ماشاءالله لا اله الا الله عليك أختي ناويه تسوين بوفيه لهالعدد

الله ويعينك يقويك ويعطيك الصحه والعافيه ويسخرلك زوجك ويسخرك له ويرزقك باللأبناء الي يبرون فيك مثل ما انتي تبرين بأبوهم




ننتقل لموضوعك

بالنسبه للرز أقترح عليك الرز البرياني مررررررررررررررررره لذيذ وأنا من عشاقه خصوصا الي بلحم

وهذي طريقة الوالده الله يحفظها:

جيبي حبة بصل وقطعيها أرباع وممكن حبتين

احمسيها بشوي زبده لين تبدا تذبل

أضيفي عليها قطع اللحم وقلبيها حتى تتحمر على خفيف

بعدين أضيفي مويه لسلق اللحم + ورق الغار + أعواد قرفه (دارسين) + حبوب الفلفل الأسود + ماجي أبيض + ملح

وخليها على النار لين تستوي اللحمه

جيبي قدر ثاني وحطي فيه شوي زبده وحطي عليه بصل مقطع شرائح طويله وخليه لين يذبل شوي

بعدين حطي عليه زنجبيل طازج مفروم اذا امكن أو بودره وخليها شوي

حطي زبادي أو لبن رائب المتوفر منهم على البصل

أضيفي مكعب ماجي وبهارات وورق الغار وفلفل أسود مطحون و ليمون أسود عدل وبودرة الكركم وفلفل حار عدل

بعد ما تستوي اللحمه صفيها من المويه وحطيها على خلطة الزبادي وخليها على نار هادئه

أثناء ذلك اسلقي الرز في موية اللحم بعد ما تصفينها نصف سلق ويفضل أرز المزه

اذا استخدمتي المزه الافضل انك بعد ما تغسلينه تنقعينه في مويه دافيه ربع ساعه

اما اذا كان رز أبيض لا تنقعينه كثير لأنه بيتكسر معاك

وبعد كذا كبي الرز على خلطة الزبادي واللحم بدون خلط وخليها على نار هادئه لمدة ربع ساعه

وعند التقديم ممكن تقلبينه في صحن كبير مثل المقلوبه أو تخلطينه شوي

وبالعافيه

بالنسبه للمقادير

الكميه الي تبين تحطينها ما أقدر أفيدك لأني مو من ذوات الخبره وان شاءالله هم الي يفيدونك فيها

بس ابعطيك مقاديري لشخصين وأكون مسويه البرياني لحاله وما معاه شي

الرز(كاسين) - الزبادي (علبه) - ورق الغار(5 ورقات متوسطه ( 2 مع اللحمه و3 مع خلطة الزبادي ))- الليمون الأسود(حبه)

أعواد القرفه(2 متوسطه) - نصف ملعقه كبيره ماجي أبيض





وبالنسبه للمكرونه اقترح عليك تسوين الفوتوتشيني الي تكون مع دجاج مفتفت بقشطة الخفق لأن عندك الداوود باشا وصينية الباذنجان بلحم وبندوره بس الطريقه ما اعرفها بالضبط لاني ماسويتها وان شاءالله يفيدونك فيها الاخوات




اقترح اضافة محشي ورق العنب وتبوله مع المقبلات




فيه سلطة السيزر بطريقه غير بس مرررررررررررره لذيذه ممكن انك تبدلينها مع احد السلطات

مقادير السلطه:

خس + صدور دجاج + خبز توست

مقادير الصوص:

نصف علبة زبادي + 2 ملعقه كبيره مايونيز + 2 ملعقه كبيره طحينه + عصير نصف ليمونه + شوي ملح وبودره فلفل أسود وبودرة ثوم

مقادير تتبيلة صدور الدجاج:

شوي صلصة صويا وشوي ليمون وشوي خل وملح و بودرة فلفل أسود وبودرة ثوم

الطريقه :

قطعي صدور الدجاج قطع كبيره وتبليها بالتتبيله

اتركيها أقل شي نصف ساعه وبعدين حطيها في بيض ثم دقيق وقلبيها على النار في مقلاة فيها زبده وزيت وليس غزير

لين تتشقر ولا تخلينها تطول على النار حتى ما تكون قاسيه

قطعي الخبز مكعبات صغيره وشقريها في الفرن مع اضافة القليل من الزبده عليها

قطعي الخس قطع متوسطه وقطعي الدجاج بعد ما استوى

اخلطي الخس والدجاج وصبي عليه الصوص وبعد كذا زينيه بالخبز

وبالنسبه لمقدار الصوص ضاعفيه لحد ما يكفيك لمقدار السلطه الي بتسوينه

وبالعافيه




ان شاءالله أكون أفدتك