أختنا فى الله السلام عليكم ورحمة الله وبركاته
إسمحى لى إنتى مثل أختى الصغيرة وأنا بصدق أريد أن أنصحك فى الله ولله . عنوان موضوعك ( أفيدونى هل أنا على صواب؟) أختى أجيبك لأ أنتى مخطئة مليون بالمية . إيه المشكله انه سابك وراح اشتر شاحن هو ما سابك فى الشارع ولا انتى عايشة فى غابه وكل من حولك ذئاب بشرية !! هو تركك فى غرفة يعنى مقفول عليكى باب وفيه أمن وفيه ناس يعنى احتمالية أن تتأذى (صفر) يبقى ايه المشكلة وليه النكد. ما تزعليش منى أنا بس بأوعيكى وانتى لسه فى أول المشوار . طيب لو كنتى متزوجة طبيب عنده مناوبات بيات فى المستشفى معظم أيام الأسبوع وحتى لو اتصلتى عليه فى أحلك الأوقات تلاقيه داخل غرفة العمليات ولا يرد عليكى كنتى عملتى ايه .أو لو متزوجة ضابط ونفس الحال . أو أو . حبيبتى الزواج هو بداية المسؤولية ليس على زوجك وحده انماعليكى أيضا أقولها لكى وبصراحة أكبرى وأعقلى وسيبك من تفكير الأطفال انتى الآن أصبحتى كبيرة وناضجة ووالله العظيم أنا لو لاقيه ان زوجك أخطأ لكنت غيرت كلامى تماما لكنى أحس انه ما أخطأ أبدا تعرفى أنا لو حصل معايا موقف الباب ده كان ايه اللى جرى كان اتهزأت لأنى لم انتبه للباب ولم آخذ مفتاح البيت معايا تحسبا لأن الباب ممكن يسكر وكان زعل هو منى لأنى عطلته أو وترته و.... و... أما انتى أحمدى ربنا انه ما عاتبك ولا شيء وقال بيبعت لك المفتاح مع السواق والله انه عادى كنتى خليتى أخته واقفه معاكى لحد ما السواق ييجى ويعطيكى المفتاح وخلصت القصه . يا بنتى عيشى حياتك وافرحى مع جوزك وما تستعجليش المشاكل , المشاكل جايه جايه بس انتى شمى نفسك شويه .و بعدين تعالى هنا ايه حكاية ان كل ما تزعلى وتتقمصى منه تقولى له ودينى عند أهلى والله انك ناويه تخربى على نفسك بأيدك طيب هيبقى ايه الحال لو وداكى عند أهلك وما عبركيش وما اتصلش بيكى ولا رجعك ؟؟؟؟؟؟ صدقينى وقتها انتى اللى هتندمى وهتحاولى تتصلى بيه ويمكن يكون مل خلاص من المشاكل وابتعد . يبقى ليه يا حبيبتى. نصيحة منى بطلى حساسية زايدة ومالهاش لازمه واتصلى بيه وخليه ياخدك النهارده لبيتك واياكى تطلبى منه انك تروحى بيت أهلك تانى الا لو فيه مناسبة سعيدة. حبيبتى سامحينى لو كنت قاسيه معاكى بس انا حبيت أنصحك وأنا زى اختك الكبيرة تقبلى كلامى بصدر رحب وسمعينى منك أخبار حلوة النهاردة.