السؤال:
أنا فتاة عمري 25 سنة أواجه مشكلة في الزواج:
(كل ما يتقدم لي عريس أحس بعدم القبول. إن شكله مش عاجبني ودمه تقيل أو إنه مش هو اللي في خيالي.. أخذت فترة كبيرة جداً على الحال ده، والعمر يجري (وأنا والحمد لله على قدر من الجمال وعلى قدر كبير من القبول ومحبوبة ولله الحمد، ومحترمة وأخاف ربنا) وبعدين جاء لي مهندس.. أهلي وكل اللي حولي قالوا لي: ادي نفسك فرصة اتخطبي له، جربي بدل كثرة رفضك ده، يمكن ترتاحي والشكل مش كل حاجة (هو إنسان مقبول شكلا، جيد خلقا، أهلي يحبوه جدا).
استخرت ربنا ووافقت على قراية فاتحة، جه عشان نجيب الخاتم قولت له: إني مترددة مشى واعتبره رفض لكن أهلي زعلوا مني لأني عملت كده. أخويا اتكلم معاه ورجع وقرينا الفاتحة! أنا حاسة إنه إنسان طيب لكن بستتقل دمه لما يهزر، حتى نظرة عينيه مش بحبها وساعات ضحكته طريقته في الكلام ولا طريقته في اللبس. مش حاسه إنى فرحانة بيه زى أي بنت فرحانة بخطيبها ولا فخوره بيه ولا نفسي الدنيا كلها تشوف خطيبي زى ما كنت بحلم، مش شايفة فيه أي حاجه من أحلامي لا شكل ولا روح، كنت بقول أتغاضى عن الشكل الروح أهم. هو مستوى مادي وعلمي وخلقي أهله ناس متدينين وطيبين.
ودلوقت أنا مش عارفة أعمل إيه؟ إيه الصح هل أحبه بعد الجواز زي ما كلهم يقولوا لي وإلا لا؟
أنا مش قادرة أسيبه لأنه واقف قصاد أهله عشان يأخدني أتعلق بيه جدا وبيحبنى، وهما معترضين لأنهم حاسين بترددى خايفين عليه كلهم بيقولوا ماتكملش لأنها ها تسيبك في أي وقت ومش ها تتجوزك، وهو شارينى. وأنا حاسة إني لو سبته ربنا ها ينتقم مني لأني هأبقى بظلمة فع! لا وفى نفس الوقت أنا بتمني انه هو اللي يسبني سيبقى ضميري مرتاح. أسيبه طب وبعدين العمر بيجري الشهر ده هأبقى ماشيه في ال26 سنة طب وبعد ما أسيبه هأرجع تاني لمشكلة أن يجي لي عريس وأحس أنى مش قبلاه وأرفض (أنا والدتي صلت استخارة لي، وحلمت مرة أنه نائم جنب أخويا ومره جنبى والله أعلم تفسير الحلم ايه نفسي أفسر الحلم ومش لاقيه حد يفسره ولى) دبروني إيه الحل لو تحسوا بالنار اللي في قلبي حاسه بحزن شديد كنت ولازلت أتمنى من الله سبحانه وتعالى إني أتجوز إنسان فرحانة بيه راضية بيه معجبة بيه ومتدين وأعيش حياه هادية سعيدة لكن لو أعرف الصح ايه عشان اعمله وأنا مرتاحة وأرضى بقسمه ربنا لي قولوا لي اعمل ايه؟ وادعيلى بالهداية للصواب وبالسعادة . أرجو الرد عاجلا للضرورة).. والسلام عليكم ورحمه الله وبركاته.