منتدى عالم الأسرة والمجتمع - عرض مشاركة واحدة - مغترب.. مغتربة !!!! مع أم وليد ماعاد في غربة.

07-04-2008, 03:44 PM

#59

سلامات يا قلبي

عضو متألق

تاريخ التسجيل: Feb 2007

المشاركات: 5,152

اقتباس:

المشاركة الأصلية كتبت بواسطة ملَك شادي

هلأ انا رجعت طبعا عارفة انو بعد كم يوم لكن المهم اني رجعت

الغربة صعببببببببة لكن الها مميزات
المهم انا ححكي كل شي جربتو

انا اتزوجت وتغربت قبل سنة

واول مااجيت كان في احساس مش طبيعي
فرحانة فرح الدنيا كلو لانو تجمعت مع اكتر انسان حبيتو

وبنفس الوقت ببكي عفراق اهلي

كان عنجد اشي صعب

اكون انا وشادي قاعدين نضحك او جو رومانسي وفجاة اصير ابكييييييييييييي

وكان يحزن علية ويحاول يخفف عني

ومع الايام بديت اتاقلم لكن للان ببكي عفراقهم خاصة انو مش قادرة اشوفهم بسبب ظروف غزة والمعبر المسكر

شي بخنق وبزعل مووووت لكن هادا قدر ونصيب الفلسطينية التشتت والفراق

ومابهون علية الا شادي

المهم

لما رجع شادي يروح الشغل بديت انصدم انو طول الوقت لحالي وهيك

فقررت اكتشف البلد لحالي لانو ماكان عنا سيارة وقتها وكان حتى شادي جديد عالبلد وكان ايامها الشغل ظرووفو شوي صعبة وهيك

والله صرت اطلع اركب تاكسي واقول مثلا
وين الشارع الي ببيعو في مفارش واغراض اثاث

ههههههه

يوديني

والله واتجول بالمدينة واشتري واتسوق
وزوجي كان كل شوي يتصل علية

يخاف اتوه ولاشي
وانا اقلو تخافش انا جدعة وقبضاوي

انا مابحب القعدة والحبسة

وبحب اعتمد عحالي

بمعنى زوجي ماكان قادر يوديني لانو برجع عال8 كان ايامها من الشغل
مش معقول حرام اقلو تعال وديني عالسوق

فكنت اقول اكتشف لحالي

يوم الخميس كنا نطلع ونتفسح

لكن خلال الاسبوع كنت انا اقوم بالاكتشافات و التجولات

واحيانا نطلع بالليل

وهيك

وكنت انبسط والله المهم مااضل بالبيت حتى لما اطلع لحالي

بس الحبسة بكرهها

خاصة مافي ناس كنت اعرفهم وقتها

فكنت اكتئب ازا كنت لحالي وزوجي مش موجود

لما يجي كان كل شي يتغير

لكن وانا لحالي احس بالخنقة خاصة اولها

والسنة ال راحت كان السفر كتير سافر 7 مرات لموقع العمل

فمرة من المرات قررت اطلع اتمشى او اروح السوبر ماركت الكبير

وكان اول سفرة لسة وانا الي شهر بالبلد

المهم في سوبر ماركت وسوق شعبي يحملو نفس الاسم

فقلت للسواق سوبر ماركت كزا

راح دخلي في طرق غريبة ووصلني لمكان غريب وبقلي هي المكان

بقلو لا مش هادا قلي يااختي هادا سوق كزا

وانا مصرة انو لا

بالاخر نزلت وقلت بمخي يمكن انا نسيت ولا خرفت جديد

لانو كنت قبل هيك رايحة هالسوبر ماركت بس قلت يمكن تاه مخي

المهم اكتشفت انو مخي لا تاه ولا شي

اكتشفت انو هادا السوق الشعبي وماكنت ايامها بعرف انو في سوق بنفس الاسم

فانصدمت

كان مكان شعبي جدا

وكل الي هناك النساء كانت منقبات لانو كلهم مواطنات

ويعني سوق شعبي اكيد فاهمين طبيعته

وانا نزلت وماشي ومافي انسان رجال او ولد صغير او عجوز او بنت او امراة او ست عجوزة الا وكانو يبحلقو فية

