يا اخوي الله يهداك شيل كلمة الطلاق من قاموسك تماماً ..
لو شلته بتشوف حل .. أما أنك تخليه على رأس القائمة فمراح تعمل شي
راح تفضل الهروب .. والطلاق إذا نتخذه اول وسيله اسمه هروب وعدم قدرة على حل المشكلة
يقولون آخر الدواء الكي .. وانت حطيت الكي على رأس القائمة
وانا أقول ليش الطلاق كثر والمحاكم صارت تغص بطلبات الطلاق
هذا هنا مربط الفرس .. الناس في الماضي كلمة طلاق رافعينها من القاموس
خلااااااص الزواج طول الدهر .. أما الحين أقل مشكلة طلق واقطع العرق وسيح دمه
لالا يا خوي كل مشكلة ولها حل .. أنت الرجال .. انت القوة .. أنت التحمل .. أنت الحكمة .. أنت ربان
السفينه الي تقودها إلى بر الآمان.. لا تغرق سفينتك عند أول هبة ريح ..
الحياة مليانه بالمشاكل .. وانتوا الي ناقصكم تفهمون بعض .. وكل واحد منكم يفهم واجباته وحقوقه
عشان تنسجمون ..
\
/
مشكلة العناد .. الغالبية العظمى من الناس فيهم عناد بدرجات متفاوته .. كلنا ما نحب احد يفرض علينا
آراءه .. مراح تشوف أمرأة تهز راسها لك 24 ساعه .. وإن شفتها بتمل منها وبتشوف انها سلبيه
وبتتزوج عليها وحدة تعمل حركة في البيت بالأخذ والرد ..
وزوجتك مع الايام راح تتعود عليك إذا كنت حازم في أمور ما تسمح بتجاوزها مع عدم الغاء شخصيتها تماماً
بس تحتاجون للزمن والصبر بس .. لأنكم محتاجين تنضجون .. وكل شي يبي له وقت أحنا ما نطلع من
بطون امهاتنا علماء نحتاج للزمن عشان نتعلم .. ما تعلمنا القرأة والكتابة في يوم واحد
الأملاء اتذكر ما اتقناه إلا بعد نهاية المرحلة المتوسطة .. تخيل كم سنة ؟؟
و ما عمرنا سمعنا واحد بنى بيت وأثثه في يوم وليله ولا شهر وشهرين ..
غالباً نسمع يحتاجون سنة يقومون البيت وكم سنة عشان يكمل تأثيثه ..
إذا الاشياء المادية كذا .. أجل كيف الاشياء المعنوية !!!
عليك بالصبر يا اخوي وخل الزمن يعمل مفعوله نتيجة احتكاكم الدائم
\
/
مشكلة الاعتذار .. تكمن بالدرجة الاولى أن كل شخص يشوف أن الحق معاه
ومدام الحق معاي مراح يعتذر ..
وكلنا فينا هالصفة ..
وعشان نعرف وين الخطأ وين الصواب ونعرف المخطأ لازم يكون في نقاش هادئ وهادف
نحط مشكلتنا في ميزان العدل والمنطق .. في ميزان الاخلاق
نتناقش ونوزن أعمالنا .. في هذا الوقت راح يبين مين الصح ومين الخطأ ومين الي ويعترف بخطأءه
وبدون نقاش وبدون هدوء ما توصولون للي تبون ..
لأن في غريزة البشر مجرد نشوف احد يهاجمنا تطلع غريزة الدفاع عن الذات ونبدأ ندافع
وانت تهاجم وصراخ وهواش وهي بعد نفس الشي عشان تدافع عن نفسها .. ولا راح نطلع بنتيجة
لكن لو جلست معاها وتكلمت بهدوء وبدون تهجم وعنف راح تعرف أن الي قدامها زوجها وحبيبها
مو عدو يبي ينتقم ..
تمنيت اجيب لك امثله بس انت ماذكرت ايش تتهاوشون عليه
/
\
مشكلة الفلوس اعتقد ما تحتاج لكلام زايد .. محلوله وسهله
/
\
/