بسم الله الرحمن الرحيم


أحبائي أخواني و خواتي أعضاء و عضوات المنتدى الكريم ..انا مشتركة جديدة في المنتدى و ما جذبني فيه هو اني لو طرحت مشكلتي بلاقي من يسمعني و يفهمني حتى ولو بالمتابعة و ان شاء الله مشكلتي تكون واضحة والاقي لها حل ..

بصراحة ما بعرف شلون أبدأ بس راح اسردها كالقصة عليكم ..


انا عشت الحمدلله ال 18 سنة السابقة بعز و نعمة و راحة بال بين امي و ابوي و اهلي بدون مشاكل و بتوفق ما شاء الله بالدراسة ..لين ما جا اليوم الي دخلت علينا زوجة اخي الصغير (علما ان اخي الاكبر بدون زواج ) ..بدأت حياتي تتدهور شيئا فشيء و من هنا بدأت المشاكل بيني و بين أمي الي كانت تفضل زوجة ابنها علي و على خواتي ..تعاملها معاملة العبيد و تخدمها و تخدم اخوي احسن خدمة ..ما تقصر عليها لا في معاملة مادية ولا معنوية و دايما تبديها علينا و على حتى نفسها ..علما انها عايشة معانا بنفس البيت لكن بالطابق العلوي لكنها ما تنزل الة وقت الوجبات لانها تاكل معانا يعني اكثر الاوقات تنزل الطابق الارضي لما تكون تبي تتغدا و زوجها ما معاها او تتعشا احيانا ..وتكون جلساتها غالب الاوقات مع امي لما يكون زوجها برة البيت علما بانها اكبر مني بالسن وما عندها شي شاغنها و صار لها 5 سنوات و ما أنجبت عيال ( الله يعطيهم ان شاء الله الذرية الصالحة) ....يعني باختصار امي تعاملها معاملة جدا جدا خاصة ولا ترضا عليها حتى بنسمة الهوا تحبه حب اكثر من الطبيعي و بشكل ساذج جدا ..يعني ساعات تروح تقعد معاها فوق وهي تاركة اشغالها المنزلية و تعاملها كانها بنتها واذا نكون كلنا جالسين عادي ان تفشلنا جدامها ..وهي من النوع الة تكون مستقلة جدا يعني ما تطري سوالفها ولا شي عن حياتها مع اخوي ولا جياتها و روحاتها و دائما تكون في بيت ابوها اذا كان اخوي في شغلة و قليل اذا جلست في الشقة لحالها و اذا جلست تكون مجبورة و غصب عنها و تشغل نفسها بترتيب شقتها و تنظيفها ..
انا الحمدلله الله وفقني قبل سنة و شي و عقدو علي (ملكة) و بديت شوي شوي ابتعد عن البيت لانة احس امي ماهي امي القبلية و اصبح انشغالها و اهتمامها منصب على ولدها وزوجتة و انا احتاج الى انسان قريب مني و هي امي خاصة ان دراستي الجامعية جدا صعبة و محتاجة راحة نفسية و جو مريح بالبيت لكن للاسف ما لقيتة لان زوجة اخوي تتعمد تعمل فوقة في شقتها لما يكون زوجها بالعمل يا انها ترفع صوت التلفاز او تكنس بالمكنسة فوق البلاط بقوة كانها تكسر شي فوق روسنا و كل هللوقت كنت صابرة و مستحملة الوضع و قلبي دامي على امي الي كانت ما تصدقنا لما نقول لها انة زوجة اخوي رافعة صوت التلفاز او شيء من سواياها لي تسويها لنا و تبهدلنا انا و اختي ايام الامتحانات و هي تدري انة عندنا امتحانات لكن ما تحب لينا الخير و تغير منا و مني انا بالذات لاني ملوك علي و بنفس الوقت ادرس و اانا اصغر منها بالسن و اهتم بالموضة و الحركات هذي و هي ما تحب تدرس لكن زوجها ودة تدرس وتحب التسوق و شياء الالكترونيات و سوالف الفوتوشوب ..كانت تغار مني من يجي خطيبي و زوجها مو بالبيت تتصل له تسال متى بترد ..ولما تشوفني بطلع اغير جو مع خطيبي هي بعد تقلدني ووتطلع على الرغم انها كثير تطلع من البيت ما يطوف يوم ما تطلع ..المهم انة علاقي بدات اقوى شوية لما انا انخطبت لكن ما لقيت منها سواء التحبيط و التفشيل اكثر الاوقات حتى و اخوي و ابوي جالسين معانا ................
