حطيها حلقة في ودنك الناس مش بيعجبها العجب
اوعي تسمعي ولا حتى كلام صحباتك
كلامهم مش منطقي تماما في اي جانب .. !!
لاهو منافق ولا سكير ولاتارك للصلاة ولا بيمشي مع بنات ولا بيعاملك وحش ولا بخيل ... اومال عيبه ايه!!
ولو قعدتي تسمعيهم بعد الدخلة هتخربي بيتك بإيدك
يابنتي انا ليا قريبة كان بينها وبين جوزها تقريبا 4 سنين
بعد سنتين وشوية جواز جاله كانسر وبعدها بكام شهر كان اتوفى (ربنا يرحمة رحمة واسعة ) وكان في ريعان شبابة .. وابنه كان عنده سنتين اتيتم
لايعلم الغيب الا الله سبحانه وتعالى وقولي للي بتقولك الكلام ده تاخد بالها على نفسها لأن ممكن تتجوز شاب اصغر منها ويموت !(ربنا يحفظ الجميع ) الاعمار بيد الله
ماتعمليش حساب لكلام الناس بتاتا .. ومادام جوزك شاريكي بالغالي بلاش تبيعيه بالرخيص ..
طول مانتي سايبة حد بيتدخل في حياتك هتلاقي اللي بيتدخل ده هو اللي بيمشيلك حياتك .. ماينفعش كدا ..
اتوكلي على الله ..
انتي داخلة على حياة كلها مسؤوليات وهيبقالك اطفال (باذن الله ).. لازم تكون ليكي وقفة حازمة مع الكل يا اما هيتربوا ازاي !
لحد دلوقتي مش شايفة اسباب ملموسة لكرهك ليه او لنفورك ؟؟!! انتي بتتلككي ليه زي ما اهلك بيعملوا
المفروض تبقي القلب بتاعه والصدر الحنون اللي يعينه على الحياة .. مش تحطي الحياة فوق دماغه !
يابنتي انتي لو اخدتي واحد قمر هيقولوا ايه ده احلى منها خسارة فيها !
ولو اخدتي واحد عادي هيقولوا راجل عادي جدا مش عارفة ايه حلاوته ده !
ولو اخدتي واحد مش وسيم هيقولوا هتضيعي عمرك معاه انتي خسارة فيه !!
والله الناس مايملى عينهم الا التراب ... دايما اسمعي كلام العقل بلاش تنساقي وراء اهواء البشر..انتي مش طفلة
كنسلي كل كلام الناس سواء اهلك او صحباتك واقفي وقفة عقل كدا مع نفسك وراعي ربنا في حكمك
وحطي البني آدم ده قدام عنيكي واكتبي في ورقة وقلم .. وفصصيه ... ولما توصلي لنتيجة اياً كانت ماتسمحيش لحد يبوظهالك ..
دي حياتك انتي مش حد تاني
وربنا يوفقك
التعديل الأخير تم بواسطة helwaya ; 11-03-2009 الساعة 07:15 AM