اخي الكريم .. الله يتمم لك على خير
انا زوجه ثانيه مو الاولى ... بارك الله فيك واثابك على دعائك وردك الجميل
اما بخصوص سؤالك راح اتكلم بشكل عام وبعده راح اخصص لك ماحصل في زواجي كمثال
اخي الكريم النساء يختلفن في النفسيه والعقليه والتفكير ومنهن من لها نظره بعيده للامور وعلى ذلك تتخذ قراراتها
والاغلب تتحكم فيه العاطفه فتنسى نفسها ومن حولها في ردة فعلها ومهما كانت مكانة الشخص وهذا من شدة وقع
الامر عليها ... وانا لو مكان زوجتك ما اتمنى انه يحصل كل شئ من وراي واكون اخر من يعلم واطلع مثل المغفله
اضحك مع الناس وهم من داخلهم يبكون حالي فعلا امر مو سهل وخصوصا لما يجي من اقرب انسان لي في الدنيا
جداا صعب ومو بهالسهوله يمر علي ومن بعده ماراح اظن ان الامور راح ترجع مثل اول لانه راح يغير بالنفس ويترك اثره ..
اما امر تبليغك لزوجتك انت بس تقرر متى وكيف نظرا لقربك منها ومعرفتك بنفسيتها ومدى تقبلها للامر ودرجة تحملها
ولازم يجي منك انت مو من غيرك ..
ممكن انك تخلي اولادك بعيد عن البيت عشان تقدر تتحكم في ردة فعلها اللي الله العالم كيف بتكون
لانه افضل انهم مايطلعون على مثل هالمواقف .. وانت واسلوبك ولازم تكون عندك اسباب مقنعه لها لهذا
الزواج والله يسهل عليك امرك
اما في زواجي فما عرفت زوجته الاولى الا قبل ليلة الفرح بكم ليله وطبعا من الناس ولانه المشاكل بينهم دايم
فكانت ردة فعلها مو طبيعيه وانا عاذرتها موقف صعب الحمدلله اللي مادخلت المستشفى مثل غيرها
وراحت لاهلها وجلست عندهم فتره طويله ورجعت من حالها مثل ماراحت من حالها وكانت تقول له ليه ماعلمتني
ليه طلعتني مغفله قدام اهلك والعالم كلهم عارفين وانا اخر من يعلم ومن هالكلام ...وهو كان خايف انها تخرب
عليه الزواج وهذا اللي قالته بعد الزواج لو انها عرفت كان خربت كل شئ وبأي طريقه ..
وانت شووف ايش تفهم من كلامي السابق..
فيه كم نقطه حابه اذكرك فيها وانت ماتحتاج ماشاءالله.. اللي هي انك تفصل في كل شئ بينهم ولا تقارن بين وحده والثانيه
قدامهن ولاتذكر فلانه سوت كذا ياليتك مثلها والا ام فلان كانت تسوي لي كذا ابغاك تسوي مثلها ..خلي لكل وحده
حياتها وهي تشكلها بذوقها
كمان فيه نقطه مهمه اتمنى انك ماتغفل عنها وهي انك مع الجديد لاتنسي ام العيال اعطيها وقت اكثر من وقتها واهتمام
وخرجات وهداياوالكلام الحلو ولاتحسسها انو الثانيه غيرت شئ ..
كمان حط في بالك انه الجديده بتكون غير وبيكون لها جو غير وكمان هي متفرغه ولاعندها مسئوليات فاتمنى انها ماتاخذك
وتغيرك على ام العيال.. وانتظر الين تشوف كيف تكون لها المسئوليات ووقتها قارن بينهم مو الان
اخوي الكريم نصيحه اخيره واتمنى ماتنساها وهي العدل ثم العدل ثم العدل لانه انت اللي بتتحاسب مو فلانه او غيرها
لاتاخذك العواطف ترا كله عليك وانت بيدك تخفف عن نفسك وبيدك تزيد عليها
موفق بأذن الله واسفه على الاطاله
تحياتي لك
التعديل الأخير تم بواسطة على امل اللقاء ; 16-01-2008 الساعة 08:59 AM