عاد جا اليوم الة ما قدرت استحمل و مثل ما نقول طلعت من طوري كان عندي امتحان و احتاج لدراستة وقت و جهد طويل وكنت اسهر للصبح بالدراسة فكنت تعبانة و سهرانة بنفس الوقت و لازم ادرس بعد لكن قلت خل اريح شوية و انام ..قمت بنام بالغرفة ما سمعت الة صوت المكنسة تكنس فيها زوجة اخوي في الغرفة الي فوق الغرفة الي انا نايمة فيها و يا الله صوت الكنس و تحريك الكناسة شي غير طبيعي يفجر الراس ..اخذت روحي قلت اغير الغرفة ..بعدها غيرتها رحت الغرفة الثانية و نفس الشي جت تكنس الغرفة و ارضيتها بلاط و حركات الكنس ..المهم استمر الحال و انا اتنقل من مكان لمكاان حتى اني وصلت الى اني انام بغرفة نوم امي و ابوي ...و جائت تكنس ..ياربي عليها عنيدة و فاضية كانت تكنس السطح و هو مالها داعي تكنسة لان محد يكون فيه ولاهو بوسخ لين ديك الدرجة !! و كنت منسدحة من الساعة 3 الظهر و أذن اذان المغرب و انا عيني ما غمضت ابدا و معدتي ألمتني و انا اعاني من مشاكل فيها وحموضة ادبحتني و احس ان ضربات قلبي كان قلبي بيخرج من جسدي من كثر التعب و القهر عليها و الخوف بعد لاني ما بقدر ادرس وانا على هالحال ..بعدها جاءت امي قلت لها اني ما نمت بسبة صوت المكنسة و حركاتها و فوضتها ..تدرون وش ردت امي ..تقول وي مسكينة عاد اليوم بتدبح نفسها من كثر الشغل بالشقة !!!!!!!!!!!!!!!!!!!!!!!!!!!!! و لا فكرت فيني وانا بنتها و كنت جدا مظهري يبين اني تعبانة و كنت اقول لها قلبي يعورني و امي تتجاهلني و تكلمني كاني كذابة و كانت مو مصدقتني بالبداية بعد !!!!!!!!!!!!!!!!!!!!!
المهم جا اليوم الثاني و كنت رايحة بالصدفة المطبخ بتغدا الة و امي جالسة تسولف مع حبيبة قلبها زوجة اخوي و هم يسولفون كانت تقول زوجة اخوي (امس بعد كنست السطح ) قلت لها انا من باب ان اخوها بس يعني انتي الي كنتي تكنسي السطح ؟ قالت لي اي انا كنستة وش فيها ؟ قلت لها و الله ما فيها شي بس اسمحي لي و الله انا دعيت على لي كان يكنس و انا مدري انتي لي كنستي او لا .. لاني كان عندي امتحان و صراحة انتي زعجتيني مرة مرة و تعبت من معدتي و ما درست .. كانت امي بعد جالسة معانا تدرون وش ردت علي قالت لي سود الله وجهك يا سودة الوجه انتي تدعي علي و انتي كذابة لانة مو انا لي كنست السطح انتي تتخيلي و جلست تضحك و تناظر امي ........!! و الله انا بهالموقف ما رديت عليها ولا كلمة غير اني كانت شوي و الدمعة بعيني كنت اقول لها امس انا رايحة المستشفى و اعمو لي تحليل و طلعت النتيجة ان عندي بكتييريا كثيرة في معدتي ..قالت امي : يعني انتي البارحة بالمستشفى وهي مستغربة ؟ لانة ما تدري باخباري ولا شي ...الة تقول زوجة اخوي : و الله عاد مو بس انتي فيج المعدة انا بعد معدتي قلت لها انا قالو لي فيني بكتيريا انتي بعد ؟؟ قالت لي لا يعني تصورو تغار علي حتى بالمرض !!!!!!!!و امي لما سمعتها تقول سود الله وجهك وولا تكلمت ولا قالت شي ساكتة !! و رحت و جبت الدواء الى امي اوريها وياه قامت اخدت الدوا من يد امي بدون استاذان تقرا وش عليه مكتوب تقول اييي هذا مثل دواي و هذا بعد بس هذا لا ماعندي ..يعني تبي تثبت الى امي انها مريضة وهي مريضة مثلي و تبي امي ما تهتم لي لانها غيورة و انانية بالقعل و في مواقف كثيرة تشهد كلامي بس ما في مجال اطول اكثر

