اختي بكلمك على طول من غير مقدمات
زوجك شكله من النوع الشمالي وهذا النوع يحب الحرمة الثقيلة اللي هو يجري وراها وهي تتغلى مايحب الحرمة اللزقة اللي رامية نفسها عليه رمي لانه نوع مراوغ وحيال ومغامر يحب المغامرات ومن ضمن مغامراته انه يغامر في الوصول للمراة ..
ان شاء الله فهمتي كلامي .. اسمعي اشغلي نفسك عنه اتركيه بس ماتقصري في واجباتك ابدا اطبخي اكله رتبي بيتك اهتمي في نفسك ثم نفسك ثم نفسك وفي عيالك لما يجي استقبليه بابتسامة حلوة وسلام وعلى طول اشغلي نفسك عنه حضري الغدا قولي له تبغى شي عندي شغل ماخلصتها غسيل مثلا ..
في المسا وقت يكون جالس مثلا لاتجلسي معاه اوقفي من بعيد عنه وقولي له تبغى شي حبيبي اذا بغيت شي ناديني واشغلي نفسك حتى لو تنزلي ملابسك كلها وترتبيها من جديد وحاولي كمان انك توريه انك مهتمة في نفسك اكثر يعني بيني له وانتي تاكلي انك تعملي ريجيم وانك خايفة على صحتك والعبي رياضة لو عندكم نادي سجلي فيه وقتك في البيت بعدي عنه اقري كتب او مجلات او اكتبي او مارسي اي هواية لك دفنتيها باهتمامك فيه العبي مع عيالك ارسمي شوفي تلفزيون ..
يعني خليه هو اللي يجري وراك واذا طلب منك شي لاترفضي بالعكس بكل روح رياضية وبابتسامة حلوة تقبلي منه وسويله اللي يبغاه لانه من النوع اللي يثور بسرعة ويدور سبب عليك خليه يجلس تايه كل تفكيره فيك وفي غموضك راح يكون كل تركيزه عليك انتي وابدا لاتغيري هذا الشي اذا لاحظته اي تغيير عليه انك لو رجعتي زي اول بيعرف انك تمثلي عليه وراح ينفر منك اكثر وممكن يجي يوم هو اللي يسويلك ليالي رومانسية لازم تثبتي شخصيتك وتفرضيها عليه وصدقيني انتي بكذابترتاحي وتشوفي حالك وتعيي حياتك مبسوطة مو عايشة في قلق وهم وتفكير فيه هو بس ايش اسويله ايش راح يقول هذا بيعجبه هذا ماراح يعجبه لا لا لا لا حبيبتي الزم ماعلينا صحتنا اي نعم مانقصر في حقوقهم ونقوم بكل واجباتنا لكن في نفس الوقت مانهمل نفسنا على حساب راحتنا وصحتنا ولك مني كل الدعاء بالتوفيق ..
اختي رددي اللهم سخر لي زوجي واجعله سكنا لي وسخرني له واجعلني سكنا له واجعل بيننا مودة ورحمة ..
لاتنسي طمنينا عليك