بالنسبة للعفش:
ده طبعاً بيختلف من عائلة للتانية و من مكان للتاني .. لكن عادة بتكون حالة من الحالات التالية::
1- و دي الغالبية العظمى، إنه بيكون كل شئ بالنص .. العروسة عليها تجهيز نص الشقة و العريس عليه النص التاني . طبعاً الشقة على العريس و توضيبها كمان
2- إن العريس بيدفع مهر كبير و بياخده أبو العروسة و يجهز الشقة كلها بكل العفش و الأجهزة ، عادة بيزود أبو العروسة على المبلغ (المهر) علشان يقدر يفرش الشقة كويس
3- و دي الناس اللي بتتبع هدي رسول الله و سنته ، و هي إن العريس بيتكفل بكل شئ (الشقة ، توضيبها ، العفش) و دي طبعاً بتبقى تابعة لقدرة العريس المادية
طبعاً بيكون في شبكة ، و دي بتكون على حسب الاتفاق ما بين الأهل و العريس
غالباً برضه بيكون في حاجه اسمها القايمة ، و دي بيتكتب فيها العفش بتاع العروسة كله و بتقيم بمبلغ من المال برضه بيتفقوا عليه مع العريس
طبعاً في مؤخر و مهر . كمان بالنسبة لحفلة الزفاف و الخطوبة ،، المتعارف عليه إن الخطوبة بيتكلف بيها أهل العروسة و الزفاف بيتكلف بيه العريس ، لكن في بعض العائلات دلوقتي بيقسموا الخطوبة بالنص و وقت الزفاف برضه يقسموا التكاليف بالنص
نييجي بقة لـ اللبس ،،، طبعاً بتحتاجي لبس للخروج و لبس للبيت ، مكياجك ، برفاناتك ... إلخ
مش عارفه إذا كنت أفدتك و رديت على أسئلتك و لا لأ ؟؟ بس أي سؤال تاني أنا حاضرة
ربنا يتمم لك بالخير و يوفقك و يرزقك بخير الدنيا و الآخرة