حبيبتي انا رجعت

حابة اقلك انك مابتفكري الا بالجانب البشع

انا قصدي لو الواحد بدو يفكر بالبشاعة بلاقيها

ولو بدو يفكر بالسعادة بلاقيها

يعني الانسان الزكي هوة الانسان الي بتعلق بجانب السعادة

لانو اي انسان مهما كان سعيد

لو اجا يفتش عسبب من اسباب التعاسة في حياته

حيلاقي

وحيصير حزين

لكن الانسان الزكي الي بتجاهل وبتناسا لحتى ما يزعل في الحياة

يعني كلامك لو كل واحد مغترب فكر فيه

حيحس بنفس الشي

واخرتنا كلنا ننتحر من القهر ازا بنفكر بمتل طريقتك

لكن الانسان يكون زكي يكون عنده قدر من حب الحياة

ويطنش

طيب انا حقلك

انا عشت في الغربة ايضا دولة خليجية لكن صراحة ماكنت احسها غربة لانو انا مرتبطة جدا مع اهلي

فالحياة معهم كانت تكون اجمل حياة ولا افكر كثيرا بانو انا زعلانة عشان مش في بلدي

واهلي ناس رائعين ماشاءالله وماخلونا نحس بشي

لكن كنت احب وطني اكيد

ورجعنا الو

وعشت هناك كل ايام المراهقة و الجامعة والشباب والزكريات الحلوة

وجاء نصيبي في الغربة

بس انا حقلك شي لحتى تعرفي انك احسن مني وبنعمة لازم تحمدي ربك عليها

انا اهلي بغزة

وخطيبي لما سافر قفلت وراه الطريق ازا بتسمعي

وقعدنا سنة ولما اجا موعد عرسنا الوضع السياسي خربان جدا

ومااجا عالعرس
وعملت حفلة لوحدة

ولبست فستان العرس لوحدي

وكنت حابة انبسط باي شكل

ولكن وقت العرس لما قعدت لوحدي ومفروض عريسي جمبي

اكتئبت و جيت بدي ابكي

رغم اني كنت سعيدة اني حلتقي فيه

لكن فقدت ليلة كل بنت تتمناها

وعدت الليلة

فكرك تاني يوم سافرت عادي

طلعت اشاعة انو المعبر حيفتح

رحت هناك بسيارة اسعاف
عروس بسيارة اسعاف

لحتى انو هداك الوقت كانت سيارات الاسعاف اول شي بتدخل المعبر

وبابا الو واسطة هناك يعني وقتها كان كل واحد بس بحاول يلحق نفسو

وركبت مع امراة عجوز مريضة متمددة وطول الوقت اه واخ وتبكي وتسرخ من الالم
ومعها زوجها وبنتها

وانا مع امي راكبة والشنط منحشرة علينا
وانا بدي اموت من البكا والزعل عفراق اهلي وعالطريقة الي قاعدة بنزف فيها الى عريسي

وبكيت من الفجر لل3 العصر

بدون توقف واحسست حتيجي سكتة قلبية او هستيريا

ثم تفجر الوضع

وصار اشتباكات وطخ

وشفت الناس عم تترمى عالارض بدمها

وبابا اخدني عالعيادة الي هناك عند اصحابو انا وماما

وكل شوي تدخل وحدة اما مهسترة او وحدة معها حالة نفسية من الوضع الزفت

او واحد مليان دم

متخيلة انت اني عروس؟؟؟

روحت يومها مصابة بحالة نفسية

بعدها بتلات ايام رجع فتح لكن ربي سهلها وسافرت

شفتي كيف؟؟؟

وانا فقدت الليلة الي كل بنت تتمناها

بعد العرس تروح مع عريسها لبيتهم

وتكون اللحظات الرومانسية والسعيدة وليلة الدخلة وكل شي

وروحت لبيت اهلي كان بضحك الموقف

لكن زوجي عوضني الله يخليه وعملنا عرس انا واياه وجابلي فستان فرح لبستو لالو وتصورنا بالبيت وتورتة

لكن العرس بيضل الو طعم خاص

المهم ورغم هادا

لم اشعر يوما بالنقص او التعاسة لهيك

صحيح بتمنا لو عشت ليلة متل كل البنات

لكن مش عاملة ازمة في حياتي لهالسبب

يعني مش مخلية الموضوع يعملي عقدة
ابدا ابدا ابدا


لما اتزكر بقول كانت حفلة حلوة

وكنت بتمنى كزا وكزا

لكن قدر الله وماشاء فعل

وكل شي في خير لالنا

ويعني بتزكر وبتمنى وبس

اما انو متعقدة وكتئبة وحالتي حالة ابدااااااااااااا

وعايشة سعيدة ومش كتير مخلية ليلة تاثر عباقي حياتي رغم اني بعرف وحدة مرت بوضع شبيه لكن اهون بكتير لانو ماسافرت بطريقة مؤلمة وماتبهدلت

لكنها عملت عقدة في حياتها

وبتضل تتحسر وتبكي

وكانو مصيبة لحقت فيها

انا الحمدلله فكرت بزكاء ومنطقية وقلت هادا قدر الله وقضائه

والسعادة الي حسيتها مع زوجي بتخليني اقول يلا زوجي بستاهل التضحية وبستاهل اني تعبت عشان اوصللو

