يعلم الله اني كنت احاتيك .. وافكر فيك

صدقيني ما عرفت أنام ذيك الليله من الانفعال

جلست اليوم الثاني وانا افكر فيكي

واقول في نفسي شلي طيح هالمسكينه في هالبلوه .. والمشكله ما تاكلها إلا الضعيفه

عموماً زين سويتي كلمتي اخوك .. هو سندك وهذا هو ما قصر نصحك وقالك وبين لك انك غاليه عند اهلك

والنعم فيه ما قصر ..

وطبعاً أنا فهمت انه ما يبي يدخل عشان الموضوع ما يكبر

والحين انتي مثل ما قال اخوك حاولي معاه بالهدوء عسى الله يهدي قلبه . .

لأن فعلاً العصبيه والصراخ تخليك تعاندين غصب حتى لو انك تدرين ان هذا الشي غلط ..

حاولي انك تجذبينه للدين بطريقه غير مباشره يعني مثلاً

سأليه عن شي في الدين شنو حكمه .. قولي له انا نسيت ركعه في صلاتي او شي سهيت عنه في الوضوء مثلاً

شنو حكم صلاتي .. خليه يروح يسأل الشيوخ عن اشياء .. يعني حاولي تقربينه من هالجو

قولي له في رمضان الي فات صار معي كذا وكذا .. شنو الحكم اعيد الصيام

شوي شوي راح يحس بأهمية هذي الاشياء وان والدين مو لعبة ولا على كيفنا



وعلى الزنى .. لا تجينه كذا في الوجه ... لا تعالي بطريقه غير مباشره

يعني مثلاً : قولي له صار نقاش بيني وبين صاحباتي أو نقاش في النت على شنو حكم مصافحة

المرأة الأجنبيه للرجل الأجنبي ..

طبعاً انتي سوي نفسك ما تدرين ومو عارفه ..وانك تبين الاجابة عشان تردين على صاحبتك

طبعاً انا ليش جبت لك هالمثال .. عشان مخه يعمل مقارنه بين مجرد المصافحه والزنى

بس انتي لا تبينين له هالشي خلك طبيعيه وغشيمه ما تدرين عن شي

صدقيني ضميره شوي شوي راح يصحى .. و راح يبدأ يفكر ويصحى من نومة هالضمير والسبات الي هو فيه

يعني انتي عليك بس اشارات عشان تصحين ضميره .. وصديني النفس اللوامه راح تشتغل عليه

ولا راح يقدر يستقر إلا لما يرجع لطريق ربه ...




خليه ينتبه بس بطريق غير مباشر أن الدنيا مو دايمه لأحد وبأي نفس طالع والا نازل الواحد ممكن يفارق الحياة

لكن شنو فايدة الدنيا ومتاعها اذا خرجت الروح على معصية

خليه ينتبه لبنته الي يحبها ومتعلق فيها .. أن الله ما يبتليها بعيال الحرام يحومون حواليها اذا كبرت انتقاماً منه

قولي له قريت في المنتدى مثلاً قصة كذا وكذا .. مثلاً اذا الادارة تسمح لي قصة ( رجل حزين جداً ) شلون

هذا الرجال ما زنى ولا شي بس مكالمات ومعى هذا خايف من الله وخايف ان الله يعاقبه في بناته لو تزوج ..

وهذا هو مو متزوج ويحاتي وخايف من المستقبل من الحين



واهم شي خلي القرآن دايماً في بيتكم .. ترى له أثر ما تتخيلينه

تدرين أنا أحب أسمع قرأة عبد الباسط .. قرآته تهز الصخر .. ما أدري بس شعور غريب بس اسمعه يقرا قرآن

تحسين أن قلبك يرق وحتى الدمعه تصير قريبه .. جربي تسمعين سورة البقرة ( المجود ) جربي تخلينه يسمعه

وكأنك ما تدرين انه موجود


وبعد لازم تقرين كل يوم ولو صفحه وحده .. ترى انتي بركة البيت الحين ولا تنسين الاسغفار داومي عليه

ادعي له .. دايماً ادعي له من قلبك بالهداية


الله يوفقك ويصلح زوجك آآآآآآآآآآمين ويلين قلبه ويهديه ويجمعكم على الخير ولا يفرقكم

نسيت اقولك سوي هالاشياء على شكل سوالف وأخذ وعطا يعني مو وعظ وارشاد واضح

يعني كأنك قاعدة تسولفين معه ,,

وخلك طبيعيه وحبوبه وخفيفة ظل عشان يحب يقعد يسولف معك

ولا تجيبين كل شي مره وحده .. لا شوي شوي ..

__________________