{ وَلَن تَسْتَطِيعُواْ أَن تَعْدِلُواْ بَيْنَ النِّسَاء وَلَوْ حَرَصْتُمْ فَلاَ تَمِيلُواْ كُلَّ الْمَيْلِ فَتَذَرُوهَا كَالْمُعَلَّقَةِ }

الاية تصور حالتكم .. ابوكِ مال لزوجته الثانيه بشكل كبير وترك أمك معلقة

المشكلة أن الميل القلبي الزايد يؤدي إلى عدم العدل .. لأن الانسان ما يحس انه غير عادل

الانسان يحب نفسه ويحب يروح مع الي يريحه أكثر وفي هذي الحاله ينسى أن في عليه واجبات

زوجة أبوك ما في شك مريحة أبوكِ على الآخر .. وأبوكِ حابها

طبعاً مو بالضرورة يكره أمك .. بس هذيك عامله له إثاره وأشباع أكثر

يعني يمكن ذيك عندها اسلوب في التعامل ما عند أمك الله يحفظها

وطبعاً أنا ما أنفي طيبة زوجة ابوك .. اهي ممكن تكون فعلاً طيبة وحبوبة

وممكن ما يكون لها ذنب .. يعني مو اهي الي مخليه ابوك متغير وقاعدة توزه عليكم .. لا

بس في غريزة النساء حب التفرد في قلب الرجل

وهي غريزتها تدفعها أنها تعمل اشياء عشان تكون في مكان متفرد في قلب ابوك

ونتيجة هذا أن ابوكِ حبها أكثر وتعلق فيها

لكن أمك مثل ما اهي .. وابوك يحب التجديد

يعني يا أمك تتحرك عشان تسترجع مكانتها .. أو تبقى كذا تموت نفسها من القهر

أنا والله حاسة بقهرها .. وادري اعصابها مطحونة من هالحالة

بس مشكلة المرأة أنها عاملة الزوج حياتها كلها .. يعني بس يطنشها تصير حياتها بلا معنى

تحبه أكثر من حبها لنفسها .. اي حركة يعملها تشب النار في قلبها

الحين أهم شي في الموضوع صحتها

خليها تهتم في صحتها قعدي معاها خليها تفضفض لك وانتي حثيها تهتم في صحتها

قولي لها لو صار فيكِ شي محد بينفعك .. وزجك هذا الي محترقه عشانه

لو جاتك جلطة لاسمح الله بالعكس مراح تشوفينه

إذا اهو يجي ينام عندك ليلة وعندها ليلة لو مرضتِ مراح تشوفه ابد

وبتصير عنده حجة قوية

وخليها تشوف نفسها .. خليها تطلع من جو البيت بلاش هالحبس الي هي فيه

شنو قاعدة تنتظر من ابوك نظرة !!

خليها تروح زيارات .. تطلع معاكم تتمشى .. تروح عن نفسها

إذا يوم بتسافرون سفرة قصير مكة .. خذوها معكم تاخذ عمره

يعني اي مكان عزموها تروح معكم

أهم شي تبعد قد ما تقدر عن التفكير في هالسالفه

وانتي قعدي كلميها وذكريها ونصحيها لا تعمل في نفسها كذا

ولا تقعد تستجدي العطف من ابوكِ

وإذا ابوكِ ما يصارخ ولا يضرب شي حلو

خليها تحاول تتقرب منه .. خليها تاخذ المبادرة

واذا سافرت ذيك أحس واحسن بعد يفضى لها الجو

مو تقعد تتفرج وتحط يدها على خدها وتنتظر يعطف ويحس فيها

مراح يحس فيها إذا ما حسسته بوجودها وأهميتها في حياته






الله يفرج عنها ويهدي عيالها

__________________