الشراب ( العسل / الشيرة)




نجهز كمية من الشراب وبعد مايبرد نتخلص من اي بذور ليمون او ريم و نضعه فى برطمانات او زجاجات بغطاء ونضعه فى الثلاجة لحين الاستخدام السريع
وممكن يظل عندك فى الثلاجة بالأشهر بدون ما يحدث له شئ
و اذا حدث مرة و وجدتي علي الوجه حبيبات سكر او متجمد ممكن يادوب ثوانى تدفيه بس على النار ستجديه فك على طول

البسلة

فصصى البسلة واسلقيها فى ماء مغلى لمدة 3 دقايق ثم شيليها وضعيها فى مصفاة واشطفيها بالماء البارد لحد ما تبرد وحطيها فى الاكياس النايلون النظيفة

الجزر



اكشطى الجزر بالسكينة و اغسلية وقطعية اما اصابع طويلة رفيعة او حلقات واسلقية فى ماء مغلى لمدة 3 – 5 دقايق ثم شيليه وضعيه فى مصفاة واشطفيه بالماء البارد لحد ما يبرد وحطيه فى الاكياس النايلون النظيفة

الفاصوليا



ازيلي طرفي الفاصوليا الرفيعين ثم قطعى الفاصوليا بالسكينة بالورب والطول حسب ما بتحبى و واسلقيها فى ماء مغلى لمدة 3 دقايق ثم شيليها وضعيها فى مصفاة واشطفيها بالماء البارد لحد ما تبرد و ضعيها فى الاكياس النايلون النظيفة


السبانخ

ياريت لو تكون طازجة اغسليها جيدا وضعيها فى المصفاة لحد ما تصفى من مياهها ثم قطعيها بالسكينة (خرطيها).
اسلقيها فى ماء مغلى بس لمدة 3 دقايق وبعدين تشيليها وتبرديها بالماء بسرعة وتضعيها فى المصفاة علشان تتصفى كويس من مياهها وقبل ما تحفظيها فى الاكياس اضغطى عليها بيدك حتي تتاكدي انه لا يوجد بها ماء علشان مايبقاش فيها ماء خالص

الملوخية



اغسلى الملوخية جيدا و قطفيها و افرشيها على فوطه نظيفة فى الشمس علشان تنشف ثم خرطيها بالمخرطة المخصوصة بالملوخية
نضع عليها من 3 ل 4 معالق كبيرة اما ماء او شوربة وقلبيها جيدا حتي تفك من بعضها ثم ضعيها فى اكياس وتبططيها بأيدك حتييخرج الهواء من الكيس او ممكن فى علب بلاستيك

ملحوظة ...لكل نص كيلو ملوخية من 3 ل 4 معالق كبيرة شوربة او ماء..



القرنبيط



تخلصي من الراس الكبيرة الجامدة و قطعيه وردات صغيرة منفصلة عن بعضها واسلقيها فى ماء مغلى لمدة 3 دقائق مع وضع عصير ليمونة الى الماء المغلى حتى يظل لون القرنبيط ابيض زى ماهو ارفعيه من الماء و اتركيه حتي يبرد و يحفظ فى الاكياس


الباذنجان



نقشر البزنجان ونقطعه اما حلقات او مربعات (حسب الرغبة ) ورشى علية شوية ملح ولما تطلع مياهه

اضغطى علية بأيدك . ثم اقلية فى الزيت حتي نحصل علي الون الذهبي ثم يوضع على الورق الماص للدهون لحد ما يبرد . و يحفظ فى اكياس على هيئة صف بجانب بعض ثم ضعى فوقه قطعة ورقة زبد وبعدين رصى الصف التانى .

