عزيزتي تضايقت من أجلك.. أدعو الله أن يبدل صدمتك في زوجك وهمك بالفرح وراحة البال.

أختي الحبيبة،
العلاقات المحرمة والمتعددة ممكن لا سمح الله تنقل إصابات بأمراض جنسية ومنها (الأيدز) والعياذ بالله، فما تخافين على نفسك من الحياة مع شخص ممكن يتسبب لك بمشكلة كبيرة في المستقبل؟؟
وبعدين يرضيك تكونين زوجة لرجل كاذب ومخادع؟؟... يكذب عليك ويتفنن في الكذب وانتي عارفة انه يكذب بعد مشاهدتك للفيديو!!
ثقي انك اذا استمريتي معاه بعد خيانته وكذبته انه بيكذب عليك في كثير من أمور حياتكم وبتصير حياتك معاه مقالب "هذا إذا ما كانت من البداية كذا، لأنه واضح من أسلوبه انه شخص خبيث".
وعليه؛ نصيحتي لك الحين انك تفتحين جواله وتنقلين الملف لجهاز كمبيوتر ومن الكمبيوتر إلى سي دي وتحتفظين فيه للمستقبل. يعني خليه سلاح لك في حال استمر في طريق الحرام والخداع.
وفي هالفترة حاولي تصلحين من شأنه بالنصيحة بطرق غير مباشرة، كالتلميح عن الأمراض الجنسية وعاقبة ارتكاب الزنا وشرب الخمر. حاولي تثيرين الوازع الديني فيه بتخويفه من الله ومن ثم كلام الناس. هو طبعاً بيسوي نفسه انه مثالي قدامك وانه يأيد كلامك بس أكيد في داخله بيفكر في كلامك ويتذكره لاحقاً كل ما حب يرجع للحرام. بس هذا إذا عنده ضمير لأن بعض الرجال ما فيهم إحساس ولا ضمير ولا يحسبون حساب لأحد أو حتى رب العالمين والعياذ بالله.
واذا ما نفعت معاه النصيحة اهجريه واطلبي الخلع والدليل بيدك، خذيه معاك للمحكمة وطلاقك بيصير ورغماً عن أنفه. ولا عليك من كلام الناس ونظرة مجتمعنا للمطلقة، أهم شي راحتك نفسياً بنبذ القلق والحيرة والخوف من وقوع مصيبة في أي لحظة، واذا جاك أيدز والا غيره- لا قدّر الله- لحظتها بتندمين وتقولين ليتني ما قعدت عنده بعد اللي شفته منه دقيقة واحدة!

أما اذا تحبينه لدرجة انك تفضلينه على ذاتك فهذي حياتك وانتي حرة في النهاية. بس حبيت أحذرك لأن مرت علي قصص مخيفة ويقشعر لها البدن عن زوجات انتقل لهم الأيدز عن طريق أزواجهم وماتوا معاهم والسبب الرئيسي كان سفر الرجل إلى الخارج للهو مع العاهرات. والأسوأ أن منهم اللي نقلت المرض لولدها وهي ما تدري! طبعاً السبب الزوج الخاين!


الله يهدي جميع رجال ونساء المسلمين