السلام عليكم ورحمة الله وبركاته
بعد طوووووول غياب ها أنا عدت لكم بعد ان مررت بأحداث طوووووووووووويله لا أستطيع ذكرها جميعا ولكن دعوني أقول لكم باختصار اللي صار معاي الفتره الماضيه ..

وأحب أن أنوه لسبب غيابي الطويل وارجو منكم جميعا ان تعذروني بالذات البنات اللي افتقدوني ... السبب اني مريت بحاله نفسيه لا يعلم بها الا الله كل يوم بكاء وصياح ونياح وزوجي المسكين كل يوم يحاول يهديني ويرفع من معنوياتي وسألني وقال ما كنتي كذا من أول وش غيرك ؟؟؟ أنا بالأول ما رديت عليه وقلت له ادخل للمنتدى ...
وبعدها قلت له اني مو قادره أنسى موضوع الحمل بالذات اني كل يوم اقرأ عن هالموضوع وسبب ثاني اشوف من اقاربي كل كم اسبوع خبر وحده حامل (ماشاء الله ) اللهم لا حسد وكنت اقول متى بيجي دوري ؟؟؟


العمر يمضي ولسه ما حملت ...

عموما بعد كللللللللللل هذا قرر زوجي منعي من الاستمرار هنا الين تتعدل نفسيتي ووافق على عملية الأنابيب بعد الحاح طويل ...

وبدأت بأخذ الإبر والمنشطات لحين موعد سحب البويضات ونفسيتي الحمد لله كانت تمام والحمد لله الطبيبه قالت ان حالتنا ان شاء الله ان نسبة نجاح العملية اكثر من خمسين بالمية ...

ولما سويت العمليه ورجعوا لي ثلاث اجنه رجعت للبيت ونمت نومه طوييييييييييله واليوم اللي بعده نايمه ومريحة وطبعا الطبيبة قالتلي ارتاحي اول يومين وبعدها مارسي حياتك الطبيعيه بس تجنبي الآعمال الشاقة ...

وزوجي ما قصر بصراحه ما كلف علي ابد واحيانا هو يخدمني الله يجزاه الجنه يارب على صبره ...

المهم مثل ما تخبروني عندي دوام وكانت ولازالت فترة امتحانات يعني ما أقدر أغيب وقلت هالكلام للطبيبة قالت مو مشكله عادي بس لا تتحركين كثير حاولي تقللي حركه وبشويش ...
بصراحه بصراحه ما احس اني ريحت كثير بالذات وقت الدوام ... وكنت حاسه ان هالعملية بتفشل وقلت اللي الله كاتبه بيصير ..

وبعد عشرة أيام من ترجيع الأجنة رحت أسوي تحليل رقمي مع ان زوجي كان رافض بس من الإلحاح وافق ووداني للمستوصف وحللت وكنت على أعصابي ايديني عرقت ونشف دمي وانا انتظر النتيجه بس حاطه الأحتمال الأسوأ بعين الأعتبار ..

وجت الممرضه وسحبت الدم وقالت لي عشر دقايق ما فيه زحمه بس حسيت ان هالعشر دقايق عشر ايام ...
وجت الممرضه وقالت







مداااااااااام ما في هميل وهي تهز براسها
طبعا انا ضاق صدري والحين انقهرت وقلت ليتني انتظرت كم يوم لين يجي وقت التحليل حسيت اني استعجلت وقلت لزوجي وهو كان متوقع اني حامل مسكين ضاق صدره مررررررره وسكت بالسياره ولا كلمه ... المشكله بهاللحظه ماحد له نفس يهدي على الثاني كلن ساكت مهموم ...

طبعا من بكره دقيت على وحده مساعدة الطبيبة وقلت لها اني حللت رقمي وطلعت النتيجة ( _ ) وقالت لا حبيبتي ما بيبان الحين انتظري لين يوم الخميس الجاي وتعالي حللي وان شاء الله بيبين لو فيه حمل ولا لأ .. بصراحه انا ماصدقتها حسيت انها تبي تهون علي بس ...

بعد التحليل بيومين نزل علي افرازات بنيه اللي هو امس .. خفت مدري وشو هذا دوره ولا اجهاض ؟؟؟ من جد مدري وش افسره ؟؟؟ المهم اليوم وانا بالجامعه حسيت بألم بظهري ورحت للحمام وأشوف افرازات بنيه اعزكم الله ...

اول مارجعت للبيت اخذت المثبت ونمت ولما صحيت شفت الدوره
وجا زوجي وقلت له وانا متوقعه النتيجه ...

وهذي قصتي من طأطأ لسلاموعليكو ..

وسلامتكم

بنااااااااااات من جد وحشتوني ومبروك لكل الحوامل الله يثبت حملكم ويرزقكم بأطفال سليمين يارب ..
ومبروك ولادة نورا والفال لحلمي <<< من جد اشتقت لك ياحلوه

زهوووووووور حبيبتي اقدر لك نصايحك لي قبل اسوي العمليه وان شاء الله ناويه أسوي ترجيع اجنه بعد الإمتحانات على طوووووووووول ... بس بصراحه التجربه كانت كويسه وتعلمت الكثير وحسيت ان العلم والطب في تطور وما فيه شي على الله بعيد ..

اللهم لك الحمد كما ينبغي لجلال وجهك وعظيم سلطانك
استغفر الله وأتوب إليه .. استغفر الله واتوب اليه .. استغفر الله واتوب اليه