اخوي اعشق جنوني لها

انا عارفه نفسي زين مو من الناس الي يحسدون احد والله لو انا كذا كان حسدت اختي الي اهي اجمل مني واصغر

ودايما الخطاب يتكلمون عنها وانا لا ليه ما حسدتها؟؟ اجي احسد صديقتي على الحمل

؟ وانا وامي واخواتي ماشاء الله

عندنا خير مو ناقصين عيال

حتى لو انا الي حسدتها والله انا ماقصرت معاها وعطيتها الي تبي ومازعلت المفروض تشكرني وتقدر الشيء هذا ترا محد يتقبل انك تجي وتقول انت السبب في العين الي صابتني عطني اشرب واغسل من غسالك

صعب مستحيل احد يوافق لكن انا لاني احبها واعزها ولاني ما احب اظلم احد واكون انا سبب تعاسه احد عطيتها

بدون اي حساسيه ومازعلت تجي الحين وتقولي اني انا السبب بطريقه تنرفز وفيها استهتار

وبعدين الي يقهرني ان اي ذم فيني من قبل زوجها واهلها تجي تقوله لي بدون مراعاه شعوري والله اهلي احيانا ينتقدونها بس ما اوصل لها الكلام لكن هي العكس ومتحمله لاني اعزها

وقبل الزواج كنت اخدمها وبعد الزواج اخوانها ما ودوها لشيخ عشان تقرا انا وديتها

تخيل انا وهي انخطبنا مع بعض اول شي فكرت فيه اشتري لها هديه لزواجها شريت لها قميص نوم من لاسنزا مو اقل من 300 ريال وشريت لها مجموعه مستحضرات للجسم مو بقيمه 300 ريال وقال اشتري لي بنطلون جينز رحت وشريت لها من محل مانقو وحطيته في علبه كبيره مليتها بالورد المجفف يعني قريبا شريت لها بحوالي 900 ريال وحاسه انها شويه عليها


وهي ما جابت لي شي رغم انها من فتره تزوجت وحده من زميلاتها شرت لها مايكروويف وانا اقرب وحده لها ماعطتني شي لو هديه رمزيه

بعدين قالت معليش ما امداني اشري بس في وحده من اقاربنا مره ذوق بتهديني مفرش واكيد راح يكون فخم برسله لك

قلت مو مشكله تخيلو كاني اطرها ارسلت المفرش يمكن سعره ما تعدى مئه ريال وياريته هي الي شاريته لا وحده اهدتها اياه ولانه ماعجبها ارسلته لي

وانت تقول اهديها حتى لما جتني في المستشفى جابت معها علبه شوكولاته باربعين ريال من سوبر ماركت ولا اهتميت رغم ان زوجها راتبه فوق العشره الالف

وانا لما رحت لها في المستشفى جبت لها سله شوكولا من محلات الشوكولا الفخمه

ودايما تنتقدني وتقول انتي وش سويتي لي رغم اني دايما اساعدها بكل شي حتى فستان زواجي اعطيتها اياه

وكل ما اروح لها مستحيل اروح وايدي فاضيه بعكسها اهي

وكل هذا نسته وتخلت عني بسهوله

ولا حاولت انها حتى ترسل رساله واذا ارسلت لها اعاتبها ترد رد غير لائق مثل لا يكثر وخلاص انا مو فاضيه

وهي من نفسها قالت ان شاء الله نتقابل في الجنه يعني ما تبي تشوفني ابد خلاص باعت عشره عمر عشان هواجس وافكار مالها داعي


تخيل تقول انتي السبب لاني دايما احلم فيك قلت وش الاحلام قالت عاديه ماتخوف بس انك تجين معي عند اهل زوجي يعني انتي وش دخلك في اهل زوجي عشان تجين معي في الحلم؟؟؟


شفت التفكير هذا حلم وتقول ليه تجين عند اهل زوجي في الحلم طيب هذي هي اصلا الاحلام

يعني كل شي خيال يصير طيب حنا نحلم اننا نطير بعد بنقول ليه نطير هو حلم مجرد خيال والا ليه سموه حلم وش رايك في كلامها ؟؟؟