هل الآي لاينر بديل عن الكحل؟
الآي لاينر بيغمق منطقة العين ومناسب في الحفلات, لكن الكحل له ألوان كتير وأنصح بوضع الكحل الجاف وليس الكريمي لأنه بيسيح.
وازاي نحط الكحل بطريقة تحدد وتكحل العين كويس؟
في العموم معظم البنات بتحط الكحل من تحت فقط لكن البنت لازم تجرب تكحل عينها من فوق وتحت فمثلا:
تحط الكحل جوه العين في منطقة بوذ العين وتقفل العين على القلم وتمرر القلم رايح جاي.. رايح جاي وهي قافلة عينيها وبعد كده تكحل العين من تحت الرمش من فوق والعين مقفولة على القلم وهذه الطريقة بتكحل وتحدد العين بشكل كويس.
وألوان الكحل والآي شادو اللي يناسب لون البشرة إيه؟
البشرة البيضاء بشرة صريحة وواضحة وغير مستحب إنها تضع ألوانا صارخة وتحاول تضع ألوان مكتومة أو ألوان ترابية زي (الجراي والبني والبيج وألوان البرونز).
والبشرة القمحية يتناسب معها ألوان (الزيتيات) زي الأخضر والأزرق والتركواز والبني بدرجات معينة.
الطريقة الصح لوضع أحمر الخدود؟
أحسن طريقة لوضع أحمر الخدود هي إننا نحطه من نصف الخد وبعد كده نأخذ الفرشاة لوراء عند الأذن بعد كده هنجد أن كمية أحمر الخدود راح نصفها بين نصف الخد وحتى الأذن نيجي تاني على قدام وبعد كده نحط على الأنف وعند القورة بشكل قوس يعني نيجي من عند الجبين من ناحية اليمين وننزل حتى عضمة الأذن وبعد كده نحط في الذقن.
الأنف الضخمة ازاي أداريها في الماكياج؟
فيه قاعدة بتقول أي حاجة عايزين نبعدها عن العين نغمقها وأي حاجة عايزين نقربها من العين نفتحها.
يعني لو الأنف ضخمة أغمقها درجتين أغمق من درجة كريم الأساس الأصلي وده طبعا عن طريق "مصحح الألوان اللي اتكلمنا عليه في الأول "وبيكون لونه بيج غامق.
البنات محتارة تستخدم محدد الشفايف أغمق من الروج ولا العكس؟
أنصح البنات تستخدم المحدد بنفس لون الروج يعني تحط المحدد وتفرشه على الشفايف بفرشاة وبعد كده تحط الروج علشان الروج لو اتمسح يبقى آثار المحدد موجودة على الشفايف
إيه الفرق بين الجلوس وبين الروج؟
الروج بيكون مط وكريمي و"الجلوس"روج لزج وهو نوع من أنواع الروج وموجود منه ألوان وموجود منه لون طبيعي قريب جداً من لون الشفايف الأصلي وموجود منه كمان ملمع للون الروج..
وبالنسبة لألوان الروج للبشرة البيضاء فيتناسب معها اللون البني الفاتح وبالنسبة للبشرة القمحية يتناسب معها اللون الأحمر والبني والعسلي.
ازاي أحافظ على أدوات الماكياج؟
لازم أهتم بنظافة الفرشاة لأنها عامل كبير لانتقال البكتريا للبشرة وأنظفها عن طريق "بيبي لوشن" لأنه من غير كيماويات..
وبالنسبة للماسكرة بلاش ندخلها ونخرجها في نفس الوقت لأن ده بيساعد على دخول الهواء وبيساعد على نشفان الماسكرة..
والطريقة الصحيحة إننا ندخل الماسكرة ونلفها وبعدين نضعها على الرموش, أما بالنسبة للآي شادو وأحمر الخدود والروج نعرف صلاحيتهم من الرائحة والطعم.
__________________
