حبيبتي والله سابرينا صج محد مرتاح
زعلت عليج وحسيت بقهرج من زواجه عليج .. ولا بعد مايعدل !!
صعب الواحده زوجها يتزوج عليها ومايعدل بعد ؟!
الزواج بثانيه لين رابعه حلال بس بشرط العدل ...... بس بعض الازواج يتزوج على زوجته يظن انه بيأدبها والا بيقهرها مادرى انه ظلم نفسه وتحمل ذنب زوجته وفتح عليه باب من ابواب جهنم .... والله ماراح يوفقه في دنيته وفي الاخره يمشي ونصه مايل
وعادة الازواج العادلين بعد مايجربون الزواج بثانيه ماينصحون بالتعدد لمعاناتهم من صعوبة العدل وتوزيع الاوقات بين الزوجتين بالملي
ونفس الشي النفقه حتى لو الزوجه الثانيه تعمل وراتبها ضعف راتبه فهو يعطيها من ماله نفس المصروف اللي يعطيه للزوجه الاولى حتى يكون عادل ولأنه يخاف من عقاب الله في حال الظلم
ومثل هذول الازواج ربي يجيب الطمأنينه للزوجتين ومع الوقت يحبون بعض وعيال بعض لان كل واحده تدري ان زوجها مايرضى الا بالعدل واللي يسويه للثانيه هو نفسه للاولى خاصة اذا كان الزواج من الثانيه كان لسبب ملح وليس نزوه

ولاتزعلين ياعزيزتي وتتهاوشين معاه بسببها لان الزوجه الثانيه بتستغل تنكيدج له وبتتفنن فيه حتى لو ماسوت له ربع اللي تسوينه بس يكفي انها طبطبت عليه وسوت عمرها كانها حنونه واطيب منج
لكن اذا كنتي عادي ومطنشه هي اللي بيطلع قناعها وبيكتشفها زوجك ويعرف انها فيها عيوب مثلج ويمكن انتي افضل منها واللي بقلبج على لسانج مو مثلها وبيعرف ان محد كامل
واظن لو انا بمكانج انا اول شيء قلبي بينكسر منه خاصه اذا كان الزواج بدون عيب مني واظن ماراح اكون مهتمه فيه مثل قبل دام رخص فيني وتزوج علي ولا بعد مايعدل !!يعني لو كان يعدل بيشفع له
وبصراحه انا نفسي ماراح اتغير خاصه اذا كنت مو مقصره معاه ... وبعطيه حسب طاقتي واستطاعتي والا يعني علشان تزوج علي بصير واحده ثانيه (ويني من قبل ؟؟)
بالعكس بكون انا نفسي باصالتي وطبيعتي لان التمثيل وبذل طاقه فوق طاقتي بتكون مو دايمه ومؤقته ومصيري بتعب منها .. حتى الزوج بيمل وبيكون محتاج يعيش حياه طبيعيه وحب طبيعي بدون تمثيل ومبالغه ..
وبعض الازواج اذا لاحظ عقلية زوجاته جذي يستغله ويقعد يقارن بين الثنيتن علشان يتنافسون عليه .. ولو خاف الله ماسوا جذي بس قلة عقل منه ومن حريمه ... وبعدين مو هذي الحركات هي اللي تكسب الزوج وبتمنعه يتزوج في ازواج يتزوجون على زوجاتهم مع انهم مو مقصرين مع ازواجهم بكل شي وفي الاخير يتزوج .. يعني هذا قرار يكون في الرجل ويحدده المكتوب والنصيب
وبنفس الوقت لو انا بترك له المجال وبهدا وبسكت وبتجاهله في مشاعري لين الغموض وانتي سوي جذي لين يشبع من الثانيه ويتهاوش معاها ويرد يدورج انتي ووقتها سوي نفس اسلوب الثانيه وحطي نفسج طيبه وحبوبه وعقلج كبير
وهي اللي بتنجن لانها بتكون تعودت انه يطنشج انتي ويروح لها مو يطنشها هي
ووقتها استغلي عصبيتها عليه وكوني اكثر حنان له ودام ظلمج بيظلمها هي واذا قال لج تعالي نطلع بيوم هو يومها اطلعي علشان هي تحس وتذوق اللي ذقتيه دام زوجك مايعرف كيف يعدل ودام هي تتعدى حددوها سوي مثلها
وخليها هي بعدين اللي بتطالب بالعدل وان محد تطلع بيوم الثانيه
بس لا تتعلقي فيه كثير لانه مو عادل ولمن يزعل منج بيرجع لها ويقهرج فحاولي يكون الموضوع عادي ..... جا عندج عيشي حياتج واستمتعي معاه واشبعي غريزج منه واطلعي معاه وتونسي .... راح لها خذي لنفسج فرصه للراحه منه ...وبجذي عيشي يومج ولاتخلين زوجك محور حياتج ..
وصدقيني كوني بطبيعتج وادعي الله بالصبر .... واذا انظلمتي فربج فوق وتذكري قوله تعالى: (( ولننصرنكم ولو بعد حين ))
ان شاء الله بيكون معاج على طول

والله ياجرك ويصبرك ... ان شاء الله

__________________