بصراحة ولاني مريت بتجربة زوجتك بالملي اقول حرام عليك تفكر بفراقها وطلاقها والموضوع هذا مو بيدها

تلاقيها مشتاقة للجماع أكثر منك لكن فيه عدة أمور تعيق عملية الجماع

أذكر في فترة نفاسي ماكنت أهتم بنفسي ولا أهتم بلبسي ولا شكلي والاسباب عديدة :

1. المرأة تتعب تعب مايعادله أي تعب في الدنيا طوال تسعة شهور وهي شايلة في بطنها حمل ثقيل والله سبحانه وتعالى قال وهناً على وهن ، وبعد التسعة شهور يجي تعب الولادة وأسأل اي مرأة في الدنيا راح تقولك عن تعب الولادة عبارة وحدة (شفت الموت بعيني)

فانت تخيل وحدة خارجة من تعب نوصفه بالموت .. تخيل الوحدة كيف تكون نظرتها للحياة وقتها .. تكون حاسة باكتئاب ولامبالاة وعدم اهتمام بالحياة تحس الوحدة بتفاهة الدنيا وحقارتها وانه مافي شي يستاهل نتعب عشانه

غير كذه تجلس الوحدة اربعين يوم لاصلاة وقرآن ولاقرب من الله فتخيل النفسية كيف تكون وقتها

يعني تخيل يااخوي اني خلصت نفاسي برمضان والعيد تعرف كيف فرحته والله ماكنت مهتمة بعيد ولا غيره ولا فكرت انزل السوق اشتري لي شي حتى بنتي اهلها جابولها ملابس العيد وكل هذا زوجي شايفه وصابر ومتحمل

2. المرأة يتغير جسمها بعد الولادة ، قبل الحمل كانت في نظر زوجها حورية لكن بعد الولادة جسمها تغير فهي تشعر بالنقص في انوثتها وتخاف من رفض زوجها لها والشي هذا يزود من حالة الاكتئاب عندها

والله ياخوي اني ماكنت ارضى اغير ملابسي قدام زوجي وطول وقتي جالسة بالبيجامة الطويلة الساترة او ثياب البيت والله ماكنت متعمدة اتصرف معه هذا التصرف بس هي جات كذا ولاكنت منتبهة لنفسي هو اللي نبهني لاهمالي يعني هي حالة لا ارادية

3. احساس المسؤلية المتضاعف عند المرأة بعد الولادة من اهتمام بالطفل والاهتمام بالبيت والاهتمام بالزوج والاهتمام بنفسها عشان تسترد عافيتها وصحتها كل هذه مسؤليات تخليها في حالة اكتئاب فظيعة تحاول تهرب منها بالتخلي عنها كلها او الاقتصار على الاهتمام بالمولود فقط

4. تغير المنطقة بعد الولادة وآلام الخيوط بالاضافة الى انه بعض النساء تجيها البواسير بسبب الدفع اثناء الولادة بالاضافة الى جفاف المنطقة مما يسبب زيادة الآلام

اذكر والله انه زوجي قال وانا شاركته الرأي انه ليلة الدخلة كانت اسهل من الجماع بعد الولادة !!!!!!

كانت هناك محاولات من زوجي ومحاولات مني لكن الالم كان فوق الاحتمال بصراحة فكنا نتراجع ونصبر ونتحمل

وبعد ثلاثة أشهر ونصف تم الجماع !!

وأنا اوصيك أخي الكريم انك تكون لطيف معاها ومتفهم لحالتها وضح لها انه الجنس مو اهم شي عندك وانه المهم راحتها وسلامتها تقرب منها كون رومانسي معاها حسسها بالعاطفة والامان صدقني هي راح تحاول تتمم عملية الجماع وتتغلب على آلامها لكن اياك ثم اياك ان تلومها عشان لاتحسها انه الجنس اهم عندك من كل شي في الدنيا

ثانياً اوصيك بالتعامل مع زوجتك وكانها عروس لاول مرة .. تذكر كيف كانت ليلة الدخلة ؟

بالضبط اعمل مثلها .. استخدم المزلقات انا ماتمت معاي العملية الا باستخدام المزلقات

وغير كذه كون لين معاها لاتكون عنيف لانه الالام لسه ماراحت تماماً ولاتروح الا بعد ستة اشهر تقريباً من ولادتها

والحمد لله على سلامة زوجتك واتمنى تبشرنا عن قريب