عزيزتي جويربة .. الله يصبرج و يوفقج في حياتج .. و يعوضج باللي يستاهلج و يقدرج و يحطج على راسه

انتي ما شاء الله مبين عليج حرمه عاقله و رزينه و فاهمه شو لج و شو عليج .. و الحمد لله ان الطلاق تم بالمعروف بدون ما يسبب الكره بينج و بين ريلج .. او بينه و بين اهلج .. و زين منج و من ريلج انكم حتى بعد الطلاق ما تذكرون بعض الا بالخير ..لان مهما كان اللي صار بينكم فانتوا كنتوا متزوجين في يوم من الايام و بينكم عشره .. فاحتراما للعشره هذي لا تطرون بعض الا بالخير

بالنسب لكلام الناس فيا اختي هذا شي متوقع ... الناس يدورون اي شي عشان يتكلمون عن بعض .. و للاسف مثل ما قلتي دايما يطلعون الحرمه هي الغلطانه سواء بعد الطلاق او بعد اي مشكله تصير مع زوجها .. فيا حبيبتي انتي مالج الا بنفسج و الله عالم من منكم كان صح و من منكم كان غلطان .. مع ان مسألة الزواج و الطلاق هذي نصيب و قدر الواحد ما يقدر يحكم .. يعني حتى في هالمنتدى هني ياما حريم يشتكون من ازواجهم و رجال يشتكون من زوجاتهم و تكون بينهم مشاكل صارلها سنين بس مع هذا الحياة بينهم مستمره .. و من ناحيه ثانيه تحصلين ناس متهنيين مع بعض و المشاكل ابد ما دخلت بينهم و لو صارت مشاكل تكون تاااااااافهه لابعد حد و مع هذا ما يكملون شهور مع بعض الا و يصير الطلاق ..يعني ارد و اقولج هذا نصيب و الواحد ما يملك الا انه يقول الحمد لله و يدعي ان الجاي يكون احسن
فيا عزيزتي لا تحطين كلام الناس في بالج .. ماحد كان موجود معاج انتي و طليقج و لا يعرفون شو اللي كان يصير بينكم عشان يحللون على كيفهم و ينصحونج شو تسوين .. فما عليج من حد و لا تخلين حد يأثر عليج و على ثقتج بنفسج .. و كونج اتطلقتي مو معناه انج فاشله كانسانه او كزوجه .. هذا مثل ما قلتلج نصيب مو اكثر .. و اتذكري كلام ربج عز و جل "وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ"

اسمحيلي عالاطاله

تحياتي لج