بصراحة من أبشع المشاكل اللي شفتها !
الله يصبرك على هالأشكال ويعينك و يبدلك خيرا منها .
الغريب لها سنتين وما تطبخ على سنع وتبغى شغالة وهي ما عندها أطفال ايش هذي؟!
احنا والله جينا من بيت أهلنا ما نطبخ ولا بيضة، والحمدلله من بعد شهر العسل طبخنا وكل شي مشى
إذا ما تبغى تسوي هالأشياء ولا تعطيك حقك في الفراش على أتم وجه ايش وظيفتها أجل؟ بس تاخذ منك فلوس !
أما عن هذا الكلام:
اقتباس:
المشاركة الأصلية كتبت بواسطة حنون. بس متعذب
جزاكم الله الف خير يااخواني الغالين ماقصرتو والله.. بس صار تطور معي اليوم.. دقيت عليها ابشوف وش وضعها حاليا لاني
ماابي اظلمها وبعد السلام بدت تسال عن اخباري وانا اقولها بخير قالت انا ودي ارجع لك.. بس انت جرحتني بالطلاق..
ولازم ترضيني قلت لها فوق انك غلطانه تبيني ارضيك بعد؟؟ الواجب انتي اللي ترضيني؟؟ مو انا يازوجتي العزيزه قالت انا
ماابي شيء كبير ارضني لو عن عيون الناس بس... قلت وش المطلوب قالت امي شرهانه عليك.. لانك طلقتني بتسرع
ولسبب تافهه وعرفو الناس.. وطبعا هالشيء اثر علينا كعائله وانا عندي اقرباء ومعارف وهالشيء اثر عليهم وطول هالثلاث الشهور حالتي النفسيه تعبانه .. ودقيت عليك ومارديت علي عشان كذا لازم ترضيني بشيء يستاهل ويملى عيني وهالشيء ماحد يعرفه الا انا وانت.
ويخلي امي مطمأنه علي لانها انصدمت يوم طلقتتني وماتوقعتك كذا... قلت ابي الزبده الله يخليك قالت انا مستعده ارجعلك واسوي اللي تبي بس تكتب باسمي شيء.. لاني خفت يوم طلقتني؟؟ انك تكررها معي اذا رجعنا لبعض..
لاتسالوني عن حالتي يوم قالت لي هالكلام.. قلت وش اكتب لك؟؟؟ قالت اكتب العماره اللي عندك بالشرقيه باسمي.. وهالشيء ماراح يأثر على علاقتنا لانا نبقى زوجين وحبايب واللي لك لي وفلوسك هي فلوسي.. بس انا اخاف من
المستقبل وانصدمت يوم طلقتني انك تكررها وبعدها اضيع... انا قلتها يصير خير إن شاء الله ... ومع السلامه... وسكرت
السماعه... هاذا اللي دار بيني وبينها يااخواني ومازدت عليكم بحرف والله عندي احساس ان امها هي اللي قايله لها
هالكلام.. امها هي اللي مغيره تفكيرها هاذا مو اسلوبها.. ... بصراحه ابي ردكم باقرب وقت لاني ابحسم امري قريبا باذن الله
|
ماشاء الله عليك ما سكرت في وجهها وصرفت النظر عن إرجاعها! شكل الطلب عادي عندك :/
والله ما ودي تطلّق البنية بس بعد اللي قالته! شي مو معقوووووووول وقلة حياء وتفكير سطحييييي إلى أبعد حد ! يوم قرأت ردك الأخير ما قدرت أسكت والله! معقولة في أحد في هالوقت يسوي كذا، أحس الناس اللي تفكيرهم كذا نادرين ولله الحمد وإلا كان خربت البيوت.
هو صحيح على قولتك مية بالمية أمها مأثرة عليها وهذا مو كلامها بس حتى ولو والله بتتعب معها دام هذي أمها وهذا تفكيرها الله يخلف، المفروض الأم يكون تفكيرها أكبر من كذا ولو كان تفكير البنت معوج تعدله بس هذي العكس، هذي كيف ربّت بنتها؟! أكيد على الماديات والفشخرة والمظاهر ونست تربيها على الأهم على الجوهر وعلى الأخلاق الحلوة وحسن التبعل والحب الصادق وإرضاء الزوج، انت ماشاء الله عليك مو ناقصك شي أبدا لا ماديا ولا معنويا بس هي ما قدّرت النعمة، متأكدة لو ربي كاتب لك وحدة ثانية عاقلة وعاملتها بطريقتك والله راح تشيلك فوق راسها وتخدمك بعيونها بس نصيبك طيحك في ناس أنانيين.
اللي أقصده انك مهما حاولت تعدلها خلاص البنت واثقة في أمها وعلى هالأساس متربية ولو تغيرت بيكون تغير بسيط لأن جذورها قائمة على كذا.
ولا تتوقع انكم لو تفاهمتوا و رجّعتها بتضمن ما تطلع لك طلعات أشنع، بعد ولادتها تبغالها هدية طقم ألماس وإلا ما راح ترجع من بيت أهلها هههههه و قس على ذلك.
المشكلة اللي تربت على هالأشياء كيف بتربي عيالها؟ صعب جدا تعيد تربيتها وتعلمها الصح من الغلط لأنها أبدا مو صغيرة، أنا أصغر منها والحمدلله متزوجة من حول السنة ولا شفت من زوجي ولا هدية ولا حتى وردة ولااااا أفكر أطلب منه عيييب والله! والسفر يكفيني أي شي وقنوعة مع اني متعودة على أشياء غير، بس لأنه مكفيني ومو مقصر معي ومرضيني بأخلاقه ولطفه فأحاول أرضيه بكل شي وأبعد عن الأمور اللي تزعله وأكيد الحياة لابد فيها من منغصات ومشاكل صغيرة بس أحاول قد ما أقدر أداريه وأحتوي المشكلة وما أكبرها.
المهم انك لو فكرت تتزوج مرة ثانية اسأل عن البنت وأخلاقها وشكلها وأهلها، لا تهمل شي على حساب الآخر، لا تاخذ وحدة حلوة وأخلاقها شينة، وبرضو لا تاخذ وحدة أخلاقها حلوة بس شكلها عادي، البنات كثير وطلبك مو صعب وانت تستاهل، وغالبا اللي من مجتمع محافظ تكون ماتهمها الماديات.
بصراحة كنا نراقب وساكتين على أمل تنفرج لك وتلقى حل بس بعد سالفة العمارة ياإلهي! صار لازم نقول رأينا و الله يوفقك .
التعديل الأخير تم بواسطة نجاح.. ; 19-02-2008 الساعة 02:49 PM