زواج فاشل ......... صحيح
بس مو بسبب زوجتك الفشل........ أنت بعد سبب في فشل الزواج!!
تبيها تتنازل وتروح لك وانت مو راضي تتنازل وتروح لها
تقول انها تسمع كلام امها وانت بعد تسمع كلام امك قالت لك طنشها وتزوج ووافقت وراحت تخطب لك وانت راضي
اذا تتوقع ان بعد الطلاق زوجتك بتندم لانها ماراح تلاقي مثلك ..فانت بعد بتندم لانك بتلاقي مثلها كثير
وكأنك يابو زيد ماغزيت وفوق هذا بينكم طفل
واذا كانت الاولى ماتحملتها وعندت فالثانيه بتذلك وبتصبر عليها
ليييييش ؟؟
علشان مايقولون للمره الثانيه يتطلق هذا العيب منه
ترى نفس اللي ينقال للحريم ينقال للزوج؟
وأصلا ما أظن أنك بتطلق لو كانت الزوجه الثانيه اخس من زوجتك الاولى وراح تصبر عليها علشان مايتشمتوا فيك زوجتك وأهلها
وبتذكر المثل اللي يقول مايعرف قديري الا لمن يعاشر غيري
على الاقل لو سويت الامر معاها اللحين ممكن تضل ماسك عليها شي وتهددها انك بتطلقها لو راحت وماردت
وانا متفقة معاك انها غلطانه لانه رفعت قضيه عليك في المحكمة لان هالشي مايصير الا اذا الزوجه خلاص ماعاد تبي زوجها ومو معناته نهاية الكون يمكن لقت منك اهمال وقالت بخليه يهتم
وترى سالفة مره تقولك بحرمك من الطفل ومره تقول مابيه ترى مفهومه معناته انها تبيك وقاعده تستفزك علشان تتحرك وترجعها بس انت ياخوي واسمحلي معند ومقفل وماتبي تفكر وكل شوي رمتني بزجاجة الماي اوكي انت خذت حقك وضربتها ورديت اعتبارك وين المشكله ؟؟
ومافيها شي رجل غلطت عليه زوجته ضربها انتهى الموضوع
واحنا دايم نقول للرجل تحمل واصبر لانه رجل وقوي وقدرته على التحمل اكثر من المرأه والا وش فرق هو عن زوجته !!!
ولعلمك اقرا في المواضيع شوف شلون البنت متعلقه باهلها بداية الزواج مو لسنه ولا سنتين حتى لين يجونها اطفال متعلقه باهلها خاصه اذا كانوا مريحينها يعني هذا شي طبيعي في المرأه بس مع العشره خلاص تتمسك ببيت زوجها وتحس انه بيتها هي ومملكتها
انا نفسي اللي اكلمك كثيييييييييييير كنت اقول لزوجي وقت الخلاف والزعل وخاصه واني صغيره بالسن ومرتاحه كثير في بيت اهلي كنت اقوله مابيك وطلقني شكثر اكررها وكل شوي ماخذه هدومي ورايحه بيت اهلي كنت توني 15 سنه وعندي طفل ومين كان الحكيم زوجي راعى سني وصبر علي بتقولي زوجتك اكبر مني اوكي انا كبرت وصرت عشرين سنه وعندي 3 اطفال وصارت مشكله لي بسبب اهله وسكت زوجي وكان سلبي رغم اني اعاني فزعلت منه مع اني أم لـ 3 اطفال !!!ورحت بيت هلي
مع انهم في زعلاتي السابقه كان أهل زوجي يجون بيت اهلي يعتذرون لانهم اللي غلطوا علي ويقوولن البنت حساسه واحنا مانقصد بس هالمره عندوا وحرضوا زوجي علي واكسرها وتزوج وبالمقابل انا طايشه وصغيره وكثير يقولي تطلقي وتوج صغيره وكثير يتمنونج وارمي العيال والخ كلام كثير
وبعد شهرين زوجي كان حكيم وطلعني بيت بروحي ومع ان الامور كانت للحين متوتره بيني وبينه بس وفر لي طلبي وهو بيت مستقل ومع اني ندمت اني رجعتله لانه تغير علي ( كانوا اهله يحرضونه علي وانه يسوي كذا وكذا ينغص علي علشان لو زعلت ماعندي حجه بس بعد زعلت ومن زوجي !! ) يعني في خلاف في الحيااااااه الزوجيه بس تغير حالي للافضل وحسيت بالمسؤولية وتقربنا انا وزوجي اكثر وبالنسبة لأهله مع اني ماكنت ابي ازورهم واشوفهم الا اني قلت خلاص دام طلعت بيت بروحي بتحمل منهم اي شي ونسيت وزرتهم ومع الوقت صفت النفوس ورجعت المياه لمجاريها وعلاقتنا ممتازه والحمدالله وزوجي ساعد على تحسن العلاقة