بعد كم يوم قمت ابكي خلاص و خبرت خطيبي اني قررت ان نتزوج حياتي في بيت ابوي صارت دمار مع امي و زوجة اخوي وانا ما اعرف اذاكر ابدا وكنت اضغط على نفسي عشانة لانة كان هو مو مستعد ان يتزوج ...لين الحمدلله اليوم قررنا نتزوج بس نعمل شيء بسيط جدا و نعزم في الزواج بس المقربين جدا و الاحباب الة ما لنا غنا عنهم .. عاد تسالني امي اعزم اهل زوجة اخوكي ..قلت لها لا ما ابيهم يحضرون زواجي ..قالت لي ليش هالحقد فيك هم وش مسوين لك ..قلت لها خلاص مدام هم خواتها ما ابيهم يحضررون وانا اقول بقلبي و الله بعد لو ما عشان خاطر اخوي الة ما اخلي امي تقول لها لكن ان انا بنفسي اعزمها لو تنطبق السمما على الارض ما انزل نفسي الى اشكالها لانها ما تحترمنيو تقذف علي الكلام في بيت ابوي وهي غريبة و اصبحت هي صاحبة البيت و العمة مالها اهمية عندها و ترفع صوتها علي جدامها !!
قلت الى امي بس هي لوحدها معزومة اما هم ما معزومين واانا بعد ابي الاهل بزواجي وهم ما ابيهم في حفلتي وهذا شي راجع لي ..قالت لي امي ترة اذا ما عزمتهم ..قلت لها لا تكملي اعرف وش بتقولي انش ما بتحضرين زواجي !!!!!!!!!!!!!!!! و سكرت الباب و راحت

تصورو امي ما تحضر زواجي عشان ان ما بعزم هالناس الة تبيني اعزمهم ..وهم ما مهمين ان اعزمهم بالنسبة لي خاصة انة القاعة جدا صغيرة و انا ما مستعدة اني اخلي الناس المهمين عندي يوقفون بدل ما يجلسون على الكراسي عشان و هذولا الة ما ابيهم جلسو على الكراسي ؟؟

صراحة احس امي ما تحبني اذا بتسوي لي كذا عشان خاطر زوجة ولدها الة ما تحترمي ولا تقدرني و تتلفظ علي بالكلمات الة تدل على اخلاقها

يا ناس دلوني شسوي ويا امي و شلون احل هالمشكلة ؟؟ ما اتخيل امي ما تجي عرسي اتخيل نفسيي اني بموت من البكاء ليلة زواجي و اتوقع امي حتى لو حضرت زواجي اكيد بتسوي الة براسها و تعزمهم وانا ما ابيهم و لو اني شفتهم بموت من القهر و لا بيدي شي اسويه و بتخليني امام الامر الواقع ؟!

الاشراف : يمنع وضع روابط خارجية .