طفلي ..... والعناااااد !!!
السلام عليكم ورحمة الله وبركاته
أخوتي أعضاء المنتدى ...
هذه هي ثاني مشكله أطرحها في هذا المنتدى الرائع بمعنى الكلمة ... وأتمنى
مثل ما عودتوني دائما ً إنكم ما تبخلون علي بالنصائح المفيده في موضوعي هذا
بالذات واللي أتوقع كثير من الأمهات يعانوا منه ..
بإختصار ... عندي ولدين الله يحفظهم ... الكبير 4 سنوات والصغير 2 سنتين ...
المشكله مع الكبير ... الحمد لله ... فيه صفات كثير حلوه أهمها الأدب ... لكن
المشكله الكبرى هي [blink]العناااااد [/blink]
أنا أعرف أن العناد يبدأ مع الطفل من 3سنوات ونصف ويستمر الى عمر 4 سنوات
ونصف ... تعاني خلالها الأم الأمرين !!!
المشكله اني ماأبغى أضربه ... لكن ساعات أفقد أعصابي وأسويها ... بس مو على
كل حال ... بس اذا صدر منه شيء ممكن يضره او يضر أخوه (لأن الصغير بسم الله
عليه مثل الببغاء يقلد كل صغيره وكبيره)
نفسي ما أصرخ عليه ... نفسي أتعامل معاه بأسلوب ثاني ... مع إني قد ماأقدر
أطول بالي عليه ... بس ساعات ينفد صبري !!
قرأت كتب وشفت برامج تعلم كيف الأم ممكن تتعامل مع أطفالها ومع ذلك ... التنفيذ صعب!!
نفسي أشغل وقته بأشياء مفيده ... مثل الرسم والتلوين ... مع إني مو مقصره
كمان معاه من هذي الناحيه ... يعني ألعب معاه استغماية .. ألعب أنا وهو
بالتراب ... نلعب بالمويه ...نتسوق مع بعض ... آخذ رأيه في كثير آشياء ..
يعني عندي خلفيه عن الأشياء اللي يحبها الأطفال مع ذلك أحس بالتقصير وبتأنيب
الضمير لما أصرخ عليه أو أضربه !!!
أنا طبعي عصبيه ... وهو الله يصلحه كثير أحيان مايسمع الكلام ... يعني ممكن أكرر
الكلمه 4 او 5 مرات يالله انه يستجيب !!
أولادي هم حياتي ... وبصراحه أنا ما طلعت من الدنيا بعد توفيق ربي الا فيهم ...
خاصة إني منفصله عن أبوهم حاليا ً وما ودي أخسرهم في يوم من الأيام وبنفس
الوقت أبي أربيهم صح...
فنفسي أخليهم يكبرون والأرتباط بيننا متبادل ...
نفسي أزيد ثقته بنفسه ...
الحين بعد قلبي نايم .... وقلبي يتقطع عليه لأني ضربته قبل ماينام وهاوشته ...
بتسألون ليه ؟؟
الله يصلحه .. فيه بغرفتنا دولاب رفوف ... ودخل بينهم وماقدر يطلع وصار يبكي ياماما
طلعيني ( وعلى فكره هذه الحركه سواها بعد مانشف ريقي وأنا أقوله لاعاد تركب
على الدولاب بس مافيه فايده) المهم خليته شوي وقلت له هذا عقابك من الله لأنك
ماسمعت كلام ماما ... صار يبكي وقالي ماما .. توبه ... ما أعودها ... قمت ونزلته ...
مافيه خمس دقايق الا وأشوفه يبي يطلع على الدولاب مره ثانيه !! قلت له انا مو
الحين نزلتك وقلت لي توبه ؟ قال ايه بس انا لأني ركبت في أعلى رف نشبت بس
الحين بأركب في الثاني ... وأعطاني ظهره وكمل مشوار التسلق ... قمت عليه
وضربته على مؤخرته كم ضربه بيدي ... وأنا بصراحه لما أضرب ... أوجع !!!
المهم قعد يبكي ونام على طول بعدها .. وأنا الحين بس أناظر فيه وأتحسر وأدعي له ...
سؤالي ... أو بالأصح أسئلتي هي :
هل من المفروض اني أحس بتأنيب الضمير بهالشكل ؟ أو مدام إن الوضع فيه خطر
عليه يبقى يستاهل؟؟
كيف ممكن أتجنب عناده ؟؟
كيف ممكن أشغل وقته بأشياء مفيده ؟؟
كيف ممكن أكون صديقته؟؟
مع إن والشهاده لله الكل يمدح طريقتي بتربية عيالي ... بس أنا حاسه انه فيه
شيء خطأ ؟؟ أو هذا الأحساس نابع من الحرص الزائد؟
أذكر وحده من الحريم الكبار في العائله الله يرحمها كانت تقولي دائما ً (يابنتي الولد ما ينضرب)
... هل كلامها سليم ؟؟ بصراحه أنا أثق في كلام كبار السن جدا ً ولو ماتعلموا!
صفات إبني: مسالم جدا ً ... وضعيف ما يدافع عن حقه ... بس جريء ... يبكي كثير ..
ياليت تفيدوني ولا تقسون علي ّ تكفون .... وبنفس الوقت لا تقولون هذا من فراق
الوالد ... لأنه وإحنا معاه كانت هالمشكله موجوده ... هذا غير انه ما يشوف ابوه الا
ربع ساعه أو أكثر شوي ... ومو كل يوم بحكم انه متزوج ثانيه ....!!
سامحوني على الأطاله ... في إنتظار آرائكم النيره ... ولكم مني جزيل الشكر والدعااااء
__________________
