انا بنت يتيمة الاب وما بقى لي بالدنيا هذي غير امي واحاول اسعدها قد ما اقدر لكن هي شايله همي لاني قربت من الثلاثين وللحين ما تزوجت مع اني جذابه بشهادة كل من يشوفني وانيقة وعندي ذوق رفيع في اختياري للملابس

الي يشوف شكلي ووجهي يقول ملامحك ومظهرك يوحي انك اميرة وبنت شيوخ
بس انا من الطبقه المتوسطه الان الي عايشه على الراتب وتكافح عشان تعيش وسط غلاء الاسعار المتصاعد
ما اخفيكم ان اصلنا اغنيا بس دوام الحال من المحال
يعني جدي هو الي كان غني وبعدها ضاع حلالنا ومن وعيت على الدنيا وانا حالي حال اي طبقة عامله وذوي الدخل المحدود والحمدلله على كل حال

ما تهمني الماديات ولا انا من النوع الي يحس بالنقص قدام الاخرين الي احس منه بس بالفتره الاخيره صرت احس بالنقص
يوم اشتغلت مع بنات نعمه
زميلاتي في العمل كلهم من الطبقه الهاي كلاس وانا ما احسدهم ولكن هم كلامهم طول الوقت عن رحلاتهم لاوروبا وشرق اسيا
الي تتكلم عن سفراتها مع زوجها وكيف انه مدلعها حيل والثانيه تتكلم عن الماركات وكل يوم جايه بشنطه او ساعة سعرها فوق ال10 الاف
والمصيبة ان المديره من نفس النوعيه المتباهيه
كل يوم لازم تسمعنا سالفه جديده عن فلتهم والمسبح والرفاهيه الي هي عايشه فيها وعيالها المدللين وكيف انها تبي تاخذ اجازه قريب عشان تسافر لدولتين
انا والله ما احسدهم ولا من النوع الي يغار من احد لان يكفيني جمالي ومواهبي الي مو متوفره فيهم
بس مو حلو هم يتكلمون عن السفر والاشياء الغاليه وانا ساكته بوسطهم ما عندي شي اقوله واحس ان شكلي غلط واني ناقصه وسطهم
غير كذا هم متكبرين في معاملتهم لي مع اني احترمهم كلهم بس احس انهم متعالين علي نوعا ما
زادت استعراضاتهم وتباهيهم وغرورهم لدرجه اني صرت افكر في تقديم استقالتي والانتقال للعمل في مكان ثاني وحبذا لو كان مع اجانب لان الاجنبي مهما كان غني ومرفه ما يجي كل يوم يزعج الناس بالخير الي عنده
بس الي مضايقني اني مقدر انسحب الحين لان ما عندي بديل وانا مابي اكون عاله على امي بالعكس انا اشتغل الحين عشان اخفف عنها واساعدها بالي اقدر عليه
بس الضغط زايد علي وقلبي ما عاد يتحمل
يكفي اني فاقده حنان الابو وعايشه وحيده بلا زوج يحبني ويعطف علي.........اجي كل يوم الدوام عشان اسمع كلامهم عن اشياء مفقوده فحياتي
يتكلمون عن الاب وعن الزوج وعن الوناسه والسفر وانا ساكته
احس اني بنفجر قريب