حبيبتى دة احساس كل واحدة فى غربة وبعيدة عن اهلها .بتحس انها زى اليتيمة وما لهاش ظهر .وبتكون حساسة من اى تصرف من زوجها وبتعتبرة مستفرض بيها ومستوطى حيطيتها (تعبيرات مصرية لكن اتمنى تكونى فاهمانى ) ومن الواضح كمان ان زوجك عايش فى الدور زيادة عن اللزوم . يعنى عايز يكون متفرنج وبيقلد اهل البلد اللى انتم عايشين فية .الحركات اللى بيعملها زى انة بيكلم زميلاتة من العمل وبيتضايق لما يخرج معاكى وكمان متخذ من زميلة لة كاتمة اسرار لة دة كلة تصرف فاكر انة بكدة بقى متحضر ومن اهل البلد اللى فى الغالب انة بلد اوروبى اللى انتم عايشين فية . انتى قدامك حل من اتنين انك تفضلى زى ما انتى بالشخصية دى وتتحملى لغاية ما تخلص فترة الدراسة على خير واعتقد انها لن تكون طويلة وترجعوا الى بلدكم وهو بالتدريج لما هيبعد عن الجو اللى هو فية دلوقت هيرجع لعقلة واحساسك بالغربة هيختفى . او الخيار التانى انك تحاولى تبقى زية يعنى تشوفى اية اللى ممكن يسعدة وتعملية وتتفرنجى انتى كمان ويا ريت تتصاحبى على زميلة من زميلاتة اللى بيتكلم معاهم وتشوفى اية اللى ممكن يكون بيعجبة فيها وتحاولى تقلديها لغاية احساسة انك مختلفة عن اللى بيتعامل معاهم دة يختفى . الصبر يا حبيبتى لغاية ما تمر الفترة دى بسلام . وترجعوا لبلدكم ولاهلكم وما يلاقيش الاغراءات اللى بيلاقيها فى الغربة دى . طبعا كل دة مع حفاظك على دينك وحجابك .