السلام عليكم
حبيت اخوي اعطيك رايي في موضوعك واتمنى انك تشوفه للنهايه واتمنى انه يفيدك

خلنا نروح للبدايه:
عندما كنا هناك أقول لها اشتري هدايا لأهلك وتشتري بكل ثقة
اكيد بتشتري زوجتك بكل ثقه مو انت الي معطيها الgreen light وانت الي اقترحت عليها يعني مو هي الي طلبت وبعدين اغلب الي اعرفهم ورايحين شهر عسل يرجعون لاهلهم بهدايا يعني مافيها شي

وتقول:
وكانت تشتري لنفسها بعضا من الملابس
واذا اشترت لها مافيها شي انت ليه مكبر السالفه يكون في علمك بعض الرجال يكونون في شهر العسل ويوم يروحون للسوق هو يشتريلها هديه يعني ماينتظرها لين هي تشتري ملابس
وبعدين مادامك ماتبغاها تتسوق ليش موديها للسوق

وتقول:
لاحظت أيضا من بداية الزواج انها كسولة ولا تعتني باهميه ترتيب المنزل
انت ليه ساكت ليه ماتبين لها ان الشي هذا مايعجبك

وتقول:
مع أنني احيانا اصرف لها في الشهر الف اوالفين في السوق واحيانا لاتخرج في الشهر كاملا
شي طبيعي اذا احيانا تقعد شهر كامل ماتروح للسوق اكيد بتصرف الف او الفين في الطلعه لانها من زمان ماطلعت للسوق خاصة اذا انتم من النوع الي عندكم مناسبات رسميه شوي يعني مو بس الاهل (الوالدين والاخوان)

وتقول:
راحت الايام توظفت على الاجور براتب فوق الالفين بشوي قلت لها راتب الشغاله عليك قالت (( لا )) قلت ليش قالت اذا الله رزقني وظيفة رسميه وزاد راتبي
تبي الصراحه ياخوي انت مامعاك حق تطالبها ان الشغاله عليها يعني هو راتبها كم 2000 وشوي قل المصروف 1000 والفاتوره 300 كم بيبقى لها للادخار اذا كانت الشغاله عليها
وبعدين مافيها شي اذا طلبت منك احيانا تعطيها فلوس مو انت زوجها ليش مو انت الي تعطيها كل فتره بدون ماهي تطلب تشوف اذا هي تحتاج شي والا لا نفسها بشي وانت قادر عليه والا لا
(اعتبرت ان حالتك الماديه كويسه لان بيتك ماشاءالله 6 نجوم وتسكن في فنادق 5 نجوم)
واذا اعتبرنا ان الدخل بالكاد يكفيك وزوجتك وسفره في آخر السنه فأقول لك مو لازم انك تضيق على نفسك وتسكن في 5 نجوم ومو لازم تسافر لأحلى مكان ممكن الواحد يروح ويتمشى وينسط بأقل التكاليف وقالو قديما (على قد لحافك مد رجليك)

وتقول:
تصدقون اكثر من مرة ندوج السوق كامل ثم نطلع تقول مالقيت شي وأحيانا تلقى شيء ثم نرجع ندور الشئ الأخر القطعة الاخرى في سوق اخر
شي طبيعي اخوي احنا لبسنا مو ثوب وشماغ وتوكل على الله احيانا السوق مافيه شي حلو واحيانا تكون اغلب المحلات بضاعتها كويسه يختلف

وتقول:
واقول احيانا روحي مع إحدى خواتك قابليها بالسوق وتسوقي وخلصينا تصر الا ان أكون معاها وانا ما حب السوق فهمتها ما فهمت ونادرا جدا ماتروح مع اهلها انا اكره كثرة الروحات للسوق
هل رفضها لسبب ام لا؟
انا مثل زوجتك اكثر روحاتي للسوق مع زوجي وزوجي مثلك مايحب السوق
واروح معاه لان الاوقات الي احس ميزانية زوجي تسمحلي اروح للسوق يكون وقت مو مناسب لاخواتي يعني هم مايحتاجون للسوق ومستحيل اقول لاهلي ودوني للسوق لان زوجي مايحبه
وبدون مبالغه الوقت الي اخواتي يروحون فيها للسوق ظروف زوجي ماتسمحلي هو مايقولي بس اعرف من الي يحكيه لي

وتقول:
واحيانا اظطر من الزعل انزلها واقول ارجع لك لما تخلصي
الحمدلله زوجي ماقد سواها وان شاءالله مايسويها يعني انت ماتخاف على زوجتك تخليها لحالها في السوق ماتسمع القصص الي تصير فيه ولو لاسمح الله صار لزوجتك شي طاحت او اغمى عليها من بيكون جنبها ويساعدها

وتقول:
زيارة أهلها: تحب تروح لأهلها بشكل فضيع انا اوديها كل أسبوع مرة على الرغم من بعد المسافة حوالي أربعين كيلو ومع ذلك تحسسني انها مراعيتني والا المفروض تزور اخوانها وخواتها بشكل اكبر مع اني اوديها خواتها أحيانا * أول ماتزوجنا تقول أنت بتوديني لأهلي ثلاث مرات بالأسبوع زعلت انا منها المهم توصلنا مرة با لاسبوع المشكلة انها اذا راحت احيانا تفضل تنوم عندهم واحيانا تقول ودني من الظهر يوم الخميس ؟؟؟
معاك اخوي 3 مرات يمكن صعبه اذا ظروفك ماتسمح بس لاتنسى انهم اهلها ولهم حق عليها مثل مالأهلك حق عليك حتى لو كانت المسافه 40 كيلو مع انها مسافه مو مره طويله هذا غير انه اذا كانو طبيعة اهلها انهم كثيره اجتماعاتهم او امها مثلا تقعد في البيت لوحدها يختلف على حسب ظروف الاهل
وبالنسبه بانها تنوم عندهم مافيها شي واذا قالتلك تبيك توديها الظهر مافيها شي بعد انها تقولك لانها عبرت لك للي بخاطرها واللي تبيه والمفروض منك انك انت تشوف وش السبب الي يخليها تروح وهل هو ضروري ام لا وهل ظروفك تسمح او لا

انا ما أقول ان زوجتك معاها حق في كل الي تسويه بس الغلط الاكبر عليك انت

اسمحلي اسألك هل يوجد بينك وبين زوجتك حوار صريح في هذه المواضيع
حوار هادئ وخال من الانفعالات

اذا كان الجواب لا
اقترح عليك اخوي انك تاخذ زوجتك وتطلع انت وياها لجو هادئ في كافيه مثلا وتتناقش انت وياها في الامور الي مضايقتك وصدقني هذي الامور مضايقتك لانك تكتمها في لحظتها وما تعبر عن الي تحس به في لحظتها

واسمحلي اقولك اخوي انت صاير مثل القنبله الموقوته والله يستر عليك وعلى زوجتك
حاول انك تعطل هالقنبله قبل لاتنفجر
عطلها زي ماقلت لك انك تاخذ زوجتك لمكان هادئ وتصارحها بحب وهدوء بكل الاشياء الي تضايقك منها
فضفض عن نفسك

((( واللي يكبت المشاعر السلبيه بيكبت المشاعر الايجابيه مع الوقت)))

والله يخليك لزوجتك ويخليها لك ويخليلكم البنت الاموره الله يرزقكم برها ويرزقكم باخوه لها بارين بكم
والله يسعدكم دنيا وآخره

وعذرا على الاطاله بس والله هالكلام اعتبره من اخت لاخوها