لانو كنت اعتبر غير لانو مش منقبة

رغم اني كنت محجبة مزبوط يعني بالعباية بس هما اعتبرو شي عجيب

وصدقيني يا ام وليد ماضل حد ما اطلع فية وهيك مصدومين كاني مخلوق فضائي وانا صرت بدي ابكي وخفت اتوه
ورحت اجيب تاكسي مالاقيت

كانت توقف الي باصات وانا مابحب اركبها لانها زحمة

وكان شكلي فظيع وكنت بدي اغرق مكاني من الخوف والضيق

وحسيت اني مخلوق فضائي بدون مبالغة

والدنيا كانت ماطرة والشارع بجنن ماحلاه ههههههههههه

بالاخر صرت اتخيل واقول ياويلي علية بكرة جوزي برجع بلاقيني في عدا المفقودين

المهم بالاخر طلعت وركبت تاكسي ورحت السوبر ماركت ولما ركبت التاكسي اكدت عالسواق 10 مرات انت متاكد انك بتعرف المكان

ورجعت عالبيت حالتي حالة بعدها
هههه بس كل مااتزكر اضحك

الحمدلله هلأ انا بعرف البلد منيح تقريبا يعني عالاقل مابتوه

وانا بانتظار المعبر يفتح لاشوف اهلي

واتمنى انو ماما تيجي لما اولد

للمعرفة ام وليد ازا ماعرفتي انا حامل بالشهر التاني ماشاءالله لاقوة إلابالله تبارك الله

لانو كنتي دايما تقولي الي يلا شدي حيلك وجيبي ولي العهد

ادعيلي

والله يقومك انت بالسلامة وتجيبي احلا بنوتة

وإن شاءالله بيوم نلقتي

والغربة الها مميزات بضل يعني من راسك لجوزك انت واياه وماحد بدخل ولا بفكر فيكو اصلا

وبعيد الواحد عن كلام الناس

يعني انا لو مش بغربة

وكنت ماجلة الحمل

صدقيني كان الناس خلوني انتحر من كتر الزن انت حملتي ولا لسة حامل ولالسة احملي يابنتي وووووو انت ادرى بالكلام هادا

وكل شي الو حلاوته و مساوؤه

الله يفرجها يارب

اسفة طولت كتير

أهلا وسهلا بملوكة
ما شاء الله تبارك الله
مبارك حملك
الله يجعله حمل خفيف حمله وسهل وضعه وتربايته
شوفي يا قلبي
الولاده بالغربة وربي اسهل بكثير من الولاده مع اهلك
ولادي ولادتهن بغربة واخير بعملية قيصرية واخوانه صغار ومع هيك ربك يسرها
ومافي اي مشاكل نحمد الله وكثر خير الله
إنت بس شدي الهمة والله بس بشوفة عيونه للبيبي تنسي امك وألمك وحملك
الله يسر لك بساعة خفيفة
مواقفك مضحكة خفيفة والحمد لله مغتربة ببلد عربي
الرسول صلى الله عليه وسلم قال
فيما معناه
الحكمة يماني
شفتي الله شو كريم وكتب لك غربة مع ناس صالحبن
انا ببلاد كفر والله كل يوم اخاف اكثر على هالاولاد
الله يسعدك يا ملوكة لترضي
ويرضى عليك لتسعدي
ويجعل الراحة من نصيبك والهنا ملازمك
اهلين

__________________

اللهم بارك لي في أولادي ولاتضرهم بإحد من خلقك او بشي ووفقهم لطاعتك وارزقني برهم,اللهم يامعلم موسى وآدم علمهم , ويا مفهم سليمان فهمهم , ويا مؤتي لقمان الحكمة وفصل الخطاب آتهم الحكمة وفصل الخطاب,اللهم علمهم ماجهلوا وذكرهم مانسوا وافتح عليهم من بركات السماء والأرض إنك سميع مجيب الدعوات, اللهم أني أسألك لهم قوة الحفظ وصفاء الذهن وسلامة القلب وسرعة الفهم ,اللهم اجعلهم هداة مهتدين غير ضآلين ولا مضلين