حبيبتي زوجة احمد ليه زعلانه

مينفعش تضايقي كده يا حبيبتي انا كمان هزعل انا مقدره ان اعصابك في الامتحانات بتكون متوتره وانك كمان بقالك كتير مشفتيهوش

والله متزعليش ابدا الموضوع بسيط لكن عايزه اقولك على حاجه

انتي قلتي ان نظامك انتي وزوجك مع بعض انكوا مبتحبوش التقل ماشي مقولناش حاجه انا وزوجي كده برضه لكن انا اكتشفت ان في وقت هو ممكن تكون مشاعره هاديه بسبب انه مشغول عني ومن كتر انشغاله عني احيانا مبيحسش بيا لاني جنبه على طول

المره اللي فاتت لما كنت زعلانه منه سافرت اسبوع عند عمتي في اسكندريه ورجعت تاني لقيته مستنيني في محطة القطر واول ما شافني حسيت انه عايز يجري عليا ويحضني واول ما مسكت ايديه وانا بسلم عليه حسيت انه عامل زي الطفل اللي مش قادر يسيبها تاني

حبيبتي متزعليش ابدا احمد ما شاء الله بيحبك قوي لكن هو جايز يكون مخنوق زهقان واحيانا اي حد في الدنيا بيجيلو احساس بالزهد في الدنيا احيانا من كتر الضغوط والروتين كل اللي عليكي انك تسافري بالسلامه ومتسأليهوش تاني هو ليه زعلان سيبيه مع نفسه شويه بس بلاش تحسسيه انك زعلانه منه

طب هقولك حاجه لو اي حد مسك سماعة التليفون واتصل باحمد وقالو الحق زوجة احمد هي تعبانه (طبعا بعد الشر ) مش هيجري عليكي هوا

كان واحد من اخواتنا في المنتدى بيقول انه اول ما يشوفك بعد السفر هيحس انه بقالو سنين مشافكيش وملهوف عليكي جدا والله نفس اللي حصل مع زوجي لما بعدت عنه حسيت اني من كتر ما كان ملهوف عليا اني نفسي اركب القطر تاني واسافر وارجع علشان اشوف اللهفه في عينيه مش تقل لكن علشان يحس بالقرب والبعد لانهم بيزودو الشوق

والله يا حبيبتي لما تسافري وترجعي على قد ما كنتي متضايقه من بعده عنك هتحسي بشوق ومتعه وحب ملهومشي حدود وهو انسان طيب وانتي كمان ومش معقول ما شاء الله كل الحب الجميل اللي بقالنا سنين بنبني فيه يروح فجأه لا طبعا عمرها ما تحصل لان حبنا حقيقي جدا

فرحينا بيكي ومتتكلميش عليه كتير زي ما قالولك الاخوات علشان الحسد وربنا يوفقك ويسعدك يا رب بس ممكن تقوليلي انتو اتفقتو على الفرح باذن الله يكون امتى لان شكلنا انا وانتي باذن الله هنتجوز في نفس الفتره

__________________