بالتالي :
( هذي ايش تبي ؟؟ ...
اكيد انها تحبني بس الشيطان الله يلعنه ..
والله انها وحشتني ...)

صدقيني يااخت غلا ان اغلب الرجال تفكيرهم كذا ..
ينظرون (بالنهاية) الى المرأة على اساس انها ضعيفة وبنت حلال ..

اللي يخرب الحياة الزوجية العناد وانا اخوكي ..

لاتعانديه وقولي ابشر ..طيب ...حاضر ...

والله انك تلقميه حجر ..

وفي النهاية رح يستحي على وجهه وبيجي يتحرش بيكي بالكلام علشان يسترضيكي ..

اصبري عليه ...ترى اغلب الرجال مايعتذرون بسرعة علشان كرامتهم ...

بس والله ان الصمت والهدوء والصبر رح يوصلك الى غايتك ..

اذا كلمك على طلاق وكلام فاضي قوليله بالحرف
( هذا بيتي وانت زوجي وانا احبك وماابي طلاق ..اذا بتطلق بكيفك الله يهديك )

لاتقولي اكثر من كذا ..
لاتقولي انت كل حياتي وانا متمسكة بك و....الخ
ترى اكثر الرجال مايحبون الافلام والكلام الكثير ..

انتي بتلك العبارات تخاطبين عقله ..

ووقت المشاكل لاتخاطبين قلب زوجك ..خاطبي عقله وتقدري تحلينها بإذن الله تعالى ..

الله يوفقك يااختي غلا ..
وطمنينا على حالك ترى انتي مننا وفينا ولك مقدار بيننا ..