منتدى عالم الأسرة والمجتمع - عرض مشاركة واحدة - يوم لايمكن نسـيانه في حيـاتي / انـخـطبت ولكن

01-12-2007, 10:40 AM

غموض السنين

عضو مميز

تاريخ التسجيل: May 2007

المشاركات: 2,173

يوم لايمكن نسـيانه في حيـاتي / انـخـطبت ولكن

السلام عليكم ورحمه الله وبركاته

صبـــــــاح الخــير \ مــساء الخير

امس كان يوم مميز عندي

بحاجات كثيرة

بحاجات اول مرة احسها

يوم اتذكر امس مادري اضحك على نفسي

والا ابكي على خيبتي وتفكيري الاعوج

ويمكن حتى انا مالي دخل

<<<<<ابغى ابرر لنفسي الموقف

يمكن الناس والمجتمع هم الى لهم الدخل هم سبب تفكيري امس

انا بقولكم الى صار وانتم احكموا

كان يامكان
حكايه غموض والاحلام

يوم صااااااااار امس المغرب ناداني ابوي

قالي / ترى فيه رجال يبغى يجيني افتحوا الباب له
قلت انا / من هو يبه

قال ابوي / فلان عمك <<<ابوي الله يصلحه كل واحد من عيلته يقول عمك وهو اصلا مايقربني

انا يوم قال كذا صرت

كذا

تتوقعون ليش

هاة توقعتوا

قلت بيني وبين نفسي والفرحه ماهي سيعتني الدنيا من كبرها

خلاص ياغموض فرجت

ربي ولك الحمد هذا اكيد جاي يخطبني انا واختي الكبيرة لعياله :14:
لان هو ماشاء الله عندة ولدين كبار على وجه زواج ومن فترة سمعت خالتهم تقول يبغون يزوجونهم

انا هنا صنمت قدام ابوي وقلبي يطقطق

من الفرحه

وابوي منهبل مني شافني جالسه اتبسم مايدري وش السالفه

ويمكن بعد داري اني احسبه جاي يخطب ومستانسه

بس مايبغى يبين لي عشان مايحرجني
ابووووي واعرفه اكثر مااعرف نفسي

المهم ماعلينا

قلت ابشر يبه الحين نجيب القهوة <<<مستعدة الاخت

وطيارة لامي تقل خبله اركض

انا / يمه عمي <<<<على طول خليته عمي ماعندي وقت

مع اني من قبل اشوي اضحك على ابوي انه يقول عمك دنيا غريبه مسرع ماغيرت رايي

امي / من هو عمك

قلت لها / عمي فلان

امي شكلتها بعد استانست المسكينه

كلنا والله استانسنا انا وخواتي قلنا اكيد جااااااااااااااي يخطبنا والفرحه باينه بعيوننا

طبعا هذي كل وحدة من خواتي بينها وبين نفسها تقول هالكلام تعرفون مستحياااااااات من بعض

تدرون ليش

لان عند اغلب العوايل

ويمكن عرف عند اكثر القبايل ان الى يجي المغرب يعني مابين الصلاتين المغرب والعشاء يخطبون

مادري عندكم انتم كذا والا بس عندنا

المهم وجهي انا واختي الكبيرة صار كذا

اتخيل لو ابوي جاء يسالنا عن راينا وش نقول لابوي موافقات والا لا

نقول موافقات على طول من الفرحه

<<<اعذروني ماعمري حسيت بالاحساس هذا

ماعمر احد جاء خطبنااااااااااااااااا انا واختي الكبيرة شريكتي بالمعاناة

ماعمرنا حسينا بالخطبه وتفكيرها وشعورها
بقولكم شي لاول مرة اقوله لحد تصدقون نفسي اصلي صلاة استخاااااااارة عشان خطبه وزواج مثل ماشاء الله اغلب البنات
نفسي استشير احد بالخطبه واقول فلان خطبني فلان طلب يدي واشاور واستشير

<<<رحت لبعيد برا الموضوع

المهم خلوني اكملكم سالفه خطبتي

خذيت اشوي وانا كل اشوي ارفع عيوني للباب

اشوف انفتح والا لا

اشوف احد طلع منه والا لا

عشان يعطينا خبر الخطبه

صار هالباب عندي مثل سفينه النجاة الى انتظر فيها من سنين

انتظرها تجي وتنقذني من الى انا فيه <<<<الحمدلله حمدا كثيرا طيبا مباركا

بهالحظات القليله هذي عشت عمر بحاله

من الحلم والخيال والاحلام الجميله

عشت فترة الخطوبه لحظه بالحظه :14:

افكر كيف اذا زعل اراضيه

صرت افكر بالطبخ ياربي وش اعمل له انا صراحه ماحب الطبخ كثير

قلت ياربي اخاف طبخي مايعجبه

حتى اسماء عيالنا اسم ابوهم بيني وبينكم مو حلو

قلت ياربي اصير ام 0000000

مو حلو لكن قلت يالله ماعليه كل هذا يهون عشان ابو الشباب

برضوة هو ابوة ولازم اسمي عليه حتى لو ماكان اسمه حلو كافي انه جاء يخطبني لولدة

الله يكثر خيرة المفروض اسمي الاول على اسمه والثاني والثالث مو هو بعد الله اختارني زوجه لولدة

وش اقول وش اخلي من الافكار الى دارت براسي بهالحظات القليله

صحيت من احلامي على فتحت الباب عرفت انه الرجال راح او بالاصح بتلك الحظات ابو زوجي راح

قلت اوووووووووف اخيرا مابغى يخلص خطبه

افففففف اشوى الحمدلله مو كل يوم ننخطب

اذا طول كل هالتطويله بس عشان خطبه وهو يعرفنا وحنا نعرفهم يعني من نفس العيله

اجل كيف خطبه الغرب الى مايعرفون بعض الله يعنهم

المهم ماعلينا خليك ياغموض بخطبتك وش لك بخطبه الغرب

جلست استنى احد يدخل علي يستشيرني

جلست قلت يمكن يتشاورون بالموضوع

لازم هذا مو لعبه زواج

مصير عمر بحاله عشرة عمر

دقيقتين مرت نص ساعه مرت ساعه مرت ماشفت احد فاتح الموضوع معانا

قلت يابنت مايبغالها اسال واشوف وش الموضوع رحت لابوي

قلت / يبه وش يبغى عمي 000000 وانا وجهي كذا

من الحياء

بس استنى الرد

استنى بالكلمه الى جلست مدة طويله انتظرها

ياما ايام جلست افكر فيها طول الليل

ياما حلمت بهالكلام ايام كثيرة

جاء يخطبك

لكن المفاجاءة

والمفاجاءة الى ماكنت متوقعتها نهائي

والا حطيت واحد بالميه ان جاي عشانها

تتوقعون ليش جاااااااااااااااااااااي

جاء عشان يعالج يد ابوي فيه جرح بسيط

لان ابوي فيه السكر خايف عليه

الله يرحم امأ جابتك ياعمي ابو 00000

صدق انك جاي تخدم ابوي وعامل نفسك دكتور عندة

والله يجزاك خير ويرزقك من حيث لاتحتسب على قلبك الكبير وحنيتك على ابوي

لكن ماتدري وش عملتي فيني بالزيااااااااااااااااارة البسيطه

يمكن انت عندك زيارة عاديه واخذت منها اجر كبير باذن الله

لكن

ماتدري وش خليتني احلم بالزيارة

ماتدري وش كثر فتحت جروح مسكرة عندي

صحيح عالجت جرح بسيط بيد ابوي

لكن فتحت جرح بقلبي كبير

الله يعين بس

السؤال الحين من الغلطان انا

لان تفكيري راح على طول لخطبه

والا المجتمع لان عاداتنا الى يجي المغرب خاطب

بالله مو موقف يضحك ويبكي بنفس الوقت

بس

بس ماقلتلكم يوم مميز اليوم الحمدلله

دخلت المنتدى وانا مايحتاج اكتبلكم شعوري
دخلت والله اعلم وشلون النفسيه بعد ماعرفت سبب الزيارة الغريبه لعمي العزيز

دخلت لكن الحمدلله لقيت خبر روعه ماشاء الله

كتب كتاب اختي وحبيبتي العام ربي ولك الحمد الله يسعدها ويوفقها ويعوض صبرها خير يارب :14:

رجعت ماشاء الله

لااله الا الله النفسيه عال العااااااااااااااااااال

كان خبر كتب كتابها

ميزان ضرب على اعلى شي بعد مكان نازل لاخر شي

الحمدلله الحمدلله

الفرج قريب باذن الله

اسفه طولت عليكم

لكن حبيت اقولكم ان امس كان يوم مميز بالنسبه لي <<<<لانكم صرتوا عيلتي الثانيه

يوم راح اسطر بدفتر حياتي

يوم لايمكن نسيانه

لاني حسيت بااحساس جديد على وهو اول مرة احس فيه

تدرون وشلون عامل احساسي امس

يقولك الشى الاول مرة بحياتك يصيرلك لايمكن تنسين يومه والا احساسه سواء احساس زين او شين

مثل البنت الى اول مرة تصير ام تقدر تنسى هذا الاحساس وهذا اليوم مستحيل

صدق يوم لايمكن نسيانه بحياتي

__________________
ياكثر ماعندك من خير يارحيم
بس يبغى لنا شويه صبر
الحمدلله كما ينبغي لجلال وجهك وعظيم سلطانك