يا جماعة الخير الخلل مو في تجاربه للزواج ولا في زوجاته الخلل في شخصيته هو نفسه الين الحين ما استوعبتوا ؟

والله يا اخ حب مفقود بصراحة ضغطي يرتفع لما اشوف كل هالسطحية في التفكير كنت ماسكة اعصابي وانا اقرا هالموضوع بس لما اطلعت على مشاركاتك السابقة بصراحة انفجرت وصرخت لا شعوريا ( وش يبي ذا ) اول شي اصرارك الغريب على البنات الابكار كأنك طفل يستمتع بلحظة فتح الحلاوة وبعد ما يمل منها يزهد فيها لا وتستشهد بأحاديث الرسول اللي يفضل فيها البنت البكر طيب هو يمكن كان يوجه كلامه لشاب عازب ما له اي سوابق في الزواج ويبيه ياخذ واحدة مثله ، يمكن هو عارف نفسية الشاب هذا وعنده استشراف للمستقبل انه يمكن ما ينسجم مع الثيب الله اعلم بس ما اعتقد ان اللي ياخذ البكر بيدخل الجنة ولا له اجر اعظم من اللي يتزوج الثيب اهم شي نية الواحد في انه يعف نفسه ويستر على بنات المسلمين ، ولا اللي ياخذ مطلقة معناه عنده مشكلة معينة ولا معاق ولا دميم ولا فقير خلت البنات الابكار واهاليهن ما يبونه بالعكس والدليل نشوف بنات مثل الورود ياخذون شباب من هالنوعية عاادي جدا مو عيب العيب انك تنقص من شأن المطلقات وتجي تسأل بكل بجاحة واحدة من العضوات ( طليقك الثاني وش اجبره ياخذ مطلقه ؟ ) وواحدة ثانية تقول لها ( زوجك لو ماكان معوق مارضى يرتبط بمطلقة بس اعاقته من اجبرته على الارتباط بمطلقة .احيانا الفقر والوظيفة المتدنية وسوء السمعة والاعاقة تجبر الشخص اجبار على الارتباط بمطلقة) وتنصح المطلقات انهم ياخذون معددين كزوجة ثانية بحجة ان زواج المطلقة من مطلق مثلها رهان خاسر وحياة غير متكافئة الحين صارت غير متكافئة ؟؟ ومرة تقول ( وتستشهد بالنسب المئوية ) ان المطلقات فيهم امراض نفسية ؟؟ والله شي مؤلم بصراحة وكلام ما ارضاه لأني اعرف الكثير من المطلقات من معارفي وعايشين احسن عيشة سواء ارتبطوا مرة ثانية او لأ .. وكثير منهم تزوجوا مرة ثانية وبعد العدة بفترات بسيطة من رجال وكملوا حياتهم بسعادة انا ما اغصبك على اختيار المطلقة بس ما له داعي التجريح فيهم بطريقة او بأخرى وتشجيع الآخرين على افكارك الغريبة ، هذا كوم وغرورك بنفسك كوم ثاني ( انا شاب ومرتاح ماديا ) كأن هذا اللي يهم الناس وبيخليهم يعطونك بناتهم " الابكار" على طول وهم مغمضين عيونهم ، بس الحمد لله ان طليقتك الثانية واقدامها على الزواج كسر هالغرور لدرجة انك انهبلت وقمت تتصرف تصرفات غير متزنة كامتناعك عن الصرف على ولدك
في النهاية ما اقول الا الله يعينك على نفسك وما يصح الا الصحيح والواحد يفكر قبل ما يرتبك ببنات الناس ويخليهم في النهاية يحملون لقب مطلقة اللي مع الاسف يعتبر كأنه سب وشتم للمرأة وليس وصف لحالتها الاجتماعية