أخواتى الحبيبات
أشكر لكم تواجدكم بجوارى ومؤاذرتى وربنا يفرج همكم وهمى وهم كل مسلم آمين
وهأرد على كل واحده فيكم
أولا أختى الكريمه نوجا
أنا ما أقدرش أقول لأهلى ولا لأى حد لأن ده عنده هيعتبر نهاية حياتنا معا وهيعتبره افشاء لأسرار الزوجيه وهأكون بنظره زوجه غير أمينه عليه وهتحصل منه مشاكل لا حصر لها وأنا جربت فى مشاكل حياتيه سابقه تدخل الأهل لنصحه فما كان منه الا ان اشتد عنادا وأهلى كادوا يكرهوه وقعدت أنا أصلح فى علاقتهم سنين لحد ما نسوا أو تناسوا علشان خاطرى أما هو فلم ينسى لليوم اننى فتشت اسرارنا بره ولذلك انا هددته هذه المره وأوضحت له انه ان لم يتم التفاهم بيننا فسأكون مضطره لاخبار الأهل.
أما أهله فهم سامحهم الله ينصرونه سواء كان على حق ام لا ماعدا والده فهو انسان طيب ولكن زوجى له طريقه عجيبه فى اقناع من حوله بأنه مظلوم وغلبان لدرجة انى لما بأسمعه وهو بيتكلم مع الناس ويبرر لهم موقفه بيصعب على انا وبأنسى انه مزعلنى وبأحس انى مفتريه!!!!!!!!!
أما عند دهشتك وسؤالك لماذا أرغب فى الحمل منه طالما هو مش عايز هأقولك وبكل صراحة
أنا ما عرفتش طعم السعاده الحقيقية ولا الحب الحقيقى الا مع ابنى ربنا يخليه لى ويطرح البركه فيه ...... هو اللى بيهون على كل مصاعب الحياة وهو حنين جدا على وبار بي جدا ومطيع وجميل ماشاء الله وأنا حاسه انى لما أكبر وأعجز أن أولادى هم اللى هيفضلوا لى وهم اللى هيشيلونى فى مرضى وكبرى لأنى والحمد لله بأربيهم على قيم وعلى الدين بجد
يا حبيبتى انا خايفه من جوزى ومش مطمنه معاه وعارفه ومتأكده إنه هيزهق منى لو مرضت وعجزت وهيرمينى وده اللى مخلينى نفسى يبقى لى عزوه واولاد
وكمان نفسى احس انى عايشه نفسى احس انى سعيده زى باقى الناس نفسى احس انى لسه صغيره وشابه ممكن تعطى لكن انا دلوقتى حاسه ان عندى 70 سنه
نفسى كمان ازود عدد المسلمين وخصوصا انى معاهده نفسى انى احفظ ولادى كتاب الله كاملا واعلمهم دينهم صح وأنفع بيهم الإسلام
أختى عاشقة الطفوله
كلامك كله صح وعلى عينى ورأسى وأنا فعلا قلت له مره انى خلاص مش هأفكر فى الموضوع ده ولا هأعطى له أهميه وبقيت انام بعيد عنه فى ايام التبويض ولا أهتم أقوم الاقيه الصبح قايم متنرفز وبيرمى اللوم على انا ويقعد يقول لى شفتى انتى مش مهتمه وانتى مش فى بالك هو مش الدكتور قايلم ومفهمك ان الأيام دى ايام مهمه زحضرتك نايمالى بعيد
وأنا ممكن ارد عليه واعملها خناقه لكن ما بأعرفش بينى وبينك بأرجع افرح ويرجع فى الأمل انه عايز يخلف منى وما بأرضاش أرد لا يعند أقوم أقول له اى حجه غير مقنعه ( أصل انا ما كنتش فاكره) ويرجع هو اللى يجدد الأمل فى من جديد ولما ارجع اهتم يقلب هو ويطنش ...... والله ما عدت فاهماه
غاليتى مشاعر مرهفه أشكركى على كلماتك الرقيقه
وأنا جاوبتك على سؤالك ليه انا عايزه اخلف تانى فى ردى على نوجا أما عن مشاكلى الزوجية فقد اعتدت على التأقلم معها وعندى قناعتى الأكيده بأنه لا يوجد بيت خالى من المشاكل وكل على حسب تحمله وأنا ولله الحمد من النساء ذوات النفس الطويل جدا والصبر على المشكلات والسمو فوقها اكثر مما تخيلى وهذا ما اتقنته من خلال 11 سنه زواج جربت فيها جميع المشاكل ازوجيه . شاكرة لكى مرورك الجميل وادعوا الله ان يوفقك لما تحبين
عزيزتى دايموند
لقد اوضحت فى ردى على الأخت نوجا سبب رغبتى القوية فى الانجاب ولعلك الآن مقتنعه بها فأنا هدفى من الانجاب كبير ومستعده لتحمل مشاكل الزواج وتربية ابنائى ايضا فهم من ينسونى كآبة حياتى شاكرة ردك على وتفاعلك معى
حبيبتى المصريه أحبك الله ورزقك السعاده فى حياتك الزوجية ورزقك بالبنات والبنين آمين
أنا لا أعتب على زوجى فى تعامله معى فأنا متفهمة لنفسيته جيدا فقد تربى فى جو أسرى مليئ بالصراعات والمشاحنات ولذلك أنا مقدره أن فاقد الشيئ لا يعطيه وأحاول من ناحيتى أن أعوضه وأن أصبر لأن هذا قرارى واختيارى وحياتى ماشيه والحمد لله وكل من يرانى يحسدنى على استقرارى الأسرى ( الظاهرى) ولا يعلم احد ما بداخلى الا الله
أما عن لخبطة أيام التبويض وعدم حسابها أمامه فقد سبق وأوضحت أننى فعلت ذلك مرارا وأجده يلقى على باللوم وبيكون فاكر وحاسبها كويس جدا وعارف ايامها ولما اطنش يرجع يقول لى انتى آهو اللى مش مهتمه ومش فى دماغك الموضوع وعاملاها حجه علشان تنكدى جو البيت وانا ما أصدق اعرف او المس منه انه مهتم فلا ارد عليه أو اعرفه انى بأعمل كده علشان هو مطنش لحسن يرجع يقلب تانى وبأتحجج بأى حجه واهيه فتتقلب الأمور فوق دماغى
وانا الحمد لله مداومه على قرآة سورة البقرة وآيه الكرسة وأدعية تفريج الكرب وربنا موجود ....... شكره مرورك ومشاعرك الجميلة
أخواتى والله انا ما كتبت وفضفضت الا من ثقل وكبر الهم فوق رأسى وبعدما استنفذت كل وسائلى وحلولى وخدعى ومهاراتى واتمنى من كل من تقرأ مشكلتى حتى ولو لم تكتب تعليق أن تدعو لى الله بتفريج همى
التعديل الأخير تم بواسطة sa33 ; 24-01-2009 الساعة 09:57 AM