والله والله والله يانايت اليوم بالسيارة احس بالألم كبير جدا.. وحزن وفراغ.. خصوصا من بديت اشوف بطاقات الزواجات بدت توصلنا

لزواجات قريباتي اصغر مني...

اليوم وصلتنا 3 وامس وحده والجايات بالطريق... شئ مؤلم جدا... وانا بالسيارة وامسح دموعي تذكرتك ودعيت لك من قلب انه الله يصبر قلبك...




انا كنت مقرره بالصيف انه انزل مكة وادعي ربي عند الكعبة.. ولكن وللاسف ابوي الله يهديه رفض..يوديني مكة..


بحجة انه زواجات قرابتنا كثير ابوي يبي يحضر زواجاتهم...





وعندنا احنا شئ نسميه العانية... يعني يعطون المعرس فلوس بليلة العرس اعانة له..


وكثير قرابه يعني راح ينصرف كثير مال... قلت لابوي طيب عطني فلوس ابي البس واتكشخ.. راح يتريق... يعني لا..


رحت عصبت قلت لابوي انت حارمني من السفر... وحارمني من المصرف.. عشان تنفق على قرابتنا.. هذولي ناس متزوجين.. يعني متهنين.. سواءا جيت بعرسهم او ماجيت مو مهم.. وانت تعطيهم فلوس هو بياخذها يمتع فيها حرمته.. يعني انت بفلوسك تمتع بنات الناس.. هذولي مو مهمين لنا,,, هذولي مو نسباك.. عشان تقول اقدرهم.. هذولي راحوا للغير يخطبون بناتهم.. وانت تحرمني عشانهم...



تعرفين سكت وانا اتكلم ... وابوي يقول ياكثر هذرتك.. طلعت لغرفتي وبكيت لين قلت بس...


جد انقهر .. لما اشوف ابوي يحرص على قراتنا.. ويحضر زواجاتهم حتى خارج المنطقة.. ويصرف فلوس لهم.. وغيره وغيره...



وهذي مو اول مره اتصادم مع ابوي بالكلام.. سبق كنت اتكلم معه.. وهو يمدح القرابه .. وراح يقولي ان شاء الله تتزوجين قلت لابوي من مين؟؟؟؟


قال ان شاء الله..

قلت اذا على القرابة ابتر يدي بتر اذا احد يخطب بناتك...

وهو عصب علي جدا.. وقالت انتي مغرورة وكلامك اوهام.. قلت له الناس تخطب االزين.. والغالي.. انا اقصد باللبس والمكياج..


وفعلا هذا اللي صاير...


ابوي احبه واغلية.. وابوي يتوقع انه اذا تعامل مع الرجال بطيب وكرم.. انهم بيخطبون بناته.. مادري انه المسأله تغيرت..

والله امي كانت ساعات تبيع ذهبها.. عشان تلبسني واخواتي.. لين خلص الذهب.. ابوي يعطي عانيات لفلان وفلان.. بالالف وحنا وامي واخواتي ما نجي بنص عانية واحد منهم.. مجتمعات..









ابوي اذا يكون مو من معارفنا.. يمنعنا من حضور الزواج.. بحجة اننا ما نعرفه.. ولما جلست اليوم وحسبت قرابتي.. لقيت كل الشباب اللي اكبر مني تزوجوا كلهم... وما بقى الا اللي ما منهم فايدة..




وهذا الشئ مو علي بس حتى على قريباتي...



انا الحين افكر بالصيف زواجات كثيرة.. طيب احس فشلة احضرها... لانه كل البنات الي بعمري عندهم عيال.. وانا لا..




بدأت تجيني والله افكار شيطانية.. لدرجة الله يعلمها.. صرت كثيرة البكاء...

بدت عندي اعراض اكتأب .. ما ابيه يستمر ...صرت احس بالوحدة.. واحس اني متينه .. واحس كبيرة مره.. على انه انا رشيقه بالحقيقة... بس مدري هو الهم محسسني انه انا كبيرة.. او ايش...


صرت افتقد الاحساس بالغير.. لدرجة افتقد الاحساس بالاطفال وبروعة تصرفاتهم.. يجون الناس معي يضحكون يروحون احس اني فارغة..


صرت حتى من يجونا زورا للبيت ما اعرف اقدم واضيف لهم او ارحب فيهم..


مدري احس كأني اول مره ادخل العالم والارض.. احس اني بكوكب اخر.. مو حاسه بالوقت ولا الزمن.. احس اكل اشرب انام..



صرت افكر انه راح اموت قريب



كل شئ مهله فيه صرت لدرجة صرت مهلمه بشعري وملابسي... انا شابه صارت امي تغسل ملابسي... مدري ما يهمني شكل ابد.. الكرر الملابس كثير...
وجهي صارت تطلع فيه حبوب..

ما احط مكياج او عطورات..


حتى امي بدأت تبهني.. انه ليش هذا الاهمال بشكلك وبترتيب غرفتك.. والله اخوي انتبه انه اهملت اناقة غرفتي.. لدرجة صار يقول لامي هي ليش كذا غرفتنا صارت..



واشياء كثيرة كثيرة... وما اقول الا اللهم لاتذرني فردا وانت خير الوارثين

__________________

قال رسول الله صلى الله عليه وسلم:
(سورة البقرة أخذها بركة ,تركها حسرة, ولا تستطيعها البطلة)
البطلة= السحرة..
من فوائدها سرعة اجابة الدعاء