المشاركة الأصلية كتبت بواسطة قطرة حياة

حقولك حاجة يا حيبيتي << نصي المصري بيتكلم

أنا انخطبت لواحد شهور طويلة
حبيته حب عميق لذيذ برئ و قبل كتب الكتاب بيوم واحد اتصلت اتطمئن عليه و أشوف الحماس

كانت صدمة لأنه قالي عايز أقولك حاجة

كل شيء قسمة و نصيب و أنا مش قادر أكمل و ربنا يرزقك بإبن الحلال اللي يستهالك
و مع السلامة , قفل التلفون و أنا في حالة من الصدمة و الذهول التام

ده لسه مكلماه قبلها بيوم ايه اللي قلبه فجأة بدون أسباب , أنا عمري ما اتعاركت معاه و لا عليت صوتي و لا كنت دمي تقيل و لا حاجة , ده احنا كنا نحب بعض حب جامد جدا !!!

تلات أسابيع اكتئاب مع صيام متواصل وراها و انعزال تام , قاعدة على سريري بيعط , التلفون جنبي مستنياه يتصل يقولي حاجة , مستنية أهله أخته اخوه أي حد يتصل يفسر اللي حصل

المهم مر على الموضوع فترة زي اللي انتي بتمري بيها و أقولك النتيجة

ربنا رزقني براجل بكل ما للكلمة من معنى
بالفم المليان أقولك سيد سيده و احسن منه مليون مرة
و بحبه حب ما شاء الله و لا كأنه أول انسان في حياتي
كل شيء اختلف و الدنيا بقت وردية
و اتعلمت درس عمري ما حنساه
" إن مع العسر يسرا " و بعد كل كرب فيه فرج من عند ربنا
و طالما الواحد مستخير ربه ما يهموش أي حاجة بعدها لأن ربنا عارف مصلحتنا فين

دلوقتي لما أفتكر الأيام اللي قضيتها مكتئبة و الأيام اللي كنت رافضة فيها فكرة الجواز أضحك و أقول لنفسي " ده أنا كنت هبلة و سخيفة بشكل هههههه"

صدقيني حتفكري الأيام الوحشة دي و تقولي " ايه الهبالة اللي كنت زعلانة عليها , ربنا رزقني بأحسن منه "

و ربنا عليم حكيم و مش حيحرمك إلا عشان يرزقك وراها و تبقي مقدرة النعمة و شاكراها

بكره تقولي قطرة حياة كان معاها حق

ربنا معاكِ و بدعيلك يجمعك مع نصك التاني

و نصيحة : إياك ثم إياك تقفلي باب الزواج عشان تجربة و فشلت , لو مليون تجربة فشلت معاك صدقيني حتوصلي لتتجربة مليون و واحد و تطلعي بنتيجة تنسيكِ كل الظلم و الأيام الوحشة

و لما توصلي لتجربة جديدة عيشها كأنها أول تجربة بس اتجنبي أي خطأ قديم منك و ابعدي عنك الذكريات
أنا كنت ناسية كل حاجة حصلت بس اضطريت افتكر عشان أواسيكِ بقصتي , تصدقي إن مرة وحدة صاحبتي ما شافتنيش من سنتين بتسألني عنه قلتلها : مين ؟ قالتلي حبيبك اللي كان خاطب , و الله قعدت حبة كده أحاول افتكر اسمه عشان أحكيلها

يا عمري مجرد ما تدوبي في حب جديد مش حتفتكري أي حاجة عن حبك القديم خالص , حتى اسم الشاب إن شاء الله حتنسيه

أتمنى أكون أفدتك

و الله يوفقك