ملحوظة

لما بتسلقى الخضار مثلا 3 دقايق يبقى تبردية تحت ماء الحنفية برضة 3 دقايق يعنى نفس وقت الغلى لازم يكون هو نفسه وقت الشطف



لاتضعى اى ملح على الخضروات الا بعد ما تطبخيها وتستوى

لازم وأنتى بتحفظي الخضار فى الاكياس تتخلصي من الهواء الموجود بالكيس

عند تسويتها توضع على طول وهى مجمدة من غير ما تسيحيها

أشهر طبق على المائدة الرمضانية

الفول المدمس



اولا طبعا نقي الفول

تضعي كوب و نصف في ميه من العصر مثلا

ثم تضعي في قدره الفول طبعا الصغيرة اللي موجوده في اي سوبر ماركت
تضعي الفول بعد ما تغسليه وعليه ماء تقريبا ضعف الفول و بعدين انا بحطه على النار يغلي الاول وبعدين بكون مشغلة السخان الكهرباء الصغير
المهم بعد مايغلي غلوة على البوتجاز اضعه على السخان
واضيف
1-فص ثوم
1- واحده طماطميه + 3 معالق عدس اصفر+ او ربع معلقه بيكنج بودر او بيكربونات الصودا


وتغطيه من بليل لحد الصبح على السخان و اول ما تفتحي القدره حطي معلقه زيت اي زيت
و اقفليه و بعدين ضعيه في علبه بلاستك مقفوله وطبعا اول ماتفتحي القدرة شيلي الثوم زي ما هو و تخلصي منه ثم خدي منه علي حسب حاجتك

بعض اطباق الفول المدمس للسحور



1- الفول بالزيت و الكمون

يضاف للفول عصير ليمون و ملح و كمون و زيت (ذرة او زيتون حسب الرغبة ).

2- الفول بالدقة:

تجهز دقة من ثوم مدقوق و ملح و كمون و كركم و ليمون و نضيفها عليه مع زيت و ممكن نضيف له طحينة.

3- الفول بالسلطة:

تقطع طماطم مكعبات صغيرة و بصل و فلفل أخضر ايضا مكعبات صغيرة و نضيف لهم ملح و كمون و خل و ليمون و نضيفهم للفول و نضع زيت و طحينة حسب الرغبة.

4- الفول بالطماطم:

تقطع الطماطم مكعبات صغيرة و لما الفول يسخن نضيفها و نتركها إلى أن تذبل ثم نضيف الليمون و الملح و الكمون و الزيت.

5- الفول بالسمنة أو الزبدة:

نضيف للفول سمن أو زبدة حسب الطلب و بدل الكمون بنضع فلفل أسود و ملح.

6- الفول بالبيض:

نقلي البيض عادي و بعدين نضيف له الفول و ملح و فلفل أسود.

7- الفول بالثوم و الطماطم:

نقطع فصوص الثوم بالسكين شرائح بالعرض و نقلبها في السمن أو الزبدة حتى يصبح اللون ذهبي و بعدين نضيف الطماطم المقطعة مكعبات و نضع ملح و فلفل اسود و بهارات و لما الطماطم تذبل نضيف الفول و نقلبه كويس.

8- صينية الفول بالبيض في الفرن:

نفس الخطوات السابقة ننفذها و بعدين نضع الفول الساخن في صينية الفرن و نكسر عدد البيضات اللي نفضله عليه بحيث يكون الصفار سليم و بعدين ندخله الفرن ونولعه من تحت شوية لحد ما البيض يستوي و بعدين نولع الشواية من فوق شوية لحد مالوجه يكون ذهبي.

9- البيض بالسجق:

نحضر السجق و نقطعه و نحمره في السمن و بعدين نضيف الفول و الملح و الفلفل الاسود.

10- الفول بالباذنجان:

لو باقي عندك قليل من المسقعة أو باذنجان مقلي أو بابا غنوج قلبيه مع الفول و ضيفي ليمون و ملح و كمون و زيت بيبقى طعمه روعة.

4- فول بالبيض المسلوق:

نحط للفول عصير ليمون و ملح وفلفل أسود و كمون و زيت وتكوني سالقة بيض عادي و تقطعه و يقلب مع الفول و يا سلام لو زعتر دقة عليه



منقول بتصريف


جزاها الله كل خير صاحبة طرق التفريز


يتبع

__________________