والله حالتك صعبة ..
تقول أنك نسيت زوجتك الأولى .. وانت قاعد تراقبها من بعيد وإلا شلون عرفت أنها انخطبت وقاعدة تفكر
تدري أن زوجتك استفادة من تجربتها الأولى معك أكثر منك .. أنت رحت ركض تزوجت الثانية عشان تحرق
قلب الأولى وتوصل لها رسالها أن بدالها مليوووووووووون .. لكن هي لا ..
هي مشاء الله عليها جلست لين تدمل جروحها وتستعيد توازنها وتعرف شنو الشخصية الي تصلح لها
وما تسرعت مثلك .. ما أسرع تزوجت وجبت طفل والثاني بالطريق ..
شي ثاني .. تقول ان زوجتك الحالية ما تحترمك .. طيب يمكن انت تفسر تصرفاتها عدم احترام ويمكن
تفسر اعتزازها بكرامتها أنها عناد وتكبر ..
يا اخوي أحنا معروفين نعطي الخيط والمخيط حق الرجال .. من اول ما نفتح عيونا على الدنيا نعرف ان الرجل
هو صاحب القوامه وهو ربان السفينه .. لكن انت الله يهداك ما ادري شلون فاهم القوامه
القوامه والسيادة ماهي صراخ واهانات واومر .. وفي المأثور ( سيد القوم خادمهم )
يا اخوي الله خلق الكون بقوانين .. ومن هذي القوانين أن عشان تحصد الحب لازم تعطي حب
مو معقوله قاعد طول النها تردد ما احبها .. ما أحبها .. وقسمات وجهك وذبذبات جسمك تعطي اشارات
وتبيها تحتويك بحنانها وتقولك سيدي سيدي حط السلاسل بيدي
شنو هي مو انسانه لها مشاعر .. وإلا حجر مري والمفروض تتحمل كل شي وبعدين تقابلك بوجه مبتسم
وأكيد تتذكر هذا القانون الي درسناه في الفيزياء ( كل فعل له ردة فعل مساوي له في القوة ومعاكس له في الاتجاه )
يعني إذا بيصدر منك شي سيء ما بتشوف إلا السوء وإذا صدر منك شي حلو راح تشوف الأفراح
وبعدين أهلها ما حطو عليك مؤخر يكسر الظهر إلا لأنك مطلق من قبل .. مو من عفانة بنتهم
تقول في كلامك ( رابطينياهلها بمؤخر يكسر الظهر لان اهلها عارفين عفانة بنتهم والظاهر لو فيها خير ماعافها الطير ماوافقت علي وانا مطلق الا ان وجدو فرصة لشخص مطلق ولو طلقها لاصبح العيب منه فهو رجل مطلاق ومتعود على الطلاق . )
هذا معناته أن اي بنت بتقبل فيك هي ما فيها خير .. لأن كل مطلق ما فيه خير .. حسب كلامك طبعاً
ثالثاً : ما حد راح يجبرك تتزوج منفصله .. عادي أنت حر .. روح ودق بيبان الناس ودر حول العالم في ثمانين يوم واختار الي تبي .. وهم الناس حرين يا يعطونك يا لا .. وبالتوفيق .. شنو السالفه مو غصب هي وما حد بيجي يحط السيف على رقبتك يقولك تزوج مطلقه !!
رابعاً : أنت مشكلتك مبهمه ما فيها ملامح .. يعني قول مشكلتي كذا وكذا .. 1/ ... 2/ ..
خامساً : تقول تبي حب ورمنسيه واحترام .. عشان تحصل على كل هذي الاشياء لازم تزرعها
يعني عمرك شفت مزارع عاقل يروح المزرعه وهو ما نبت ايام التنبيت .. بعد هذي مو عدله
اجلس مع زوجتك وصارحها قلها انا ابي حياتي تصير كذا وكذا ومشكلتي معك كذا وكذا
واسألها هي شنو مشكلتها معك .. وشنو عيوبك ؟؟
وربي انا اعتقد أنك ظالم زوجتك .. لأنها لو كان همها الدراسه وتنفصل ما كان احملت مرتين
الانجاب دليل على الرغبه في الاستقرار .. ولو ما تبي كان تعذرت بالدراسه مثلاً
سادساً : اشوفك ابد مو داير بالك على عيالك .. معقوله هذا الشي .. عندك ولد من الاولى ومن الثانيه طفل والثالث بالطريق ..
يا أخي هذول مسؤلياتك .. هذول أمانه من رب العالمين و لازم تعطي الامانه حقها .. أنت مسؤول عنهم في الدنيا والأخر
لازم تفكر فيهم .. ومن حقوقهم توفر لهم الحياة الكريمه مو تمشي وتطلق وتحرمهم من امهاتهم وإلا اذا الام تزوجت وهذا من حقها تاخذهم عندك ويتشتتون
تراهم هم الضحية الاولى للفشل التواصل .. وش بيطلعون بكره معقدين نفسياً .. ناقمين على المجتمع والحياة ..
يا خوي فكر انت اليوم بصحتك وشبابك بس هذا مو دايم لك بكره تكبر وتضعف وبتكون محتاج لهم ..
وانت إذا ما راعيتهم في وقت ضعفهم و شدة احتياجهم لك مراح يراعونك في كبرك وضعفك وكما تزرع تحصد
تقول تبي تكون السيد في المنزل .. شي حلو
بس السيد سيد في كل شيء .. المفروض تكون سيد في تضحياتك وسيد في تصرفاتك وافكارك
تكون سيد في احتمالك لمسؤلياتك أمام بيتك وابنائك من كل زوجه
تبي حياتك تتغير غير من نفسك أول وهذا مو كلامي هذا كلام رب العالمين
( إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ )
وإلا صدقني إذا ما بديت تصلح حياتك من الحين وربي أما أنك تقعد تتزوج وتطلق طول عمرك وإلا مراح تهجدك إلا وحده أم سحور وطبوب الله يجيرنا سواء كانت مواطنه وإلا أجنبيه .. ولا ابي اعدد لك امثله