قبل كنت اسمع من أهل زوجي الواحده المفروض تنسى اهلها وتتمسك بزوجها... والخ
بس ماكنت اتقبله ... وبعد ماكنت أحس بالراحه في بيت اهلي واحب انام عندهم
تغيرت 280 درجه ومستحيل انام في بيت اهلي احس اني غريبه وبيتي هو بيت زوجي وعيالي ومستحيل افرط فيه
انا قلت لك قصتي علشان تعرف أن المشاكل في كل بيت ولعلمك انا لين اتذكر تهوري وكيف كنت مستهينه بالزواج وكيف فكرت في الطلاق صدقني اقول لزوجي انت طلعت حكيم واعقل مني والا لو علي من زمان تطلقنا وصج العصمه تكون بيد الرجل لانه احكم واعقل من المرأه ودايما اذكر زوجي وامدحه انه عرف يحكم بيته ويحافظ عليه وماكان متهور مثلي ... وهذا الفرق بين الرجل والمرأه
وانا في مشكلتك ماشوف فرق بينك وبين زوجتك قاعد تذمها لنا وفضحتني ومافيها خير ... وتقول بطلق وبسوي ومابيها ومو راضي تتنازل !!
على الاقل يا اخي خلها تكبر بعينك اذا تنازلت لها شوي وترى مأجور ان شا ءالله لاتخلي ابليس يسيطر عليك
واذا على قولتك فيها كل عيوب الدنيا خلاص سو اللي تبيه وجرب طلقها وتزوج غيرها
ولاتظن الثانيه ماراح تحب اهلها وبتتمسك فيك ترى عشرة عمر ماتختفي فجأه بسبب الزواج هذي مشاعر ودم وصلة وانت المفروض تقدرها وتعذرها انها بنت مو رجل تقدر تتخلى عن أهلها وبالعشره الحلوة والمعاملة الطيبه بتتعلق فيك وفي النهاية بتكون انت زوجها وسندها وعزوتها وبيتها وحياتها وكل شي بس اصبر
والواحده اللي تتخلى عن اهلها بسهولة بعد ماعاشت معاهم عمر بتتخلى عن زوجها بعد
وهي ماحبت اهلها بين يوم وليله وانت بالعشرة بتحبك خاصة وانها بتعيش معاك في بلد بعيد عن اهلها
وللعلم هي ماتبي اهلك لانها زعلانه من تصرفهم معاك وتحريضك بانك تتركها ووتزوج عليها وامك تبي تخطب لك بالله عليك تبيها تحبها وتقولك تعال معاهم اكيد بتقول مابيهم
خلك الحكيم وتصرف بدون علم اهلك مافيها شي خلك تكبر بعين زوجتك واهلها ولين ترتب امورك تكلم ابوك يروح معاك ترد زوجتك خلك دبلوماسي وارض كل الاطراف
وزوجتك بعد ماتسوي اللي عليك معاها وترجعها ( وانا متأكده أول ماتشوها بعد غياب بيطيح الحطب) سو حدود بينك وبينها لازم ماتتعداهم واحس لاهلها تحسن لاهلك ولا تتكلم عن امها علشان ماتتكلم عن امك وخلك حكييييييييييييييم
ونصيحتي لك ...
انا اشوفها فرصه تتنازل وترجعها اللحين وهذا الوقت وهي حامل علشان تختبرها وتختبر نفسك قادر تستغنى عنها والا لا وقادر تغيرها للافضل
علشان ماتندم في يوم لو طلقتها وتكون سويت كل اللي عليك
واللحين افضل ترجعها لانها حامل بعكس لو رجعتها بعد ماتولد لانها ممكن تحمل مره ثانيه ويكون في طفل ثاني وضحية جديه فجذي افضل تدرسها وتشوف تقدر تتحملها وتشوفها تغيرت والا لا وتحسب امورك صح

والله يوفقك ويهدي بالكم ويكتب اللي فيه الخير

__________________