غير هيك بنضل انا واياه نفكر ونقول احنا مميزين غامرنا عشان نتزوج ونلتقي

يعني بنحاول ناخد الموضوع انو مغامرة و تميز وانو حبنا كان اقوى من كل شي وانو حبنا متميز في كل شي

ماشاءالله لاقوة إلا بالله تبارك الله

زوجي بعد مجيئي ب3 ايام رجع الشغل لانو متوظف جديد بالدوله هاي وماقدر ياخد اجازة

ومن وقت الزواج للان سافر 8 مرات
بعد زواجنا بشهر سافر

تخيلي عروس غريبة في بلد وحيدة

بكيت ايامها بحر من الحزن والوحدة والحسرة

لكن كل شي بيعدي

اكتب لك الان و زوجي مسافر

انا حامل بكرة بصير بالشهر السادس إن شاء الله

قبل فترة وانا حامل قعد شهرين واكتر كل يوم يتاخر بالشغل بحيث بطلت اشوفو ابدااااااا




طيب انا الي سنة و 4 شهور متزوجة

ماشفت اهلي ولا مرة
السبب ايش فكرك؟؟؟

المعبر اياه

مسكر لحد الان

وانا ولادتي إن شاء الله بشهر 11

وطبعا نفسي ماما تيجي زي كل العالم والناس

وبالغالب حولد لحالي لكن املي برب العالمين كبير

لكن خايفة اولد لحالي بالغربة

شوفي كيف الموقف حيكون صعب جدا

لكن ايش نعمل

شايفة الكل بروح وبيجي وبشوف اهاليهم وزيارات الان انا

انت بتشوفي اهلك مرة بالسنة

انا لاحد بشوفني ولا بشوف حد

بسبب الظروف السياسية شي بقهر لما افكر بالموضوع بحس انو حموووووت

ومع هيك بنسا وبقول يلا بهمش

يعني شفتي يااختي كيف تبهدلت في االسفر

وكيف محبوسة بعيد عن اهلي

وكيف ممكن اولد لوحدي بالغربة المرة

يعني عندي اسباب حقيقية للحزن و انو يكون عندي شي متعس حياتي

لكن رغم هيك مابركز ومابفكر

بفكر انو الله عطاني زوج كويس

وانو الله غربنا لانو رزقتنا برة

ولو انا جمب اهلي انا و زوجي ماكنت حكون سعيدة

كانت المادة حتكسر ظهرنا

لانو الظروف سيئة جوة البلد جدا

طيب تفتكري مع القلة والفقر

حتعرفي الرومانسية والحب و العشق

ماحد حيكون فاضي

حيكون زوجك مشغول بالبحث عن النقود

تفتكري لما ولادك يكونو محرومين احسن من الغربة؟؟؟

ولا فكرك حتفوقي تعملي لزوجك حفلة ولا ليلة رومانسية

؟؟؟

انا هيك بفكر

رغم لو تعرفي اربتاطي الغير طبيعي باهلي

كتير بحبهم ومرتبطة فيهم بشكل مش طبيعي

وببكي كتير من شوقي الهم

لكن بحبش اتعس حالي وبحب ادور عجوانب السعادة في حياتي

طبعا لو مافي غربة وجمب اهالينا
مع توفر المادة

ياسلام مافي احلا من هيك

لكن الحياة عمرها مابتكمل

ياهيك ياهيك
ماحد بحصل كل شي
ولو كنتي في وطنك وغنية كان حيطلع الك شي تاني صدقيني

مافي حياة كاملة بحيث تاخدي كل شي

وهينا عايشين وبنحمدالله انو احنا بصحة و انو اهالينا كويسين

وضلك تزكري انك بتشوفي اهلك بسهولة

احنا السفر عنا مش قطعة عذاب

لا والله مليون قطعة عذاب وبهدلة وقرف و تعب

ورغم هيك مش صاححلنا نسافر ولا حد يزورنا من اهالينا

مع كل هادا لا افكر بطريقتك ولا اتعس نفسي

ويعني الكل قاعد بتجوز ومناسبات وانا مابحضرها

ايش اقطع حالي
الله يسهل عالجميع

ويهني الجميع

ويجوز الجميع

وبالعكس بالغربة بعدت عن اشياء حزينة

توفي خالي وراه استشهد ابنه وهما عزيزين جدا عقلبي

طبعا حزنت هنا كتير

لكن لو كنت هناك بالعزا واشوف المناظر والتعاسة الي الناس فيها

اكيد غير تماما عن لما تكوني بعيدة في تاني بلد


وانا بحمدالله عنعمة الصحة و الزوج الصالح و الطفل الي حيجي إن شاء الله و نعمة انو اهلي بخير والحمدلله

وانو مافي حد متضرر بعيد الشر وانو حياتنا مستقرة ماشاءالله لاقوة إلابالله تبارك الله
فكري بايجابية وانسي الحزن

وكل متفكري بتعاسة
افتحي الموضوع

وشوفي كلامي هادا

راح يهون عليكي كتير

الله مكرمك ومنعم عليكي

رغم هيك زعلانة

بينما انا الي فعلا عندي اسباب حقيقية للحزن مابفكر متلك

بتمر علية حالات بؤس لكن بطلع نفسي منها بسرعة

مشاءالله لاقوة إلا بالله تبارك الله

خليكي قوية وتوكلي على الله

انا عارفة طولت عليكي كتير

لكن حبيت اخليكي تشوفي انك احسن من كتير ناس عايشين في رباط حتى وهما برة ارض الرباط

__________________