أولا يا حبيبتى الف مبروك وأنا دخلت مخصوص أرد عليكى لأنى بأحبك وفرحانه لك قوى
من خبرتى فى الجهاز بتاع العروسه يكفيكى جدا طقم التيفال والصاج والحلل الاستانلس اللى بتقولى عليها
أما صوانى المطبخ اللى بتدخل الفرن فلازم يكون على الأقل عندك أربع أحجام من الصوانى الدائرية ومثلهم من المربعة وأنا أفضل يكونوا سته
بالإضافه الى ثلاث صوانى بيركس أحجام
وصوانى مخصوصة للكيك بتكو على أشكال زى شكل قلب ووردة ودبدوب
وكمان صينية خاصة بالبسبوسة بتكون حوافها قصيرة جدا وصينية خاصة بالبيتزا بيكون معاها قطاعة البيتزا وسلك لتبريدها ومقصوصة
أما أطقم العصير فهاتى ثلاثة
وصوانى التقديم هاتى طقمين كل طقم بيكون بداخلة ثلاث صوانى نفس الفورمة
وطبعا طقمين كاسات ماء
وطقمين كوبايات شاى
وطقم صينى كامل
وطقم توزيع
وطقم خشاف وطقم آيس كريم طقم شاى استانلس
وطقم ميلامين
ودورق ماء زجاجى
وأطقم حافظات طعام للثلاجة
وطقم حافظات طعام للرحلات
وميزانة مطبخ
ومفرمة
وعالق وشوك وسكاكين فردانى
وطقم سكاكين بالمسن بتاعها وقطاعة لتقطيع الخضروات عليها
وقشارة فاكهة ومعلقة آيس كريم وقمع زواق للكيك وماكينة بيتى فور ومناقيش للكحك
وطقم علب توابل
وولاعة للبتوجاز حتى لو كان اشعال ذاتى هتحتاجيها لو قطعت الكهرباء
وطقم مريلة مطبخ
وفوط مطبخ
وساطور وأكياس ثلاجة ( طبعا دول للإرهاب)
ولو افتكرت حاجة تانية هأقولك
آه وما تنسيش الكتشن ماشين
وربنا يتمم بخير